დამხმარე მასალის გამოყენების გამო, ბათუმში აბიტურიენტი გამოცდიდან მოხსნეს

დამხმარე მასალის გამოყენების გამო, ბათუმში აბიტურიენტი გამოცდიდან მოხსნეს. შეფასებისა და გამოცდების ეროვნული ცენტრის მიერ გამოქვეყნებულ გამოცდაზე მოქცევის წესებში განმარტებულია, რომ დამხმარე მასალის გამოყენების, ან აღმოჩენის შემთხვევა, აბიტურიენტის გამოცდიდან გაფრთხილების გარეშე მოხსნას ითვალისწინებს.

დღესვე ალკოჰოლური ზემოქმედების ქვეშ მყოფი აბიტურიენტიც მოიხსნა გამოცდიდან. შემთხვევა დღეს, გლდანის რაიონის 39-ე საჯარო სკოლაში გახსნილ საგამოცდო ცენტრში, უცხოური ენის გამოცდის მეორე სესიაზე მოხდა.

აბიტურიენტს რეგისტრაციისას არაფხიზელი მდგომარეობა შეამჩნიეს. საპატრულო პოლიციის მიერ ჩატარებული ალკოტესტირების შედეგად, მას ალკოჰოლური ზემოქმედება დაუდასტურდა. აღნიშნული აბიტურიენტი გამოცდიდან მოიხსნა.

როგორც ცნობილია, შარშანდელი პრეცენდენტიდან გამომდინარე, როდესაც საგამოცდო ცენტრში ნასვამი აბიტურიენტი გამოცხადდა, გამოცდაზე მოქცევის წესებს კიდევ ერთი პუნქტი დაემატა, რომელიც ალკოჰოლის, ნარკოტიკული ან ფსიქოტროპული ნივთიერებების ზემოქმედების ქვეშ ყოფნის შემთხვევაში, აპლიკანტის გამოცდიდან გაფრთხილების გარეშე მოხსნას ითვალისწინებს.

რაც შეეხება უცხოური ენის გამოცდის მიმდინარეობას, შეფასებისა და გამოცდების ეროვნული ცენტრის ინფორმაციით, პირველ სესიაზე დარეგისტრირებული 9300-ზე მეტი აბიტურიენტიდან გამოცხადდა 96%. მეორე სესიაზე დარეგისტრირებული 9000-ზე მეტი აბიტურიენტიდან გამოცდაზე გამოცხადდა 97%-მდე. გამოცდის ხანგრძლივობაა 2 საათი და 40 წუთია.