პაატა ბურჭულაძე - უბრალოდ ნიკა გვარამიას დაწყნარება და დამშვიდება მინდოდა

უბრალოდ ნიკა გვარამიას დაწყნარება და დამშვიდება მინდოდა, - ასე პასუხობს მოძრაობა "სახელმწიფო ხალხისთვის" ლიდერი პაატა ბურჭულაძე გაზეთ "კვირის პალიტრის" შეკითხვას "რუსთავი 2"-ის გენერალურ დირექტორთან სატელეფონო საუბრის შესახებ.

"თუ ადამიანს ზრდილობიანად ვესაუბრები, სულაც არ ნიშნავს, რომ მასზე დაქვემდებარებული ვარ, ან მის წინაშე თავს ანგარიშვალდებულად მივიჩნევ. უბრალოდ მისი დაწყნარება და დამშვიდება მინდოდა. გვარამიას დიდი ხანია ვიცნობ, "რუსთავი 2" ფონდ "იავნანას" წლების განმავლობაში ეხმარებოდა, ნიკასაც ამ ფონდის განვითარებაში დიდი წვლილი მიუძღვის - ასე რომ, ძალიან აღშფოთებული იყო, მინდოდა, ყველაფერი დეტალურად გამერკვია. ის ნამდვილად არ მოელოდა, რომ ჩვენი გუნდიდან ვინმეს მსგავსი განცხადების გაკეთება შეეძლო", - განაცხადა პაატა ბურჭულაძემ.

მისივე თქმით, ჩანაწერი ისე იყო დამონტაჟებული, რომ მთავრობის რიტორიკას -ერთი-ერთში იმეორებს, ამიტომ პარტიის ლიდერი გამორიცხავს, რომ აუდიო-ჩანაწერი ნიკა გვარამიას გამოექვეყნებინა.

რაც შეეხება კითხვას იმის შესახებ, თუ რამდენად ხშირი კონტაქტი აქვს ნიკა გვარამიასთან, პაატა ბურჭულაძე პასუხობს, რომ "იშვიათად, მაგრამ ყოველთვის მშვიდად ესაუბრება".

"ყურადღება მიაქციეთ, ჩვენ ერთმანეთთან თქვენობით ვსაუბრობთ, უბრალოდ თავადაც გაკვირვებული ვიყავი, რადგან ნიკასგან მსგავსი აღშფოთებული დიალოგი არ მომისმენია", - აღნიშნა ბურჭულაძემ.

რამდენიმე დღის წინ ნიკა გვარამისა და პაატა ბურჭულაძის სატელეფონო საუბრის ფარული ჩანაწერი გამოქვეყნდა.