მაშველებმა სარფის სანაპიროზე შტორმის დროს 16 ადამიანი გადაარჩინეს

აჭარაში, ზღვის სანაპიროზე დღეს 4-დან 4,5 ბალამდე შტორმი დაფიქსირდა.

ბათუმში დილიდან ძლიერი წვიმაა, უხვი ნალექის შედეგად დაიტბორა ჭაობის დასახლების ზოგიერთი ქუჩა და ცენტრალური ქუჩების ნაწილი.

როგორც შინაგან საქმეთა სამინისტროში აცხადებენ, საგანგებო სიტუაციების მართვის სააგენტოს მაშველებმა ბათუმში, ძლიერი, უხვის ნალექის გამო დატბორილი ქუჩებიდან და საცხოვრებელი სახლებიდან წყლის ამოტუმბვითი სამუშოები განახორციელეს.

შსს-ს მეხანძრე-მაშველებმა საგანგებო სიტუაციების მართვის სააგენტოს ოპერატიული მართვის ცენტრში შემოსულ 60-მდე შეტყობინებაზე მოახდინეს მყისიერი რეაგირება.

მწვანე კონცხსა და სარფის სანაპირო ზოლზე, ძლიერი შტორმის დროს, შსს-ს მაშველებმა 16 ადამიანი გადაარჩინეს, მათ შორის იყვნენ უცხოელი ტურისტებიც.