ბათუმში მარკირებაგავლილმა პირებმა ხელზე მარკირების მიზეზად მანდარინის ჭამა დაასახელეს

პირებს, რომლებსაც ხმის მიცემა უნდოდათ, მაგრამ ხელზე მარკირება დაუფიქსირდათ, მიზეზად დაასახელეს ის, რომ ჭამეს მანდარინი, - ამის შესახებ ბათუმის 63-ე უბნის თავმჯდომარემ რამაზ სეფერთელაძემ განაცხადა.

ამ უბნის ნაკადის მომწესრიგებელმა 8-10 მარკირებაგავლილი ამომრჩეველი დააფიქსირა, რომლებიც მარკირების მიზეზად ციტრუსის კვალს ასახელებდნენ. რამაზ სეფერთელაძის თქმით, მოქალაქეები, რომლების "მანდარინს ადანაშაულებდნენ" უბანზე არ დაუშვეს.

"მანდარინს ჭიშკართან არიგებენ, თუ რა ხდებოდა არ ვიცი. ვისაც ჰქონდა მარკირება ხელზე, მიზეზად დაასახელა, რომ ჭამა მანდარინი. დაიბანეს ხელი, მაგრამ მაინც ჩანდა მარკირების კვალი. უარი ვუთხარით, არ მივაცემინეთ ხმა და განაწყენებული წავიდნენ. სამი ადამიანი ძალიან გაჯიუტდა, წინააღმდეგობა გაგვიწია, მათი პირადობების ქსეროასლები გადავიღეთ და გვაქვს საქმეში. მანდარინი ჩვენს წინააღმდეგ გამოიყვანეს", - აღნიშნა რამაზ სეფერთელაძემ.

მომხდართან დაკავშირებით უბანზე იმყოფებოდნენ "ქართული ოცნების" წევრები დავით ბაციკაძე და ნინო ჩხეტია და ასევე, ოლქის წარმომადგენელიც.