ქართველი დიჯეი, რომელიც კრისტინა აგილერამ მის კონცერტამდე ქართველი მსმენელის "გასახურებლად" აარჩია

კლუბური გართობა ხარისხიანი მუსიკის გარეშე წარმოუდგენელია, წინა წლებთან შედარებით ამ მხრივ არსებული მდგომარეობა ნამდვილად დაიხვეწა, რაშიც წვლილი ქართველ პრომოუტერებს და მუსიკალურ დიჯეებს შეაქვთ.

ლევან მდინარაძეს, იგივე DJ Rembo-ს მუსიკალურ წრეებში კარგად იცნობენ და მის მიერ, ორგანიზებული საღამოები და მუსიკა გართობის ერთ-ერთი საუკეთესო საშუალებაა. მისი ნიჭიერება არც უცხოელებს დარჩენიათ შეუმჩნეველი და 30 ივლისს კრისტინა აგილერას მოსასმენად შეკრებილი მსმენელის გართობაზე წინასწარ სწორედ DJ Rembo-მ იზრუნა.

- ქრისტინა აგილერას ჯგუფს, მოთხოვნა ჰქონდა რომ დიჯეი ყოფილიყო შოუს "warm up"-ზე, თუმცა ვისთანაც იყვნენ შეთანხმებული იმ დიჯეიმ საქართველოში ჩამოსვლა ვერ მოახერხა. კონცერტამდე 5 დღით ადრე დამირეკეს მე, მოთხოვნა ჰქონდათ ასეთი, რომ დიჯეის დაეკრა პაპსა, ამ სფეროში 5-წლიანი სტაჟი უნდა ჰქონოდა და ხალხი ძალიან არ "გაეხურებინა". კონცერტამდე ერთი დღით ადრე ჩამოვიდა კრისტინა აგილერას მენეჯერი, გვქონდა გასაუბრება, ვაჩვენე მომზადებული ტრეკები და ასე აღმოვჩნდი აგილერას "warm up"-ზე. წინა ღამით კრისტინა აგილერას ჯგუფი დავპატიჟე ჩემს ივენთზე და იქაც მომისმინეს. ისეთი შეგრძნება მქონდა თითქოს პირველად ვუკრავდი. კარგი ის იყო, რომ ჩემს გამოჩენას დიდი გამოხმაურება მოჰყვა და ერთ საათში სამი სხვადასხვა ტიპის შეკვეთა მივიღე. "Black Sea Arena-ს გახსნა გავაკეთე, უკვე გავლილი მაქვს რაღაც ეტაპი და ეს ჩემი კარიერისთვის ძალიან მაგარია. ჩემს გარდა რამდენიმე დიჯეი შესთავაზეს და ჩემზე შეაჩერეს არჩევანი.

- თვითონ აგილერას თუ შეხვდი?

- კრისტინას არ შევხვედრივარ, უბრალოდ რეპეტიციაზე ვიყავი, მისი ახლოდან ნახვის ბედნიერება მქონდა.

- რას საქმიანობ ამჯერად...

- ბათუმში მენეჯმენტით აღებული მაქვს რამდენიმე კლუბი, დიჯეებიც ჩამომყავს, ელექტრონულ მუსიკას არ ვეხები, პაპსას ვაკეთებ, ელექტრონულ მუსიკას კონკურენციას არ ვუწევ. ასევე მაქვს ჩემი ივენთ კომპანია, რომელიც სხვადასხვა სახის ღონსძიებებს უწევს ორგანიზებას, მათ შორის ქორწილებს. ერთი წელია რაც ჩამოვაყალიბე ეს კომპანია. გართობას რაც ეხება ყველაფერს ვუწევ ორგანიზებას. ახლა ბათუმში ვარ და სექტემბრიდან თბილისში გავაგრძელებთ საქმიანობას.

- მუშაობისას გამოირჩევი იმით, რომ სხვა მუსიკოსებსაც აძლევ აუდიტორიის წინაშე გამოსვლის საშუალებას და უპირატესობას ანიჭებ ქართველებს, რატომ აკეთებ არჩევანს ქართველებზე?

- მიყვარს ქართველები ფულს რომ შოულობენ. ქართველ არტისტებს არ აქვთ საშუალება ხშირად დაუკრან 1000 კაციანი მსმენელის წინაშე, თბილისში ასეთი სივრცე არ არის, რასაც ვერ ვიტყვით ბათუმზე. არის კარგი ქართული ბენდები, რომელსაც განვითარებისთვის სჭირდება 1000 კაციან აუდიტორიაში კონცერტის ჩატარება, მათ ჰონორარსაც უფრო ბევრს ვუხდი. სეზონზე დაახლოებით 15 000 ან 20 000-ს.

- დიდი ხანია რაც ამ სფეროში ხარ, დაიხვეწა ქართველების მუსიკალური გემოვნება?

- ადრე სულერთი იყო სად წავიდოდნენ, ახლა კი დიდი არჩევანი აქვთ. ვისაც ელექტრონული მუსიკა უყვარს სხვაგან წავა, პაპსა ვისაც უყვარს ჩემს ივენთზე მოვა და ა.შ. კარგი გართობა ვისაც უნდა, ზედმეტი საშუალებების გარეშე ყველას ვეპატიჟები "სექტორში" ან "სოჰოში" მოვიდეს.

თამარ ბოჭორიშვილი

AMBEBI.GE