"ეს არ იყო ტერორისტული აქტი, ბარბაროსობა იყო, შაჰ-აბასსაც არ გამოუყენებია ასეთი მეთოდი" - ჯაბა ქარსელაძე ნიცის ტრაგედიაზე

ეს კვირა მსოფლიოსთვის დაძაბული იყო - ნიცაში მომხდარ სასტიკ ტერაქტს 84 ადამიანი ემსხვერპლა, სამხედრო გადატრიალების მცდელობას თურქეთში 200-ზე მეტი ადამიანი. არეულობის ზონებში ქართველებიც მოყვნენ, მათ შორის ცნობილი ადამიანები, რომლებმაც ტრაგედიის შესახებ AMBEBI.GE-სთან ისაუბრეს:

ჩოგბურთელი სოფია შამათავა თურქეთის ქალაქ ბურსაში ჩოგბურთის ტურნირზე იმყოფებოდა:

"მე და ეკო გორგოძე სტამბოლის მოსაზღვრე ქალაქ ბურსაში ვიყავით, ჩოგბურთის საერთაშორისო ტურნირზე. როცა სამხედრო ამბოხების შესახებ შევიტყვეთ, სასტუმროში განგაში გამოცხადდა. მთელი ღამე ჰოლში ვისხედით. ამბობდნენ, ერდოღანის გადაგდება უნდათ იმიტომ, რომ ISIS-ს აფინანსებსო, ისიც თქვეს, რამდენიმე სამხედრო გადაუდგაო, ითქვა, თითქოს ერდოღანმა მოაწყო რეიტინგის ასამაღლებლადო. სინამდვილეში ვერ გავიგე რა მოხდა. ცუდი ის არის, რომ 200-ზე მეტი ადამიანი დაიღუპა. ახლაც დაძაბულობაა ქუჩაში, რომ მოვდიოდით აეროპორტის გზაზე, ტანკები იდგა და კილომეტრნახევარი ფეხით გავიარეთ. ბევრი რამე გვინახავს შეჯიბრებზე, მაგრამ ეს არასასიამოვნო იყო.

- რა ხდებოდა თურქეთში სამხედროების ქუჩაში გამოსვლამდე?

- დაახლოებით 7 საათზე გვითხრეს, არასასიამოვნო შეტაკებები იწყება ქალაქში და ჯობია სასტუმროში დარჩეთო. 9 საათზე გამოაცხადეს, რომ სამხედრო გადატრიალება იყო. 11 საათზე კი დაგვირეკა სასტუმროს ადმინისტრაციამ, ჩაიცვით და ჰოლში ჩამოდითო. პირველ საათებში ვერ გავიაზრე რა მოხდა, მაგრამ მსხვერპლი რომ მოჰყვა, ცოტა შევშინდით. ცუდი ის იყო, რომ ვერ გავიგეთ რა გვექნა. სხვათა შორის, გულგრილად იქცეოდნენ სამართალდამცველები, ტურნირის ორგანიზატორებიც ასე მოიქცნენ. არც გვკითხეს ისე მოხსნეს ტურნირი, სანამ აზრზე მოვედით, ორგანიზატორები სასტუმროდან გაიქცნენ. ყველაფერი ჩვენი მოსაგვარებელი გახდა. შოკში ვარ, არასდროს ვყოფილვარ ასეთ მდგომარეობაში.

მომღერალი ჯაბა ქარსელაძე წლებია საფრანგეთში ცხოვრობს. ამბობს, რომ ნიცაში მომხდარი ტერაქტი განსაკუთრებით მძიმედ აღსაქმელი იყო ფრანგებისთვის.

- სამწუხაროდ, უკვე მივეჩვიეთ ასეთ ფაქტებს. ჩვეულებრივი გახდა, დარწმუნებული ვიყავი, 14 ივლისს, ბასტილიის აღების დღეს, რაღაც მოხდებოდა, სამწუხაროდ ეს ვარაუდი ახდა. მივხვდი მათ ფსიქოლოგიას, ისინი ძირითადად ერჩიან ფრანგებს და არა ტურისტებს, რადგან ტერორისტულ აქტებს აწყობენ იქ, სადაც ფრანგული ზეიმია. ეს არ იყო ტერორისტული აქტი, ბარბაროსობა იყო, შაჰ-აბასსაც არ გამოუყენებია მგონი ასეთი მეთოდი. ფრანგულ არხზე ყველაზე ცნობილი ფსიქიატრის ჩართვა იყო, რომელმაც თქვა, რომ ტუნისელი მამაკაცი, რომელიც ტრაილერს მართავდა, სერიოზულად იყო ფსიქიურად შეშლილი. მან განაცხადა, რომ გახშირებული ტერაქტებით ხალხს აჩვევენ იმას, რომ ყოველდღიურად მსგავსი მოლოდინი ჰქონდეთ.

14 ივლისს საფრანგეთში გამკაცრებული იყო უსაფრთხოების ზომები, ეტყობა რაღაცას ელოდნენ. ზუსტად მაშინ, როცა დღე მთავრდებოდა და ყველას ეგონა გადავრჩით, საშინელება მოხდა ნიცაში. როცა გავიგეთ რა მოხდა, შოკში ჩავვარდით, ამ ფორმით ჩადენილმა ტერორისტულმა აქტმა კიდევ უფრო შეგვაშფოთა. ახლა რაც ხდება მსოფლიოში, მგონია პოლიტიკის ნაწილი და საიდანღაც მართული პროცესია. პრევენციის მიზნით არ დავდივარ ხალხმრავალ ადგილებზე. რამდენიმე დღის წინ, შანზელიზედან ლაივი მქონდა ჩართული, უცებ ვიგრძენი, რომ ჩემს ფეხთან აფეთქდა ასაფეთქებელი ე.წ. "ხლაპუშა", ხალხმა დაიწყო კივილი ბოლო ხმაზე, კიოდნენ, გაიქეცით ბომბიო. ეს იყო ტერორისტული აქტის ინსცენირება და მივხვდი, რა საშინელებაა. ხვდები, რა უსუსური ხარ ამ დროს.

თამარ ბოჭორიშვილი

AMBEBI.GE