მნიშვნელოვანი ინფორმაცია
31
მარტიდღის ზოგადი ასტროლოგიური პროგნოზი
მნიშვნელოვანი ინფორმაცია
მკითხველის რჩევით
კვირის კითხვადი სტატიები
თვის კითხვადი სტატიები
ასევე დაგაინტერესებთ
გაიცანით კაცი, რომელმაც ლატარეაში 2 მილიონი ლარი მოიგო
04:18 / 07-07-2016
საქართველოს ლატარიის კომპანიის გათამაშებაში, გასულ კვირას, ჯეკპოტი გათამაშდა. ერთმა იღბლიანმა ბილეთმა 1-ელ ივლისს, ლოტო 6/36 -ის პირველი კატეგორია, ანუ ჯეკპოტი 2 077 529 ლარი მოიგო. ამ იღბლიანი ბილეთის მფლობელი კი 60 წლის რომან სარალიძე აღმოჩნდა.
674-ე გათამაშებისთვის მომგებიანი რიცხვების კომბინაცია ასე გადანაწილდა: 4, 9, 10, 15, 27, 31. ბატონ რომანს თავის მომგებიან ბილეთში რიცხვების სწორედ ეს კომბინაცია ეწერა.
რომან სარალიძე პროფესიით პირველი კატეგორიის ინჟინერ-ინსპექტორია. მუშაობს თელასში, ჰყავს მეუღლე და ერთი შვილი. წარმოშობით ჭიათურიდანაა, მაგრამ უკვე წლებია, თბილისში ცხოვრობს. როგორც თვითონ ამბობს, საშუალო შეძლების ოჯახი აქვთ, მეუღლეც მუშაობს და ორივე ერთად, საკუთარი ხელფასებით უზრუნველყოფენ ოჯახს. აქამდე არაფერი მოუგია, ცხოვრებას ასე არასდროს გაუნებივრებია, ამ მოგებით კი ნამდვილ შოკშია. ლატარიის კომპანია გამარჯვებულს რამდენიმე დღე ეძებდა და ბოლოს როგორც იქნა, თავად გამოცხადდა მათთან იღბლიანი ბილეთით ხელში.
როგორი ემოციები აქვს ახალბედა მილიონერს და რა გეგმები აქვს მოგებული თანხით, ამას AMBEBI.GE-ს რომან სარალიძე თავად უყვება:
- ბილეთი სამგორში, ლილოს "მარშრუტკების" გაჩერებაზე შევიძინე. იქ, თუ არ ვცდები, პატარა, მწვანე ფერის ჯიხურია. მოკლედ, ერთი ბილეთი შევავსე, საერთოდ, იშვიათად ვყიდულობ ხოლმე, მაგრამ იმ დღეს რატომღაც სულმა წამძლია, თუმცა მაშინვე შევსება არ მინდოდა, ბოლოს მაინც შევავსე. ყოველთვის ერთი-ორი განსხვავებით, ერთსა და იმავე რიცხვებს ვწერდი ხოლმე და მაშინაც ასე მოვიქეცი. მერე ბილეთი ჯიბეში ჩავიდე და სახლში წამოვედი. ვინაიდან მეზობელი, ახლობელი ქალბატონი იყო გარდაცვლილი, ტელევიზორი იმ დღეს არ ჩაგვირთავს, იმერელი კაცი ვარ და ასეთ რაღაცებს ყურადღებას ვაქცევთ. არც გამხსენებია, რომ ლოტოს გათამაშება იყო. აზარტულიც არ ვარ და თან, დიდი მოლოდინიც არ მქონდა. ხომ გეუბნებით, არასდროს არაფერი მომიგია. შემდეგი დღე შაბათი იყო, არც შაბათს მიმიქცევია ყურადღება...
კვირას ერთმა ახლობელმა თქვა, ჯეკპოტი გათამაშდა, ვიღაცამ მოიგო და ჯერ არ გამოჩენილა, სამი დღეა, ეძებენო. არადა, ბილეთი ჯიბეში მედო და მის ნათქვამს ყურადღება დიდად არ მივაქციე. არც მიფიქრია, - ნეტავ, რაღაც ხომ არ მაქვს მოგებული-მეთქი. კვირას მეზობელი ქალბატონი დავასაფლავეთ, თამადა ვიყავი, ორშაბათს ნაბახუსევზე გახლდით. თურმე, ტელევიზორში აცხადებენ, ბილეთის პატრონს ეძებენო, ყურადღება ამისთვისაც არ მიმიქცევია. სამშაბათს სამსახურის ობიექტებზე ვიყავი, იქიდან რომ წამოვედი, საბჭოს მოედანზე გამოვიარე, მივედი ჯიხურთან, სადაც ლოტოს ბილეთები იყიდება, მაგრამ დაკეტილი დამხვდა, გამარჯვებული ციფრები გარეთ, მინაზე იყო გამოკრული და ტელეფონში ჩავიწერე. სახლში რომ მივედი, პატარა მეურნეობა მაქვს ეზოში და იმის მისახედად ჩავედი. საბოლოოდ, 7 საათი იყო, სახლში ტელევიზორში რომ ვნახე ნომრები და გავშრი, მთელი სხეული ამიკანკალდა, ცივი წყალი მივისხი, პირველი რაც გავაკეთე, შვილს დავურეკე, მაგრამ არავინ მიჯერებდა, იუმორი მიყვარს და ეგონათ, ვხუმრობდი. მერე მეუღლეც მოვიდა სახლში, ვუთხარი, არც ის მიჯერებდა.
- საბოლოოდ როგორ დაუკავშირდით ლოტოს კომპანიას, რომლებიც გეძებდნენ?
- ამბის გაგებიდან მეორე დღესვე მთელი ოჯახით წავედი იქ. თან მახლდნენ: ბიძაშვილი, ძმა, ძმიშვილები. ანგარიში გახსნეს და 2 კვირის მერე იქნება ჩარიცხვაო. ზუსტად არ ვიცი, რა იქნება და როგორ...
- მოგებულ თანხასთან დაკავშირებით, რა გეგმები გაგიჩნდათ?
- ჯერ არ ვარ ჩამოყალიბებული. ერთი ის ვიცი, რომ ქველმოქმედს მეძახიან და თანხის გარკვეულ ნაწილს ამ საქმეში ჩავდებ, დანარჩენი, მართლა არ ვიცი, რას მოხმარდება.
ლალი ფაცია
AMBEBI.GE
გააკეთეთ კომენტარი
sponsored by
ContentRoom
რუბრიკის სხვა სიახლეები
დღის ვიდეო
00:00 / 00:00
კადრები: რა ხდებოდა 2 ძლიერი მიწისძვრის დროს მიანმარში? - დაღუპულთა რაოდენობა 1 000-ს გასცდა
კვირის კითხვადი სტატიები
მნიშვნელოვანი ინფორმაცია
მკითხველის რჩევით
