რომელ სკოლებში შევიდნენ და რა ემოციებით შეხვდნენ ახალ სასწავლო წელს ცნობილი ქართველების შვილები

ახალი სასწავლო წელი უკვე დაიწყო, ბევრი პატარა სკოლაში პირველად სწორედ წელს წავიდა. მათ შორის ცნობილი ადამიანების შვილებიც. რა ემოციებით შეხვდნენ ცხოვრების ახალ ეტაპზე გადასვლას პატარები და როგორ ემზადებოდნენ ამ დღისთვის, ამის შესახებ მათი მშობლებისგან შეიტყობთ.

პირველ ექსპერიმენტალურ სკოლაში შეიყვანა ტელეწამყვანმა ანი გიუნეტრმა საკუთარი ქალიშვილი - მაშო.

- ძალიან მომწონს ეს სკოლა, ნოვატორული და ლოიალური მიდგომა აქვთ, როგორც სწავლის მეთოდის, ასევე ბავშვების მიმართ. შექების, წახალისების და მეგობრული გარემოს პრინციპი მოქმედებს ამ სკოლაში, რაც მოსწავლისთვის მნიშვნელოვანია. სტრესი, რომ მოგვეხსნა შევკერეთ კაბა, რომელზეც საკუთარი დაბადების თარიღი და წელი არეულად დაწერა მაშომ, აინტერესებდა მისი კლასელები გამოიცნობდნენ თუ არა. უბედნიერესია იმით, რომ ლეპტოპი მისცეს. ეგრევე დაურეკა მამას, უთხრა ყველაფერი კარგად გავაკეთე და ახალი აიფონი მიყიდეო. არასდროს ჰქონია ამის სურვილი აქამდე. მე ვინერვიულე, რადგან პირდაპირი ჩართვა მქონდა სკოლიდან, ტექნიკური ხარვეზის გამო, მასწავლებელი და დირექტორი სკაიპით ჩაერთო ეთერში. რაც მგონი პირველად მოხდა.

ედუარდ შევარდნაძის შვილთაშვილი, ედუჩი წელს სკოლაში პირველად წავიდა. ედუჩის შესახებ, ლაშა შევარდნაძე გვესაუბრა.

- ჩემი უფროსი ბიჭი ედუჩი წელს კავკასიის ფრანგული სკოლის პირველ კლასში შევიდა.

სამწლიანი მოსამზადებელი პერიოდიც (ასე ვთქვათ, ბაღის სახით) ამავე სკოლაში გაატარა.

ეს სამი წელი 9 საათიდან - 4 საათამდე ჰქონდა ხოლმე სწავლის პერიოდი, ანუ იგივე გრაფიკი როგორც სკოლაში იქნება ახლა.

ჩემი მეორე შვილი ალექსანდრე იგივე მოსამზადებელი პერიოდს გადის იგივე სკოლაში.

თუ რატომ გავაკეთე ამ სკოლაზე არჩევანი, უპირველეს ყოვლისა იმიტომ, რომ ძალიან კარგი და მოწესრიგებული სკოლაა, ძალიან კარგი მასწავლებლებით. გარემოც შესაბამისად კარგია.

მეორე იმიტომ რომ მინდა მიიღონ იგივე ფრანგული განათლება, რაც მე თავის დროზე მივიღე, ამასთანავე, არ მინდა რომ იმ ქვეყანას ჩამორჩეს, სადაც დაიბადა. უნდა აღვნიშნო, რომ ბავშვებს ქართული გაკვეთილებიც უტარდებათ და ძალიან მაღალ დონეზე.

კავკასიის ფრანგული სკოლის პროგრამა საფრანგეთის განათლების სამინისტროდან იმართება, ხოლო თვითონ სკოლა საფრანგეთის საელჩოს პატრონაჟის ქვეშ იმყოფება.

რომ შევაჯამოთ, ბავშვი იღებს ფრანგულ განათლებას საქართველოში, მაგრა მთლიანობაში ის მაინც ფრანგულ-ქართული განათლება იქნება.

პირველად წავიდა სკოლაში "ქრონიკის" წამყვანის თამთა გაზაშვილის 6 წლის ქალიშვილი. ტასო სკოლაში დედამ და მამამ მიიყვანა.

- ტასიკო ოქტომბერში 7 წლის ხდება, შესაბამისად უკვე ერთი წელია ვემზადებით სკოლისთვის. შარშან კანონმა არ მოგვცა სკოლაში შევლის საშუალება, ამიტომ pre scool-ში დადიოდა და უფრო მომზადებული წავიდა სკოლაში. პირველი ექსპერიმენტალურ სკოლასთან ვცხოვრობ, ამიტომ საჯარო სკოლაზე გავაკეთე არჩევანი, ძალიან კარგად ახასიათებენ ამ სკოლას, შესაბამისად დიდი კონკურენცია იყო და ძლივს მოვხვდით. მე ვფიქრობ მალე დამეგობრდებიან ტასიკო და მისი კლასელები, რადგან უკვე დიდები არიან, დღეს ერთმანეთს აკვირდებოდნენ, საყვარელი სანახავები იყვნენ. ჩვენს დროს თუ ყველა ბავშვი ტიროდა პირველ დღეს სკოლაში, ახლა ასე ნამდვილად არ იყო.

ლევან გვაზავას და ნინო ორდენიძის უმცროსი ქალიშვილი მაშო, სკოლაში პირველად ხვალ წავა. ის იმ სკოლაში ისწავლის, სადაც მისი უფროსი და, დოდოშკა სწავლობს.

- მაშო წელს პირველად მიდის სკოლაში, წმინდა გიორგის სახელობის სკოლა შევარჩიეთ, რომელიც ფაქტიურად ჩემი სახლის ეზოშია. კომფორტულია, როცა სკოლა ახლოს არის სახლთან. ძალიან ემზადება მაშო სკოლისთვის, ჩანთა და ფორმა ძალიან მოსწონს. რემონტი იყო მაშოს სკოლაში, ამიტომ სწავლას ხვალ ვიწყებთ. იცის ლექსები, ასოებს არჩევს, მაგრამ წინასწარ არ მომიმზადებია. სპეციალისტებმა მირჩიეს, ჯობია სკოლაში აითვისოს ყველაფერი. თვითონ დიდი შემართებით არის და ვნახოთ რას იზამს.

კერძო სკოლაში მიიყვანა შვილი, მუსიკოსმა თამუნა ლეკვეიშვილმა. პატარა ნინიმ უკვე ახალი მეგობრები შეიძინა.

- ნიუტონის თავისუფალ სკოლაში შევიყვანე ნინი, ბევრი მიზეზის გამო მომწონს ეს სკოლა. განსაკუთრებით სწავლის მეთოდი, ბავშვებთან მიდგოა და თავისუფლება მიზიდავს. სხვა სკოლაზე არც მიფიქრია. გუშინ იყო ამ სკოლის გახსნა, სადაც ჩემმა შვილმა მომავალი კლასელები და მასწავლებლები გაიცნო. დღეს ძალიან ადრე გაიღვიძა, უნდოდა მისი მეგობრების და მასწავლებლების ნახვა.

პირველად წავიდა სკოლაში რეპერ ძვალის ქალიშვილი მია. გოგონა სკოლაში მამამ მიიყვანა.

- მია 53-ე სკოლაში მივიყვანე, ახლოს ვცხოვრობთ აქ, კარგი სკოლაა და ამიტომ მივიღე ეს გადაწყვეტილება. დიდი კონკურენცია იყო ამ სკოლაში მოსახვედრად, ამიტომ მთელი ღამე გავათენე, სკოლაში რომ დამერეგისტრირებინა ბავშვი და ზუსტად ათის ერთ წუთზე დავარეგისტრირე. სკოლაში თავის ბაღელები ნახა და ძალიან გახარებული იყო. კომპიუტერი აჩუქეს, ჭკუაზე არ არის. ორი საათით დავტოვე სკოლაში და როცა მივაკითხე აღარ მომყვებოდა. გუშინ მთელი დღე მაღაზიებში დავდიოდით, გვინდოდა რაღაცეები გვეყიდა, ბევრი ვერაფერი ვნახეთ, მაგრამ... ყოველდღე მე მომიწევს მიას ტარებას სკოლაში, ამიტომ რეჟიმში ჩავდგები და 8 საათზე მე ვატარებ სკოლაში.

თამარ ბოჭორიშვილი

AMBEBI.GE