ვის გვარზე გადავიდა "ჩემი ცოლის დაქალების" ბაქარი და რატომ არ აირჩია მან პროფესიად მსახიობობა

"სტუდენტობა იყო ჩემი მიზანი და განვახორციელე", - ამბობს ბუბა, "ჩემი ცოლის დაქალების" ცნობილი გმირის (ბაქარი) როლის შემსრულებელი, რომელიც ახალ სეზონზე მაყურებელს, რეალურ ცხოვრებაში, უკვე არა მათნაძედ, არამედ მირცხულავად წარუდგა.

მოკლედ, სიახლეებია მისკენ, - ტექნიკური უნივერსიტეტის სტუდენტი გახდა და რატომ არ აირჩია სამომავლოდ მსახიობის პროფესია, ამას მისი ინტერვიუდან შეიტყობთ, აქვე იმასაც გაიგებთ, რატომ არის ის დღეს მათნაძის ნაცვლად მირცხულავა...

- გადაღებების პარალელურად, აბიტურიენტი რომ ვიყავი, იმ პერიოდში გადავწყვიტე, რომ საზოგადოებრივი ურთიერთობების ფაკულტეტზე ჩამებარებინა. ჰოდა, დატვირთული გრაფიკის ფონზე, როგორც შემეძლო, ვმეცადინეობდი. მინდოდა, მაქსიმალურად მეტი და მეტი გამეკეთებინა, რომ არც სწავლას შეშლოდა ხელი და არც - სამსახურს. გამოცდებზე არ ვთვლი, რომ ცუდი შედეგი მქონდა. მასწავლებლებთან სიარულს, გადაღებებს ვუთავსებდი და მაინც რაც მინდოდა, ის გავაკეთე, არც ოჯახია უკმაყოფილო.

- რა საგნების ჩააბარება მოგიხდა?

- უნარები, ქართული, ინგლისური და ისტორია...

- შენს დანახვაზე გამომცდელებს რა რეაქცია ჰქონდათ?

- ამისთვის დრო არ ჰქონდათ, თუმცა აბიტურიენტები კი იღებდნენ ჩემთან სურათებს, რაღაცებს მეკითხებოდნენ. მართლია გამოცდების გამო ძალიან ვნერვიულობდი, მაგრამ ვცდილობდი, ეს განცდები ჩემთვის არ შეემჩნიათ და კომუნიკაბელური ვიყავი.

- მთელი ბავშვობა თეატრალურ სტუდიაში დადიოდი და სერიალისთვისაც იქიდან გიპოვეს. დღეს ცნობილი პროექტის მსახიობი ხარ, ამიტომ მოსალოდნელი იყო, სამსახიობო ფაკულტეტზე ჩაგებარებინა, მაგრამ ასეთი არჩევანი არ გააკეთე. რატომ?

- მიმაჩნია, რომ მსახიობობა, უფრო მეორად პროფესიად გამომადგება, ვიდრე ძირითადად. სულ ვამბობ, რომ ეს საქმიანობა დამატებითი შემოსავლისთვის მექნება-მეთქი. თუ კიდევ ვინმეს რამეში დავჭირდები, დარწმუნებული ვარ, სამსახიობო განათლების გარეშეც დამიძახებს, ასე თუ ისე, იციან, ვინც ვარ და რა შემიძლია...

მოკლედ, ძირითად პროფესიად სხვა რამ ავირჩიე და მიმაჩნია, რომ ისიც ძალიან საინტერესოა. დიახ, მასში ძალების მოსინჯვის სურვილი გამიჩნდა. მაინტერესებს, როგორი პიარმენეჯერი ვიქნები, მომწონს საგნები, რაც უნდა ვისწავლო, საკმაოდ ღრმა სფეროა და ბევრი განხრა აქვს.

- სწავლას და სერიალში მსახიობობას მოასწრებ?

- უნდა მოვასწრო, სხვა გზა არ არის. ზოდიაქოს ნიშნით თხის რქა ვარ, ჯიუტობა და პრინციპულობა ამის გარეშეც არ მაკლია, თუმცა ეს ყველაფერი საქმეებში მეხმარება.

- სტუდიის პედაგოგმა, სადაც გაიზარდე, არჩევანი მოგიწონა?

- ყველას გული დაწყდა, თუმცა თითოეულს იმას ვეუბნები, რაც თქვენ გითხარით. დავაჯერე ადამიანები, რომ ჩემთვის კარგი გადაწყვეტილება მივიღე. გული კი დაწყდათ, რომ ამ მიმართულებით არ წავედი და შესაძლოა, ამ სფეროში მეტიც გამეკეთებინა, მაგრამ ზოგადად, ცხოვრებაში ბევრი რამ მაინტერესებს, სხვადასხვა სფეროში მინდა განვითარება.

- "ჩემი ცოლის დაქალების" გადამღები ჯგუფის წევრებმა რა გითხრეს?

- მათგან ზოგს გაუკვირდა, ზოგმა მითხრა, - კარგი ქენი, "თეატრალურზე" რომ არ ჩააბარე, მთელი ცხოვრება დაძაბული გრაფიკი გექნებოდაო. ვიღაცებმა მითხრეს, ჯობდა ჩაგებარებინაო. ყველას აზრი გასათვალისწინებელი იყო, დავფიქრდი და ბოლოს ისეთი გადაწყვეტილება მივიღე, რაც მივიღე.

- ისე, სერიალში შენს პერსონაჟს (ბაქარი), შოთიკო ნოზაძის (თენგო) გმირი იბრიყვებს, შეურაცხყოფს, მიუხედავად იმისა, რომ ისინი ბიზნესპარტნიორები არიან. რას იტყვი?

- სანამ ამ კითხვაზე გიპასუხებთ, გეტყვით, რომ შოთიკოსაც მოსწონს ჩემი არჩევანი, მეუბნება, რომ ყველამ ცხოვრებაში ის უნდა ვაკეთოთ, რაც გვინდა. ალბათ, ესმის ჩემი. რაც შეეხება თენგოს პერსონაჟს, ისეთია, როგორიც არის. ხომ არსებობენ ასეთი ადამიანები, უხეშობით რომ გამოხატავენ სიყვარულს, პატივისცემას. აქ ძალადობას არ ვგულისხმობ... თენგოსნაირებს ხუმრობა ასე ესმით, რადგანაც თვითონაც ასე ეფერებდნენ და ჰგონიათ, რომ ასეა სწორი. ბაქარი კი დედის კალთას ამოფარებული ბიჭია, რომელსაც მუდმივად თავზე დასჩხავიან, რაღაცას ასწავლიან. თუმცა, ბოლო დროს ცდილობს, ოჯახიდან დამოუკიდებელი გახდეს, თუმცა თენგოს მარწუხებში მაინც ექცევა...

- თვითონ შოთა როგორია ცხოვრებაში?

- თენგოსგან რადიკალურად განსხვავებული. კარგი ადამიანია, ვმეგობრობთ, ვძმაკაცობთ, მიყვარს და ვუყვარვარ.

- შენს პერსონაჟს (როგორც შოთიკოს) სცენარის მიხედვით, ბევრი ბილწი სიტყვა რომ ჰქონოდა სათქმელი, რას იზამდი?

- როცა რაღაცას აკეთებ და რეჟისორი დავალებას გაძლევს, უნდა შეასრულო, არ აქვს მნიშვნელობა, ბილწსიტყვაობა იქნება ეს, თუ ინტიმური სცენის თამაში. როცა სერიალში სათამაშოდ მიდიხარ, ისიც უნდა გათვალო, რომ ბევრი ისეთი რამის კეთება მოგიწევს, რაც პიროვნულად შენთვის შეიძლება უსიამოვნო, მაგრამ სცენისთვის და კადრისთვის აუცილებელი იყოს...

- ბუბა, მაყურებელმა მათნაძედ გაგიცნო, მაგრამ ახლა ხარ მირცხულავა. გვარი რატომ შეიცვალე?

- კი, შევიცვალე. გადავედი ჩემი ნახევარი და-ძმის გვარზე.

- უფროსი შვილი არ ხარ?

- დედაჩემის პირველი შვილი ვარ და ჩვეულებრივად, მამის გვარი მქონდა. მისი შეცვლა კი ბევრი ფიქრის შემდეგ, უკვე 18 წლისამ საჭიროდ ჩავთვალე, ასე გადავწყვიტე, ხომ ვამბობ, ამაზე მანამდეც ვფიქრობდი, მაგრამ აჩქარება არ მინდოდა და საბოლოოდ ასეთი ნაბიჯი გადავდგი.

- ე.ი. მირცხულავა დედის მეორე მეუღლის გვარია, ხომ?

- კი.

- როგორ ჩანს, იმ ადამიანს შენს აღზრდაში წვლილი მიუძღვის.

- დიახ, მთლიანი წვლილი მას მიუძღვის...

- ახლა ასეთ ცნობილ სტუდენტს გამოცდები როდის გეწყება?

- 10 ოქტომბერს, თუმცა მანამდე სერიალზე თავდაუზოგავად ვმუშაობ, რომ მაყურებელმა გვიყუროს, ობიექტურად შეგვაფასოს და ისიამოვნოს.

ლალი ფაცია

AMBEBI.GE