"ამესიჯებენ, მაგრამ ხალხი არ წყვეტს... იჩაგრება, ვისაც პატრონი არ ჰყავს" - რა პრეტენზია აქვს თამრიკო ჭოხონელიძეს "ცეკვავენ ვარსკვლავების" გუნდთან
მომღერალი თამრიკო ჭოხონელიძე "ცეკვავენ ვარსკვლავების" ნახევარფინალურ ტურს გამოეხმაურა და "ფეისბუქის" პირად გვერდზე საკმაოდ მწვავე სტატუსი დაწერა, რომ ჯანო იზორია უსამართლოდ დაიჩაგრა, რადგანაც ვერ მოხვდა ფინალში... ქალბატონი თამრიკო იქვე საკუთარი შვილის, მარიამ როინიშვილის კონკურსში მონაწილეობას იხსენებდა.
AMBEBI.GE ქალბატონ თამარს დაუკავშირდა. მომღერალმა თემის გარშემო ვრცელი კომენტარი მოგვცა.
- ეს ერთი წლის წინანდელი წყენა იყო, მაგრამ ჩასაფრებულ ადამიანს, შეიძლებოდა, ცუდად წაეკითხა და შემდეგ ცუდი კომენტარი დაეწერა. დაწერეს კიდეც, მაგრამ ნაკლებად მაინტერესებს მათი აზრი, რადგანაც არ არის სამართლიანი, სწორად არ არის განსჯილი ის, რაც რეალურად მოხდა. ახლა ჩემს სტატუსზე ვიტყვი, ალბათ მისი დაწერის წინ ერთად იმძლავრა მარიამთან დაკავშირებულმა გულის ტკენამ და წლევანდელმა უსამართლობამ, რაც ერთი სიტყვით, უსამართლობა - ასე ფასდება.
არადა, გეუბნებიან, ეს არის შოუ და მშვიდად უყურეთ, მაშინ, როდესაც ხალხს სთხოვენ, დაუმესიჯონ. ამიტომ ორგანიზატორებმა კეთილი უნდა ინებონ, შოუ მხოლოდ შოუდ არ აქციონ და ის სანახაობრივი სკანდალების საფუძველზე არ გახადონ პოპულარული და ამით არ მიიზიდონ მაყურებელი. ეს არ არის ჯანსაღი სიტუაცია. თან, იქვე ელოდები ხალხის მესიჯებს, მიეცი საშუალება, სამართლიანი არჩევანი გააკეთონ.
ბოლო ორი წელიწადია, ეს შოუ აშკარად კერძო სპონსორების მკლავის გადაწევის ასპარეზად გადაიქცა, განსაკუთრებით, ბოლო ეტაპზე. აქ ხალხი არაფერ შუაშია, ამაში ნურავინ შემედავება.
- მიგაჩნიათ, რომ შოუს ორგანიზატორები უხეშად ერევიან ამ პროცესში, მაყურებელი არ ამესიჯებს და ამით არ ხდება გამარჯვებულების გამოვლენა?
- როგორ არ ამესიჯებენ, მაგრამ საბოლოოდ მაინც ხალხი არ წყვეტს, ეს ჩემი აზრია. ოღონდ, არ ვიცი, ვინ წყვეტს... მესიჯებზე სერიოზული ბრძოლა მიდის და ეს უკვე ყველამ კარგად იცის. ასე არ შეიძლება, რადგანაც იჩაგრება ის, ვინც შრომობს, კარგ შედეგს აჩვენებს, ვინც ხალხს თავი შეაყვარა და ვისაც პატრონი არ ჰყავს. დიახ, უსამართლოდ იჩაგრება!!! ბონდარენკოს გულშემატკივრებისთვის ვიტყვი, - ისევე რომ დაჩაგრულიყო, როგორც ჯანო, იმავეს გავაკეთებდი, გამოვეხმაურებოდი, რადგანაც ამ შემთხვევაში შრომისმოყვარეობის, ნიჭიერების გულშემატკივარი ვარ. ნებისმიერი ამ სამიდან, რომელიც უნდა ყოფილიყო, ასეთივე სტატუსს მაინც დავწერდი, როგორიც დავწერე, რადგანაც ვიცი, რას ნიშნავს, როდესაც ადამიანი უსამართლოდ იჩაგრება!
- ე.ი. ჯანო იზორია დაიჩაგრა.
- დიახ, დაიჩაგრა. კიდევ ერთხელ მინდა ვთქვა, არც ბონდარენკოს და არც ანდრიას საწინააღმდეგო არაფერი მაქვს. მაგრამ ფინალში ერთ-ერთი ჯანო უნდა ყოფილიყო. ამას ვამბობ, რიგითი ადამიანი, არანაირად ექსპერტი და სპეციალისტი, ამის პრეტენზია არ მაქვს, უბრალოდ, ხალხის წარმომადგენელი ვარ და მაქვს უფლება, ჩემი აზრი გამოვხატო.
- ისე, არცერთ კონკურსში, როგორც პროფესიონალი მუსიკოსი არც ერთხელ ყოფილხართ. რატომ?
- კონკურსები პირდაპირ ეთერში გადის, ორგანიზატორებმა კარგად იციან, რომ უკან დამხევი არ ვარ, უსამართლობაზე თვალს ვერ დავხუჭავ, მერე, არ ვარ სკანდალური პიროვნება, რომელიც სკანდალს მოაწყობს და ამით მაყურებელს მოიზიდავს და არ ვარ ადამიანი, რომელიც არაპროფესიონალურ ფრაზებს გამოისვრის ეკრანიდან, როგორც ეს დღეს ხდება, - არაკომპეტენტური აზრის დიდი თავდაჯერებულობით გამოთქმა. ეს უპირველესად, ხალხის შეურაცხყოფაა! მოკლედ, არ აწყობთ და ამიტომაც ამ თვალსაზრისით, არ ვარ მათთვის მისაღები პიროვნება...
ისევ კონკურსის თემას დავუბრუნდები და ვიტყვი, როდესაც მარიამს ''ცეკვავენ ვარსკვლავებიდან'' შემოეხმიანნენ, კონკურსში მიეღო მონაწილეობა, გული მიგრძნობდა და ვუთხარი, - მზად ხარ? კონკურსმა ასაკი, სქესი და კიდევ ბევრი რამ, არც იცის. მზად ვარო, - მითხრა. მოკლედ, მიუხედავად დიდი ტკივილისა, მაინც მიიღო მონაწილეობა. ჩემთვის მნიშვნელოვნია, რომ მან არ დაკარგა ღირსება, ბოლომდე, თავისი შრომითა და ვაჟკაცობით გაიტანა თავი და ხალხს მთავარი აჩვენა, რომ არ უნდა დაკარგო ღირსება. ჩემს აღფრთოვანებას იწვევს ისიც, რომ ყველა ნიჭიერი ადამიანის წარმატება უხარია... ასევე არ შემიძლია, განსაკუთრებული მადლობა არ ვუთხრა ნოდიკო ტატიშვილს, მარიამის მეგობარია, ნამდვილად საოცარი გულშემატკივრობა გამოიჩინა, ბევრი სამართლიანი ნაბიჯი აქვს გადადგმული და ის, რომ მარიამი ამ პროექტში მოხვდა, კარგად ვიცი, ნოდიკოს შეთავაზებაა. ამიტომ, დიდი მადლობა, მარიამის გვერდში დგომისთვის...
ლალი ფაცია
AMBEBI.GE
იხილეთ ასევე: "არ გრცხვენიაააათ?!" - თამრიკო ჭოხონელიძე ჯანო იზორიას "ცეკვავენ ვარსკვლავებიდან" გავარდნას ეხმაურება
სალომე ჭაჭუა უცხოეთში მიემგზავრება - რომელი ქვეყნის "ცეკვავენ ვარსკვლავებში" გამოჩნდება მოცეკვავე
"სადაც არ უნდა ყოფილიყო, ყოველთვის სახლში ბრუნდებოდა... თბილისში..." - რას წერს გენიალურ კომპოზიტორზე ხელოვნებათმცოდნე
