მაგდა პაპიძის ადვოკატები ნაფიცი მსაჯულების მიერ გამოტანილი ვერდიქტის გაუქმებას მოითხოვენ

მეუღლისა და შვილის მკვლელობისთვის მსჯავრდებული მაგდა პაპიძის საქმე შესაძლოა საქალაქო სასამართლოში ხელახალი განხილვისთვის დაბრუნდეს. აღნიშნული მოთხოვნით სააპელაციო სასამართლოს თავად მსჯავრდებულმა და მისმა ადვოკატებმა მიმართეს. გარდა სასჯელის ვადის შეცვლის მოთხოვნისა, ადვოკატები ითხოვენ, რომ ნაფიცი მსაჯულების მიერ გამოტანილი ვერდიქტი გაუქმდეს და საქმეზე ხელახალი სასამართლო განხილვები, ახალი ნაფიცი მსაჯულების მონაწილეობით ჩატარდეს.

"პრაქტიკულად სააპელაციო სასამართლოში შეტანილი სარჩელით ვითხოვთ, რომ დაბრუნდეს საქმე საქალაქო სასამართლოში, ახალი ნაფიცი მსაჯულები იქნენ მოწვეულები და ხელახლა მოხდეს მისი განხილვა", - აღნიშნა მარიკა ფხალაძემ.

როგორც მეუღლისა და შვილის მკვლელობისთვის მსჯავრდებულის ადვოკატი მარიკა ფხალაძე აღნიშნავს, 4 ივლისს ნაფიცმა მსაჯულებმა ვერდიქტი საპროცესო კანონმდებლობის დარღვევით გამოიტანეს და მოსამართლის განმარტებებით არ უხელმძღვანელიათ.

"ჩვენ ვთვლით, რომ ნაფიც მსაჯულებს ამ განმარტებებით არ უხელმძღვანელიათ, ვინაიდან ბავშვთან მიმართებაში სისხლის სამართლის საქმეში, მტკიცებულებები არ არსებობდა. აქედან გამომდინარე ვთვლით, რომ ნაფიცმა მსაჯულებმა არ გაითვალისწინეს მოსამართლის განმარტებები იმასთან დაკავშირებით, რომ ვერდიქტი უნდა ემყარებოდეს უტყუარი მტკიცებულებების ერთობლიობას და არა ეჭვებსა და ვარაუდებს", - აღნიშნა პაპიძის ადვოკატმა.

რას შეეხება მოსამართლის მიერ დანიშნული სასჯელის შეცვლის მოთხოვნას, როგორც ადვოკატი განმარტავს, ეს სარჩელის დამატებითი არგუმენტია და თუკი ძირითად მოთხოვნას, საქმის ხელახლა განხილვასთან დაკავშირებით სასამართლო არ დააკმაყოფილებს, ამ შემთხვევაში ისინი მოითხოვენ, რომ მაგდა პაპიძისთვის შეფარდებული უვადო პატიმრობა, ვადიანით შეიცვალოს.

თორნიკე კოშკაძე

AMBEBI.GE