ვაკეში მომხდარი სროლის დროს დაჭრილი ადვოკატი ზაქარია ჩიბუხაშვილია

ვაკეში მომხდარი შეიარაღებული თავდასხმის დროს დაჭრილი პირი ადვოკატი ზაქარია ჩიბუხაშვილია. ამის შესახებ "ინტერპრესნიუსს" "ადვოკატთა ასოციაციის" თავმჯდომარე ზაზა ხატიაშვილმა განუცხადა, რომელიც რესპუბლიკურ საავადმყოფოში იმყოფება.

"სამწუხარო ფაქტია, რომ ადვოკატზე მოხდა თავდასხმა. მას აქვს ცეცხლსასროლი დაზიანება. მისი მდგომარეობა მძიმეა. მე შევხვდი კლინიკის დირექტორს. დარწმუნებული ვარ, ექიმები ყველაფერს გააკეთებენ, რომ ადვოკატის სიცოცხლე გადაარჩინონ, ხოლო შემდეგ გამოძიება გაარკვევს, თუ რა მოხდა. მე როგორც "ადვოკატთა ასოციაციის" თავმჯდომარე, ვიბრძოლებ, რომ უმკაცრესად იყოს დასჯილი ყველა ის პირი, ვინც ადვოკატის სიცოცხლესა და ჯანმრთელობას შეუქმნა საფრთხე", - განაცხადა ხატიაშვილმა.

მისივე შეფასებით, მომხდარი ნიშნავს, რომ ქვეყანაში მოქალაქეები დაუცველები არიან.

დაჭრილ ადვოკატს რესპუბლიკურ საავადმყოფოში შესაბამისი მკურნალობა უტარდება. ის მხრისა და გულ-მკერდის არეშია დაჭრილი.

შინაგან საქმეთა სამინისტრომ ვაკეში მომხდარ მკვლელობაში ეჭვმიტანილი უკვე დააკავა. შეიარაღებული თავდასხმის დროს დაიღუპა სოსო ჯოხაძე.