"თქვენით ვამაყობთ!" - შეძახილები და ზღვა ემოცია აეროპორტში ქართველი ოლიმპიელების დახვედრაზე

"თქვენით ვამაყობთ!"; "ლაშა - საჩხერის სიამაყე"; "ოქროს ბიჭები" - ხმაურიანი შეძახილები, პლაკატები ოლიმპიელების გამოსახულებით და ზღვა ემოცია - ასე დახვდნენ რიოს ოლიმპიადიდან სამშობლოში დაბრუნებულ ოლიმპიელებს თბილისის აეროპორტში.

ოლიმპიური დელეგაციის წევრებსა და სპორტსმენებს საქართველოს სხვადასხვა რეგიონიდან ჩამოსული ასამდე გულშემატკივარი დახვდა.

"მინდა მადლობა გადავუხადო ყველა იმ ადამიანს, ვინც ამ დროის განმავლობაში გვგულშემატკივრობდა, ვისაც ჩვენს შესაძლებლობებში ეჭვი არ შეეპარა. ეს გამარჯვება არის თითოეული ჩვენგანის და მთელი საქართველოსი. ემოციები დღეს უფრო მეტად გვაქვს მოჭარბებული და ამდენი ადამიანის აქ ყოფნა ჩვენთვის დიდი ბედნიერებაა", - განაცხადა ოქროს მედალოსანმა ლაშა ტალახაძემ.

დაათვალიერეთ ფოტოგალერეა

საქართველოს ოლიმპიურმა დელეგაციამ ზაფხულის XXXI ოლიმპიურ თამაშებზე ჯამში 7 მედალი - 2 ოქრო, 1 ვერცხლი და 4 ბრინჯაო მოიპოვა, მედლების ხარისხით კი 206 ქვეყანას შორის 38-ე ადგილი დაიკავა. ოლიმპიური ჩემპიონები ლაშა ტალახაძე (ძალოსნობა) და ვლადიმერ ხინჩეგაშვილი (თავისუფალი ჭიდაობა) გახდნენ, ვერცხლის მედალი ვარლამ ლიპარტელიანმა (ძიუდო), ბრინჯაოს მედლები კი ლაშა შავდათუაშვილმა (ძიუდო), შმაგი ბოლქვაძემ (ბერძნულ-რომაული ჭიდაობა), ირაკლი თურმანიძემ (ძალოსნობა) და გენო პეტრიაშვილმა (თავისუფალი ჭიდაობა) მოიპოვეს.