"მარადმწვანე" დეპუტატები საქართველოს პარლამენტში

უკვე ცნობილია საპარლამენტო არჩევნების შედეგები და უახლოეს პერიოდში საქართველოს მე-9 მოწვევის პარლამენტი შეიკრიბება, სადაც 3 პარტიის - "ქართული ოცნების", "ნაციონალური მოძრაობის" და "პატრიოტთა ალიანსის" წარმომადგენლები შევლენ (იხილეთ მომავალი დეპუტატების სავარაუდო სია)

მათი გარკვეული ნაწილისთვის საპარლამენტო საქმიანობა ახალი არ არის. მეტიც, ზოგიერთი ორი, სამი ან მეტი მოწვევის პარლამენტის წევრი იყო. გთავაზობთ "მარადმწვანე" დეპუტატების არასრულ ჩამონათვალს, რომლებიც რამდენჯერმე იყვნენ პარლამენტის წევრები და რომელთაც მომავალ 4 წელსაც ვიხილავთ საკანონმდებლო ორგანოში.

გიგა ბუკია "ქართული ოცნების" წევრია და პარტიაში სიის 35-ე ნომრად დასახელდა. "კონსერვატორი" ბუკია იქამდე ორჯერ იყო პარლამენტის წევრი მეექვსე და მერვე მოწვევის პარლამენტში - 2004-2008 და 2012-2016 წლებში.

ასევე "კონსერვატორი" ზვიად ძიძიგური "ქართული ოცნების" პარტიული სიის მე-15 ნომერია. ძიძიგური პარლამენტის სამი მოწვევის დეპუტატი გახლდათ.

მწვანეთა პარტიის გენერალური მდივანი გიორგი გაჩეჩილაძე "ქართული ოცნების" წევრი და პარტიული სიის მე-17 ნომერია. მას ვიხილავთ მომავალ პარლამენტშიც, აქამდე გაჩეჩილაძე უკვე იყო მესამე, მეოთხე და მერვე მოწვევის პარლამენტის წევრი.

ენერგეტიკის ექსპერტი რევაზ არველაძე "ქართული ოცნების" სიის 33-ე ნომერია. 75 წლის დეპუტატი უხუცესია და შესაბამისად, ახალი მოწვევის პარლამენტის პირველ სხდომას (პარლამენტის თავმჯდომარის არჩევამდე), სწორედ ის გაუძღვება. ის უკვე იყო საქართველოს პარლამენტის წევრი 1999-2003 წლებში, საქართველოს მოქალაქეთა კავშირის სიით.

"ნაციონალური მოძრაობის" სიის პირველი ნომერი დავით ბაქრაძე უკვე იყო სამი მოწვევის პარლამენტის წევრი და მას მომავალ პარლამენტშიც ვიხილავთ.

მისი კოლეგა "ნაციონალური მოძრაობიდან" ხათუნა გოგორიშვილი, პარლამენტში ერთ-ერთი ყველაზე სტაჟიანია - გოგორიშვილი საქართველოს მე-6, მე-7, მე-8 მოწვევის პარლამენტის წევრი იყო. იგი "ნაციონალური მოძრაობის" სიის 23-ე ნომრად არის წარმოდგენილი და შესაბამისად, კიდევ ოთხ წელს ვიხილავთ პარლამენტში.

გოგორიშვილის მსგავსად, "რეკორდსმენი" დეპუტატია გიგი წერეთელიც - "ნაციონალური მოძრაობის" პროპორციულ სიაში 27-ე ნომერი, სამი მოწვევის პარლამენტის (1999, 2003, 2008) წევრია.

გიორგი კანდელაკი "ნაციონალური მოძრაობის" წევრი და პარტიული სიის მე-12 ნომერია. კანდელაკი ორი მოწვევის პარლამენტის წევრი იყო 2008-2016 წლებში და ახალ პარლამენტში უკვე მესამედ ვიხილავთ.

წელს პირველად შედის პარლამენტში "პატრიოტთა ალიანსი", თუმცა არა მისი ერთ-ერთი წევრი ადა მარშანია. იგი უკვე 4-ჯერ იყო საკანონმდებლო ორგანოს წევრი - მე-3, მე-4, მე-5 და მე-6 მოწვევის პარლამენტში.

თეა ბეჟიტაშვილი

AMBEBI.GE