გიგი წერეთელს ეუთო-ს საპარლამენტო ასამბლეის პრეზიდენტობამდე 13 ხმა დააკლდა

ეუთო-ს საპარლამენტო ასამბლეის 25-ე, ყოველწლიური სესია, რომელიც 1-5 ივლისის ჩათვლით საქართველოში მიმდინარეობდა, თბილისის დეკლარაციის მიღებით და ასამბლეის ხელმძღვანელი პირების არჩევით დასრულდა.

ეუთო-ს საპარლამენტო ასამბლეის პრეზიდენტობამდე "ნაციონალური მოძრაობის" ერთ-ერთ ლიდერ გიგი წერეთელს 13 ხმა დააკლდა. საპარლამენტო ასამბლეის პრეზიდენტი ავსტრიის წარმომადგენელი კრისტინა მუტონენი გახდა. პრეზიდენტის ასარჩევად კენჭისყრის მეორე ტურის ჩატარება გახდა საჭირო, ვინაიდან ხმათა აბსოლუტური უმრავლესობა ვერც ერთმა კანდიდატმა ვერ დააგროვა.

არჩევნების მეორე ტურის შედეგების მიხედვით ავსტრიის წარმომადგენელ კრისტინა მუტონენს 86-მა დელეგატმა დაუჭირა მხარი, გიგი წერეთელს კი -73-მა.

ახალი პრეზიდენტი ეუთო-ს საპარლამენტო ასამბლეას 1 წლის განმავლობაში უხელმძღვანელებს. გიგი წერეთელი რჩება ეუთო-ს საპარლამენტო ასამბლეის ვიცე-პრეზიდენტად მომავალი 2 წლის განმავლობაში.

"მე არ ვაგებ, ვიგებ ან ვსწავლობ. ახლა მე ვისწავლე ბევრი რამ, მათ შორის საკუთარი სახელისუფლებო პარტიისგან და ვეცდებით, რომ ეს ნასწავლი გამოვიყენოთ ჩვენს მომავალ საქმიანობაში" - განუცხადა ჟურნალისტებს გიგი წერეთელმა ეუთო-ს საპარლამენტო ასამბლეის ყოველწლიური სესიის დასრულების შემდეგ.

"მთავარი ჩემთვის ერთი რამაა, რომ ეს ასამბლეა წარმატებით დასრულდა. ძალიან ბევრი ადამიანი, ვინც აქ ჩამოვიდა, კმაყოფილია. მე მიხარია, რომ ჩემი ქვეყნისთვის ეს იყო კარგი ამბავი, შეიძლებოდა ყოფილიყო უკეთესი ამბავიც საქართველოსთვის, მაგრამ ჩვენმა სახელისუფლებო გუნდმა სხვანაირად იფიქრა. მე ახლა არ დავიწყებ საქმის გარჩევას, ყველაფერი ვიცი. მე დღეს გამოვხატე ჩემი განწყობა, მივულოცე კანდიდატებს. დიდი მხარდაჭერა მქონდა, მეორე ტური გაიმართა. სამწუხაროდ, ბევრი ჩემი მხარდამჭერი გუშინ წავიდა - აშშ-ს, გერმანიის და სხვა დელეგაციებიდან, მათ მოუხდათ რეისების გადაცვლა. ამიტომ მე ვიცოდი, რომ მეორე ტური რთული იქნებოდა. ამას დაემატა გარკვეული სამუშაო, რომელმაც როგორ იმოქმედა, ამის ანალიზს გავაკეთებ, მაგრამ ჩემთვის მთავარია რეზოლუცია, რომელიც ჩვენ მივიღეთ და ასამბლეა, რომელიც ჩავატარეთ", - განაცხადა გიგი წერეთელმა.

მისივე თქმით, ის თავის გეგმებზე უარს არ ამბობს და არ გამორიცხავს, ასამბლეის პრეზიდენტის პოსტზე მომავალშიც იყაროს კენჭი.

რაც შეეხება გამარჯვებულ კანდიდატს, კრისტინა მუტონენს მან საქართველოს ღონისძიების მასპინძლობისთვის მადლობა გადაუხადა და აღნიშნა, რომ "ეს ქვეყანა თავისი სტუმართმოყვარეობით გამოირჩევა". პრეზიდენტმა დასძინა, რომ დღეს ჩატარებული არჩევნები დემოკრატიულობის მაღალი ხარისხის კარგი მაგალითი იყო.

"მსურს ყველა ჩემს კოლეგას მადლობა გადავუხადო ამ დემოკრატიულ პროცესში მონაწილეობისთვის. ვფიქრობ რომ ეს კიდევ ერთი მნიშვნელოვანი ნიშანი იყო ჩვენი ქვეყნებისთვის, რომელიც გვიჩვენებს, რომ ჩვენ ერთად მუშაობა შეგვიძლია იმ შემთხვევაშიც კი თუ ჩვენი მოსაზრებები განსხვავდება. მე ვფიქრობ, რომ მიღებული რეზოლუცია ძალიან მნიშვნელოვანია. ეჭვგარეშეა, რომ როდესაც ერთად ვმუშაობთ ყოველთვის ვაღწევთ კომპრომისს. განვმეორდები და ვიტყვი, რომ ჩვენ გვქონდა მრავალფეროვანი და ყოვლისმომცველი დიალოგი ყველა საკითხზე და ყველა მხარესთან მათ შორის ოკუპირებული ტერიტორიების შესახებ. შემიძლია ვთქვა, რომ აღნიშნული დიალოგი გაგრძელდება", - განაცხადა მუტონენიმ.