მიხეილ სააკაშვილი - თუ ივანიშვილი საქართველოს დაუდგება წინ, ეს იგივეა, რომ გაქანებულ მატარებელს დაუდგეს წინ და მაშინ მატარებელი მაინც გაივლის, ივანიშვილი კი დარჩება რელსებზე

თუ ივანიშვლი საქართველოს დაუდგება წინ, ეს იგივეა, რომ გაქანებულ მატარებელს დაუდგეს წინ და მაშინ მატარებელი მაინც გაივლის, ივანიშვილი კი დარჩება რელსებზე, - ამის შესახებ საქართველოს ექსპრეზიდენტმა მიხეილ სააკაშვილმა განაცხადა, რომელმაც ბათუმში ბულვარის კოლონადებთან შეკრებილ მხარდამჭერებს სატელეფონო ზარით მიმართა.

მიხეილ სააკაშვილი ბათუმელებს შეჰპირდა, რომ როგორც დღეს ბათუმში წვიმიანი ამინდი შეიცვალა, ასევე "ბოლო ოთხი წლის უბედურება დაპაუზდება და ყველაფერი უკან დარჩება, როგორც ბნელ კოშმარად". მისი თქმით, ერთადერთი გზა ქვეყნის განვითარებისთვის არის წინსვლა, პროგრესი, აღმშენებლობა.

"მინდა მოგესალმოთ ყველას და ძალიან მიხარია, რომ ამდენი ვართ. დაინახოს მტერმაც, რომ ძალიან ბევრნი ვართ და ვერაფერი დაგვიდგება წინ. ჩემო მეგობრებო, როგორც ვიცი, დილიდან წვიმდა ბათუმში, შემდეგ ეს ღრუბლები გადაიშალა, ამინდი გამოვიდა და წვიმა შეწყდა. ასევე, ბოლო ოთხი წლის უბედურება დაპაუზდება, ყველაფერი უკან დარჩება, როგორც ბნელ კოშმარად, რომლის გახსენებაც აღარ მოგვინდება, იმიტომ, რომ ბათუმში, აჭარაში და საქართველოში ყოველთვის უნდა ვიაროთ წინ, უკანსვლის გარეშე", - აღნიშნა მიხელ სააკაშვილმა.

როგორც მიხეილ სააკაშვილმა ექსპრემიერ ბიძინა ივანიშვილის კრიტიკის დროს განაცხადა, ამჯერად ვერავინ შეძლებს გაყალბებას.

"ჩემო მეგობრებო, ივანიშვილი ბოლო ხრიკებს მიმართავს. თქვენ ნახეთ, როგორ რთულ მდგომარეობაშია, ამ დიდი კულტურის კუთხეში ათასგვარ სისულელეს იძახის, ცდილობს ხალხის დაშინებას. მინდა გითხრათ, ვერავის შეაშინებს, ვერ გააყალბებს, ვერავის ამჯერად ვერ გააბრიყვებს, ვერავის წინ ვერ დაუდგება, საქართველოს წინ ვერ დაუდგება, იმიტომ, რომ თუ ივანიშვლი საქართველოს დაუდგება წინ, ეს იგივეა, რომ გაქანებულ მატარებელს დაუდგეს წინ და მაშინ მატარებელი მაინც გაივლის და ივანიშვილი დარჩება რელსებზე", - აღნიშნა მიხეილ სააკაშვილმა და კოლონადებთან შეკრებილ ადგილობრივებს მხარდაჭერისთვის მადლობა გადაუხადა.