"ფინალში სამი ძლიერი სპორტსმენია. ღირსეული მეტოქეები არიან, მაგრამ ოქროს მედალის ჩამოტანისთვის ვიბრძოლებ"

"სანამ ლიცენზიას მოვიპოვებდი, იყო ევროპის ჩემპიონატი პორტუგალიაში, სადაც ვიყავი, დავაფიქსირე ჩემი შედეგი და რომ ჩამოვედი, ერთი თვე არ იყო გასული, დამირეკეს და მითხრეს რომ პარალიმპიადაში მონაწილეობის უფლება მოვიპოვე. თან იმ დღეს დაბადების დღე მქონდა და საჩუქარი გამიკეთეს" - იხსენებს მოცურავე ლიკა ჩაჩიბაია და საკუთარი სპორტული საქმიანობის შესახებ ემოციების გარეშე საუბარი უჭირს. სულ რაღაც 5-6 თვეა, რაც ცურავს და უკვე რიოს 2016 წლის ზაფხულის პარალიმპიადაზე წასასვლელად ემზადება - ის ზაფხულის პარალიმპიური თამაშების მონაწილეა.

"დიდი ხანი არ არის რაც ვცურავ, დაახლოებით 5-6 თვეა. როგორც მითხრეს, ამ დროში ძალიან დიდ შედეგებს მივაღწიე. ახლა სადაც მივდივარ მეტოქეები ძლიერი მყავს. არიან სპორტსმენები, რომლებიც ცურავენ 20-25 წელი. მე კი ახალბედა სპორტსმენი ვარ. ჩემთვის დიდი პატივია ასეთ მეტოქეებთან ბრძოლა. მთავარია, რომ გავდივარ პარალიმპიადაზე, რაც სპორტში ყველაზე მნიშვნელოვანია. მოტივაცია მაღალი მაქვს - ვაპირებ ბრძოლაში მაქსიმალურად დავიხარჯო. საქართველოს სახელით მივდივარ და უნდა დავიცვა მისი სახელი. შედეგი როგორიც უნდა იყოს, გავარგრძელებ ცურვას და საპრიზოზეც გავალ. ამისთვის, ალბათ 10 წელი დამჭირდება", - ამბობს ლიკა ჩაჩიბაია AMBEBI.GE-სთან საუბრისას.

არანაკლები ემოციით საუბრობს ევროპისა და მსოფლიოს ჩემპიონი, ძიუდოისტი ზვიად გოგოჭური საკუთარ სპორტულ მიღწევებზე. რომ არა განსაკუთრებული სიყვარული და მონდომება, ალბათ გაუჭირდებოდა ორი შვილის მამას საკუთარი დროის უდიდესი ნაწილის ვარჯიშისთვის დათმობა.

"2015 წელს კორეაში გაიმართა მსოფლიო ჩემპოიონატი, მხედველობადაქვეითებულთა პარალიმპიურ სახეობა ძიუდოში ვიასპარეზე. აქ მივიღე მონაწილეობა პირველად. ახლა ვემზადები. ყველაფერს გავაკეთებ, რომ რიოს პარაოლიმპიადაზე ოქროს მედალი მოვიპოვო. დიდი დატვირთვაა. დიდი ძალისხმევაა საჭირო, რომ წარმატებას მიაღწიო. დღეშო სამჯერადი მოსამზადებელი ვარჯიშები მაქვს. მთელ დროს ვარჯიშს ვუთმობ. მძიმე ვარჯიშებია. ყველაფერს მოწყვეტილი ვარ, მათ შორის ოჯახსაც. საქართველოს ისტორიაში პირველი სპორტსმენი ვარ, 90 კგ-იან კატეგორიაში, რომელიც პარაოლიმპიურ ძიუდოზე იბრძოლებს. ფინალში სამი ძლიერი სპორტსმენია. ღირსეული მეტოქეები არიან, მაგრამ ოქროს მედალის ჩამოტანისთვის ვიბრძოლებ", - ამბობს ზვიად გოგოჭური.

ქართველი პარალიმპიელები ზვიად გოგოჭური და მოცურავე ლია ჩაჩიბაია რიოს 2016 წლის ზაფხულის ოლიმპიადაზე კომპანია BP-ის მხარდაჭერით გაემგზავრებიან.

"ჩვენი პირველი თანამშრომლობა შედგა მაშინ, როდესაც ლონდონში 2012 წლის ოლიმპიადა გაიმართა. მაშინ BP-მ ხელი მოაწერა პარალიმპიურ კომიტეტთან პარტნიორობის ხელშეკრულებას მსოფლიოს რამდენიმე ქვეყანაში და, მათ შორის, საქართველოში. პარალიმპიური მოძრაობა თავისთავად არის წინსვლისკენ სწრაფვის სტიმული საზოგადოებაში და BP-ის მიაჩნია, რომ ის შინაგანი ენერგია, რომელიც პარასპორტსმენებს აქვთ, საზოგადოებისთვის მასტიმულირებელი ეფექტის მქონეა", - ამბობს BP-ის საზოგადოებასთან ურთიერთობის სამსახურის უფროსი თამილა ჩანტლაძე და დასძენს, რომ BP-ის მხარდაჭერის მოტივი იმ წინსვლის, წარმატებისკენ სწრაფვისა და განვითარების ხელშეწყობაა, რომლებიც პარალიმპიელ სპორტსმენებშია.

საგარეო ურთიერთობების საკითხებში BP-ის დირექტორი, გია ღვალაძე რიოს თამაშებზე მოასპარეზე სპორტსმენებზე დიდ იმედებს ამყარებს:

"კომპანია BP მოხარულია, რომ საქართველოს პარალიმპიურ კომიტეტს 2012 წლიდან მხარს უჭერს. ეს არის შესაძლებლობა, მხარში დავუდგეთ სპორტსმენებს, რომლებიც ყოველგვარ შექებას იმსახურებენ და მისაბაძები არიან. ჩვენ დიდი იმედი გვაქვს, რომ ჩვენი ე.წ. ელჩები წარმატებით გამოვლენ ოლიმპიადაზე. დარწმუნებული ვართ, ძიუდოისტი ოქროს მედალს ჩამოიტანს. ჩვენ ლონდონის პარალიმპიადაზეც მხარი დავუჭირეთ პარალიმპიურ კომიტეტს, რიოს პარალიმპიადაზეც მხარს ვუჭერთ და დარწმუნებული ვარ, მომავალშიც ასე გავაგრძელებთ. კარგი იქნება, თუ სხვა ბიზნეს ორგანიზაციებიც შემოგვიერთდებიან და ყველა ერთობლივად შეუწყობს ხელს ამ მოძრაობას" - აღნიშნავს გია ღვალაძე.

2 აგვისტოს თბილისის პარასპორტის განვითარების ცენტრში ზვიად გოგოჭურს და ლიკა ჩაჩიბაიას თბილისის მერი დავით ნარმანია, სპორტისა და ახალგაზრდობის მინისტრი ტარიელ ხეჩიკაშვილი, მერიის გაანთლების, სპორტისა და ახალგაზრულ საქმეთა საქალაქო სამსახურის უფროსი ირაკლი გვილავა, კომპანია BP-ის დირექტორი საგარეო ურთიერთობების საკითხებში, გია ღვალაძე და პარასპორტის განვითარების ცენტრის დირექტორი შალვა მაისურაძე შეხვდნენ.

თბილსის მერის, დავით ნარმანიას თქმით, დიდია მოლოდინი, რომ პარალიმპიელი სპორტსმენები ქვეყანას ღირსეულად წარადგენენ: "ჩვენი პარალიმპიელი სპორტსმენები დღე და ღამე ვარჯიშობენ იმისთვის, რომ ასახელონ ჩვენი ქვეყანა, ჩვენი ქალაქი და დარწმუნებული ვარ, რომ შესაბამისი შედეგიც ექნებათ. თითოეულ პარალიმპიელს ჩვენი, სპორტის სამინისტროს და სპონსორების მაქსიმალური მხარდაჭერა აქვს" - აღნიშნა დავით ნარმანიამ სპორტსმენებთან შეხვედრისას.

საქართველოს სპორტისა და ახალგაზრდობის მინისტრმა ტარიელ ხეჩიკაშვილმა სახელმწიფოსა და კერძო სექტორის პარასპორტისთვის მხარდაჭერის მნიშვნელობას გაუსვა ხაზი და პარალიმპიელი სპორტსმენების საქმიანობასთან დაკავშირებით სპორტის სამინისტროს პოზიტიური მოლოდინები დააფიქსირა:

"კიდევ ერთხელ დავინახეთ, რომ ჩვენ ვართ ერთნი. სრული მხარდაჭერაა როგორც სახელმწიფოს, ასევე კერძო სექტორისგან, რის გამოც მათ მინდა მადლობა გადავუხადო. ვფიქრობ, ასეთი ერთობლივი მუშაობით შევძლებთ, რომ ქართველი პარალიმპიელები განსაკუთრებით წარმატებულები იყვნენ", - აღნიშნა ტარიელ ხეჩიკაშვილმა.

თბილისის პარაცენტრი ქალაქ თბილისის მერიის დაფინანსებით აშენდა და მოეწყო. ის შშმ პირებზე სრულად ადაპტირებული ერთადერთი პარასპორტული არენაა საქართველოში.

თამარ კორკოტაშვილი

AMBEBI.GE