"მაგ ადგილზე ავარიების ზრდა გარდაუვალია..." - რატომ მიიჩნევს შალვა ოგბაიძე ქუთაისი-სამტრედიის შემოვლით გზას "მომეტებული რისკის ადგილად"

ქუთაისი-სამტრედიის შემოვლით გზაზე 21 ივლისს ტრაგედია მოხდა. ერთმანეთს საპირისპირო მიმართულებით მოძრავი KIA-ს და BMW-ს მარკის ავტომობილები შეეჯახა. ტრაგიკულ ავარიას KIA-ში მსხდომი სამი ადამიანი ემსხვერპლა. BMW-ს მარკის ავტომობილში ქართველი მორაგბეები - მერაბ კვირიკაშვილი და გიორგი ლომინაძე მეუღლეებთან ერთად ისხდნენ. სპორტსმენების მეუღლეების ჯანმრთელობის მდგომარეობა მძიმეა.

საშინელ ავარიას უამრავი გამოხმაურება მოჰყვა სოციალურ ქსელში. პირად გვერდზე ფაქტს ეხმაურება თბილისის საკრებულოს წევრი, საქართველოს საავტომობილო ფედერაციის პრეზიდენტი შალვა ოგბაიძე. როგორც ოგბაიძე წერს, აღნიშნულ მონაკვეთზე ავარიების რისკი ძალიან დიდია, რისი გამომწვევი მიზეზიც ერთი ფაქტორია:

"ეს არის ქუთაისი-სამტრედიის შემოვლითი გზის მონაკვეთი. ზუსტად ნამდვილად არ ვიცი რა ადგილზე მოხდა ის საზარელი აცარია, რომელსაც 3 ადამიანის სიცოცხლე ემსხვერპლა, მაგრამ კონკრეტულად ეს ადგილი წარმოადგენს მომეტებული რისკის ადგილს.

თუ დააკვირდებით, ამ ადგილზე სრულდება ცალმხრივი მოძრაობა და ძალიან მოკლე მონაკვეთში (ისე რომ ავტომობილი ვერ ასწრებს სისწრაფის "დაგდებას'') დიდი სისწრაფით მოძრავი ავტომობილები ერთმანეთის პირისპირ აღმოჩნდებიან.

ეს წარმოადგენს საშიშ კონფლიქტურ წერტილს და საჭიროებს სწრაფ ჩარევას, წინააღმდეგ შემთხვევაში მაგ ადგილზე ავარიების რაოდენობის ზრდა გარდაუვალია, სამწუხაროდ", - წერს ოგბაიძე პოსტში.