"ბიზნესდაჯილდოება 2016" - "თიბისი ბანკისა" და "ჯეოსელის" ერთობლივი პროექტი, რომელმაც დამწყებ ბიზნესმენებს ერთად მოუყარა თავი

"გააზიარე წარმატება" - ეს არის სლოგანი ყველაზე მასშტაბური ბიზნესდაჯილდოების, რომელიც საქართველოში თიბისი ბანკმა "ჯეოსელთან" ერთად წარმოადგინა. პროექტმა, რომლის მთავარი მიზანი მცირე და საშუალო ბიზნესის განვითარებაა, უამრავ ახალგაზრდა, დამწყებ ბიზნესმენს მოუყარა თავი.

პროექტის ორგანიზატორების თქმით, ბიზნესდაჯიდლოება მიზნად ისახავს წაახალისოს წარმატებული ბიზნესმენები და მისცეს მათ მოტივაცია, რომ კიდევ უფრო მეტს მიაღწიონ; ხოლო, მეორეს მხრივ, სხვებს მიეცეთ სტიმული და ინსპირაცია, რომ გამოიყენონ ქვეყანაში არსებული მრავალფეროვანი შესაძლებლობები და განავითარონ თავიანთი ბიზნესი.

თიბისი ბანკისა და ჯეოსელის ერთობლივ პროექტში "ბიზნესდაჯიდლოება 2016" მონაწილეობის მისაღებად 523 კომპანია დარეგისტრირდა. ფინალისტები უახლოეს დღეებში დასახელდება, გამარჯვებულების დაჯილდოების ცერემონია კი ნოემბერში გაიმართება.

გამარჯვებულები ექვს ნომინაციაში გამოვლინდებიან - "ხალხის რჩეული", "ინოვაციური ბიზნესი", "ტურისტული ბიზნესი", "მცირე ბიზნესი", "აგრობიზნესი", "ქართული პროდუქტი". ყველა გამარჯვებული ცნობილი ქართველი დიზაინერის, ზვიად ციკოლიას სპეციალურად ამ პროექტისთვის შექმნილ სიმბოლურ პრიზს მიიღებს.

ერთ სივრცეში, ერთი მიზნისთვის გაერთიანებული "ბიზნესდაჯილდოება 2016"-ის მონაწილეები 2 სექტემბერს სასტუმრო "რუმსის" ეზოში თიბისი ბანკმა შეკრიბა.

"ბიზნესდაჯიდლოება 2016"-ის ორგანიზატორების თქმით, პროექტი ხელს უწყობს დამწყებ ბიზნესმენებსა და არა მარტო მათ, განავითარონ თავიანთი ბიზნესი, მიაღწიონ წარმატებას და ეს წარმატება სხვებს გაუზიარონ.

ნიკა ქურდიანი, თიბისი ბანკის გენერალური დირექტორის მოადგილე: "გვინდა, რომ ბიზნესის პოპულარიზაცია მოვახდინოთ. ახლა არა, მაგრამ წლების წინ, საქართველოში ხალხს ეგონა, რომ ბიზნესის კეთება არ არის პოპულარული, ჩვენ კიდევ პირიქით, გგვონია, რომ ქვეყნის განვითარების ერთ-ერთი ძალა არის მცირე, საშუალო ბიზნესი და ყველა ინიციატივა, რომელიც ქვეყნის ეკონომიკას რაღაცნაირად ძალას შემატებს.

"ჩვენი მიზანია წარმატების პოპულარიზაცია, რომ წარმატების მიღწევა შესაძლებელია, ვაკეთოთ ერთად მაგარი საქმე ქვეყნის ეკონომიკისთვის. სწორედ ამის გამო გვქონდა შუალედური შეკრება, სადაც მოვიწვიეთ ყველა, 523 მონაწილე კომპანია თავისი გუნდის წევრებთან ერთად. 6 ნომინაციიდან, ერთი ძალიან საინტერესო ნომინაციაა, "ხალხის რჩეული", რომლის გამარჯვებული სოციალურ ქსელ "ფეისბუქში" საჯარო ხმის მიცემის პრინციპით გამოვლინდება.

"მინდა აღვნიშნო ერთი მნიშვნელოვანი დეტალი, რადგან ჩვენ არც ფულადი ჯილდო გვაქვს დაწესებული და არც რამე განსაკუთრებული პრიზი, გვაქვს სიმბოლური საჩუქარი, რომელიც ქართველმა დიზაინერმა, ზვიად ციკოლიამ გააკეთა. ამ ყველაფერში მთავარი არ არის გამარჯვება, მთავარია, რომ შემოქმედი ადამიანები გავერთიანდით და კარგ საქმეს ვაკეთებთ.

პაველ სმალინსკი, ჯეოსელის გენერალური დირექტორი: "მინდა აღვნიშნო, თუ რაოდენ სასიხარულოა, რომ ამდენი კომპანია იღებს მონაწილეობას. ძალიან მნიშვნელოვანია, ამ წარმატების აღიარება და სხვებისთვის გაზიარება, ეს სხვებისთვის კიდევ უფრო მეტი მოტივაციის საწინდარია, ამდენად ჩვენი ინიციატივა ძალიან მნიშვნელოვანია.

ამ პროექტში, მონაწილეობის მიღების მომენტიდან უკვე ყველა გამარჯვებულია. განსაკუთრებით მოხარული ვარ, რომ 6 ნომინაციიდან ერთ-ერთი არის "წლის ინოვაციური ბიზნესი", ჩვენ დავაჯილდოვებთ ამ ნომინაციის გამარჯვებულს. ჩვენთვის, როგორც ტექნოლოგიურ პროგრესზე ორიენტირებული კომპანიისთვის, ინოვაციების თემა ყველაზე მნიშვნელოვანია.

მამუკა ხაზარაძე, თიბისი ბანკის სამეთვალყურეო საბჭოს თავმჯდომარე: "ეს არის უნიკალური პროექტი იმ გაგებით, რომ ერთ სივცეში შეიკრიბა დაახლოებით 600 მეწარმე, ადამიანები, რომლებმაც ნოლიდან შექმნეს თავიანთი ბიზნესი, ანუ იდეიდან შექმნეს კომპანიები, რომლებიც წარმოების სფეროში მოღვაწეობენ. მინდა გითხრათ, რომ ეს ადამიანები ქმნიან მილიარდ ნახევრიან ბრუნვას ქართულ ეკონომიკაში.

თვითონ ის ფაქტი, რომ ისინი შეიკრიბნენ და ამ ადამიანების ერთად ყოფნა აბსოლუტურად ახალი მიმართულების გაჩენის საფუძველს ქმნის იმიტომ, რომ მეწარმეობა არ ვითარდება ჩაკეტილ სივრცეში, ეს ადამიანები უნდა იყვნენ ერთმანეთთან კავშირში და სწორედ ასეთი ღონისძიება იძლევა საშუალებას, მოხდეს ახალი იდეების გენერირება. თიბისი ბანკი ვალდებულებას იღებს ასეთ ადამიანებს მხარი დაუჭიროს იმიტომ, რომ საქართველოს მომავალი ასეთი ადამიანების ხელშია.

სოფო ფილიევი, "აქსა მედიქალის" წარმომადგენელი, "ბიზნესდაჯიდლოება 2016"-ის მონაწილე: "ჩვენი კლინიკა დაფუძნებულია ბრიტანული ჯანდაცვის მოდელზე. ჩვენთვის პრიორიტეტულია პირველადი ჯანდაცვის უზრუნველყოფა, რაც მთავარია ზრუნვა პაციენტების ჯანმრთელობაზე და ქვეყანაში დანერგილი ინოვაციური სტანდარტების მკაცრი კონტროლი. ჩვენთვის ძალიან მნიშვნელოვანია ამ პროექტში მონაწილეობა და მონაწილეობის მიზანი არის ის, რომ ჩვენი წარმატება სხვებმაც გაიგონ. მათაც მიეცეთ მოტივაცია და კარგი საქმე აკეთონ.

თეა ბეჟიტაშვილი

AMBEBI.GE