ყიფშიძის ქუჩაზე დაჭრილი მამაკაცი საავადმყოფოში გარდაიცვალა

პროფილაქტიკის თანამშრომელი, რომელიც ცოტა ხნის წინ ყიფშიძის ქუჩაზე დაჭრეს, გარდაიცვალა. ამის შესახებ "ინტერპრესნიუსს" შინაგან საქმეთა სამინისტროში განუცხადეს.

აღნიშნული პირი საავადმყოფოში იყო გადაყვანილი და გადაუდებელი ოპერაცია უტარდებოდა, თუმცა მისი გადარჩენა ვერ მოხერხდა.

ამასთან, შსს-ს მიერ გავრცელებული პირველადი ინფორმაციით, შემთხვევა "ყოფით ნიადაგზე დაწყებულ კონფლიქტს" მოჰყვა, რის შედეგადაც კლიენტმა პროფილაქტიკის თანამშრომელს ესროლა.

ერთ-ერთი თვითმხილველის თქმით, კლიენტმა ცეცხლი მას შემდეგ გახსნა, რაც პროფილაქტიკის თანამშრომელმა მოუცლელობის მიზეზით ავტომანქანის დიაგნოსტიკისთვის დალოდება სთხოვა.

"უთხრა, ჯერ არ მცალია, ბევრი მანქანა მაქვს გასაკეთებელი, დამელოდე და გაგიკეთებო, რის შემდეგაც, ამ ადამიანმა მანქანიდან ავტომატი ამოიღო და ესროლა", - აღნიშნავენ პროფილაქტიკის თანამშრომლები.