ის წლებია გერმანიაში ცხოვრობს და მოღვაწეობს... მის თავბრუდამხვევ წარმატებებზე საზღვარგარეთის პრესა ხშირად იუწყება. 2015 წელს გერმანიაში წლის საუკეთესო კომპოზიტორი გახდა, რამდენიმე თვის წინ კი პარიზში, ეიფელის კოშკთან თვალწარმტაცი შოუთი გააოცა ევროპელი მსმენელი და მაყურებელი.
AMBEBI.GE 31 წლის წარმატებულ კომპოზიტორს ლევან ბაშარულს გაგაცნობთ, რომელიც ამჟამად გერმანიაშია და სწორედ იქედან უპასუხა ჩვენს კითხვებს:
- თქვენ გერმანიის წლის საუკეთესო კომპოზიტორი გახდით… გვიამბეთ ამის შესახებ...
- გერმანიის წლის კინომუსიკის დაჯილდოების ცერემონიალი Deutscher Filmmusikpreis 2015 გაიმართა, სადაც ნომინანტთა შორის მეც მოვხვდი. წლის დაჯილდოებაზე 4 ნომინაციაა დაწესებული: საუკეთესო მუსიკა ფილმში, საუკეთესო პოპ-ნომერი ფილმში, საუკეთესო წლის 
ახალგაზრდა კომპოზიტორი და წლის დამსახურებული მოღვაწე კომპოზიტორი (უფროსი თაობიდან)... პირველ და მეორე ნომინაციაში გამარჯვებულის გამოვლენა კონკურსის პრინციპით ხდება. მესამე და მეოთხე ნომინაციაში საუკეთესოებს ცნობილი გერმანელი კომპოზიტორებისაგან დაკომპლექტებული ჟიური ირჩევს და ასახელებს წლის ნომინანტებს.
ჟიურის რამდენიმე წევრს მოსმენილი ჰქონდა ჩემი სიმფონიური პოემა "ომის შემდეგ" მიუნხენის სიმფონიური ორკესტრის შესრულებით. ასევე მხატვრული ფილმები, მათ შორის LUIS TRENKER, რომლის პრემიერა 2015 წლის ივლისში, მიუნჰენის კინოფესტივალზე გაიმართა. "წლის ახალგაზრდა საუკეთესო კინოკომპოზიტორის" ნომინაციაში ორ ახალგაზრდა კომპოზიტორთან ერთად დამასახელეს. ამ ნომინაციას დიდი მნიშვნელობა აქვს კინომუსიკის წრეში და უზრუნველყოფს მომავალში საჭირო და საინტერესო კონტაქტებს, პროექტებს...
- ცოტა ხნის წინ პარიზში საოცარი შოუ მოაწყვეთ, რომლის შესახებ ბევრს წერდა ადგილობრივი პრესა...
- მიუნჰენში არსებობს ხელოვანთა ჯგუფი "SUPER+", რომლებიც დაკავებული არიან მეტად ინოვატორული არტ-პროექტებით. ერთ-ერთი მათი პროექტი არის "ფონიქსის ფრენა", რომლის პრეზენტაცია პარიზში შედგა... არის 70-მეტრიანი ვერცხლის ცელოფნის გიგანტური ფიგურა, რომელიც ჰელიუმის აირით ივსება და 7 სხვადასხვა მხრიდან თოკებით მოზიდვით საინტერესო ფორმებს იღებს ჰაერში...
ჩემი მიზანი იყო არა მარტო ემოძრავა ამ "ბუმბერაზს" არამედ "ელაპარაკა" მუსიკით... შეიქმნა ორიგინალი ნაწარმოებები ამ საღამოსთვის, შემუშავდა კონცეპტი იმპროვიზაცია: დიჯეი (ელექტრონიკა), ფორტეპიანო და ვიოლინო.. კონცერტი-შოუ 11 საათი მიმდინარეობდა საღამოს 19:00 საათიდან ეიფელის კოშკის წინ... ულამაზესი სანახაობა იყო განათების და ტანისამოსის მიმართულებითაც. პროექტი დაგეგმილია 2017 წელს ვენეციასა და ნიუ-იორკშიც.
- ამჯერად რა პროექტებით ხართ დაკავებული?
- ოქრომბერი მეტად დატვირთული თვე იყო. გარდა "ფენიქსის ფრენისა", ძალიან ცნობილი ბავარიული ჯგუფის სიმღერების გაორკესტრებაზე ვიმუშავეთ მე და ხუთმა კოლეგამ. 8 ოქრომბერს შედგა "Dreiviertelblut"-ის და მიუნჰენის სიმფონიური ორკესტრის ერთობლივი კონცერტი, რომელიც განსაკუთრებული წარმატების გამო კიდევ სამჯერ გაიმართება ნოემბერში.
ასევე ჩემთვის სასიამოვნო გარემოში შესრულდა 28 ოქტომბერს, ჩემი საფორტეპიანო ტრიო "ომის შემდეგ" ქალაქ ბრემენში. ორი უნიჭიერესი ქართველი გოგონას (ნინა ორჯანელი, თეონა მანჯგალაძე) მეტად გემოვნებიან, კარგად დაგეგმილ მნიშვნელოვან საღამოზე, საქართველოს კულტურის და ტურიზმის შესახებ. პროექტს მიეცემა სისტემატიური ხასიათი, რომელიც გერმანიის სხვადასხვა ქალაქებში საქართველოს და ქართული კულტურის პოპულარიზაციას ემსახურება.
სამომავლო გეგმები ფილმის მუსიკის მიმართულებით მაქვს. იგეგმება 3-ნაწილიან სატელევიზიო ფილმზე მუშაობა. გარდა ამისა, მივიღე შემოთავაზება ერთ-ერთი დოკუმენტური ფესტივალის მუსიკალური მხარის ჟიურის მიმართულებით... ასევე ვხელმძღვანელობ ვოკალურ კვინტეტ "ჰარმონიას", რომლის მიზანია მაღალი შესრულების დონით შესთავაზოს და გააცნოს ქართული ჰანგები გერმანელ (და არა მარტო) მსმენელს. რამდენიმე თვეში დაგეგმილი გვაქვს პირველი სოლო კონცერტი მიუნჰენში, შემდგომში გერმანიის სხვადასხვა ქალაქებში და სხვა ქვეყნებშიც.
მანანა გაბრიჭიძე
AMBEBI.GE
