14 წლის ლუკას სევდიანი ამბავი, რომელიც კეთილად უნდა დასრულდეს: "არც ერთი ნიჭიერი ადამიანი არ გვყავს დასაკარგი..."

26 მაისს, საქართველოს დამოუკიდებლობის დღეს, რუსთაველზე, ერთ-ერთ ღია კაფეში 13-14 წლის ბიჭი შევიდა, ფორტეპიანოზე საოცრად დაუკრა და იქაურობა ისე დატოვა, რომ მისი სახელი და გვარი ვერავინ გაიგო.

იქ მყოფმა მსახიობმა ანა ქურთუბაძემ ბიჭუნას ტელეფონით გადაღება მოასწრო, ვიდეო სოციალურ ქსელში ატვირთა და საბოლოოდ, პატარა პიანისტით მაესტრო ნიკა რაჭველიც დაინტერესედა. "ფეისბუქის" პირად გვერდზე წერდა: "მიპოვნეთ, რა ეს ბავშვი... ძალიან გთხოვთ..."

იხილეთ ვიდეო

სოციალური ქსელის ძალამ გაჭრა, მალე ბიჭის სახელი და გვარიც გახდა ცნობილი და ჟურნალისტების გონებაში ზუსტად ორი წლის წინ გადაღებული კადრები ამოტივტივდა - ბიჭმა მაშინ palitratv.ge-ის გადამღები ჯგუფის ყურადღება კრწანისის რეზიდენციასთან, ედუარდ შევარდნაძის დაკრძალვის დღეს მიიპყრო, სადაც ის დედასთან ერთად იყო მისული. იმჟამინდელი პრემიერ-მინისტრის ირაკლი ღარიბაშვილის დანახვისას, ხმამაღლა შესძახა: "ბატონო ირაკლი, ერთი წუთით!", თუმცა ღარიბაშვილთან მიახლოება, გასაუბრება და საკუთარი სურვილის გამხელა, ვერ მოახერხა, რადგანაც დაცვამ ბიჭუნა პრემიერთან არ მიუშვა.

სწორედ palitratv.ge-ს გაუმხილა მაშინ უცნობმა ბიჭუნამ, რისი თხოვნა სურდა პრემიერისთვის - 13 წლის ლუკა გოდიშვილს ირაკლი ღარიბაშვილისთვის კომპიუტერი უნდოდა ეთხოვა. უფრო ვრცლად გაჭირვების შესახებ გადამღებ ჯგუფს ლუკას დედამ უამბო: "ჩემს შვილს არ აქვს დასაძინებელი ადგილი, ბავში სკოლაში რომ წავა და სახლში დასაჯდომი და დასაწოლი არ ექნება... ექვს ბავშვს ვზრდი მარტო, სამსახური მინდა... ლუკამ შვიდწლედი დაამთავრა, მას არ აქვს კლავიში სახლში, ჩემს შვილებიდან ზოგს ჩემს დასთან სძინავს, ზოგს ამხანაგთან, 12 კვ.მ ფართში ვცხოვრობთ. იატაკზე ვწევარ, მენატრება საწოლი... ღმერთმა ხელი მოუმართოს ბატონ ირაკლის, იქნებ დამეხმაროს, რისი საშუალებაც ექნება".

palitratv.ge-ს სიუჟეტიდან შეიტყო ლუკას სურვილის შესახებ იმჟამინდელმა პრემიერმა. ირაკლი ღარიბაშვილის ადმინისტრაციის წარმომადგენლებმა ხელოვნების სკოლის მოსწავლეს, პრემიერის სახელით, საჩუქრად გადასცეს ფანდური, პერსონალური კომპიუტერი, ფეხბურთის ბურთი და სპორტული სამოსი, რომელიც მრავალშვილიანი ოჯახის ყველაზე უმცროსმა წევრმა პრემიერისგან ითხოვა.

ლუკა ახლა 14 წლისაა. ხელოვნების სკოლის მოსწავლეა, კარგად სწავლობს, უკრავს ფორტეპიანოზე, ხალხურ საკრავებზე, მღერის და ხატავს. ცხოვრობს ავჭალაში, მძიმე სოციალურ პირობებში, დედასთან და დედმამიშვილებთან ერთად. ბიჭს არ აქვს სათანადო პირობები იმისთვის, რომ ის მონაცემები, რაც მას გააჩნია, განავითაროს. AMBEBI.GE ხელოვნების სკოლის თანამშრომლებს ესაუბრა, სადაც გვითხრეს, რომ ის ხშირად ხდება სხვადასხვა ფესტივალის გამარჯვებული, რითაც პედაგოგებს ძალიან ახარებს და აოცებს კიდეც, რადგანაც მას სახლში ინსტრუმენტი არ აქვს, რომ იმეცადინოს. "თუკი რამეს ახერხებს, ისიც ისევ აქ მოდის გაკვეთილების შემდეგ და სკოლაში მეცადინეობს" - გვითხრეს ლუკას სასწავლებელში.

მარინა ბერიძე, მუსიკისმცოდნე: "ეს ბავშვი, პირველად, ცოტა ხნის სოციალურ ქსელში ვნახე, მისი დაკრული მოვისმინე და მივხვდი, რომ ძალიან ნიჭიერია, თუმცა შთაბეჭდილება დამრჩა, რომ მუსიკაზე არ დადის და ამ ყველაფერს თვითონ მიაღწია. მოკლედ, ფაქტია, რომ სახეზეა ნიჭიერი ადამიანი.

ფრთხილი ვარ და ჩემი გადსახედიდან ვიტყვი, რომ ამ ყველაფერს არ უნდა მიეცეს რაღაც სპეკულირების ფორმა, უბრალოდ, უნდა მოვნახოთ ბავშვი, მაგრამ ჯერ მასზე ხელი არ მიმწვდება. თუმცა ყური მოვკარი, რომ ნიკა რაჭველთან ეს თემა უკვე დაიძრა. ნიკა ის მუსიკოსია, რომელიც ამისგან შოუს კი არ შექმნის, - არიქა და ვიპოვეთ!

ბავშვი ძალიან მშვიდად და წყნარად უნდა იყოს კარგ მუსიკალურ სკოლაში მიმაგრებული და მიმაჩნია, რომ დღეს ნიჭიერთა ათწლედი ამ ყველაფერს პასუხობს.

ისე, მე კულტურის სამინისტროს მივმართავდი, რადგანაც 29-მილიონიდან 300 დოლარი შეიძლება გამოიყოს და პიანინო უყიდონ. იქნებოდა მეთვალყურეობის ქვეშ და ძალიან მშვიდად დაიწყებდა სერიოზულ სწავლებას, რადგანაც ქვეყანას არც ერთი ნიჭიერი ადამიანი არ ჰყავს დასაკარგი. მაგრამ ვიმეორებ, ამის გამო ალიაქოთი არ უნდა ატყდეს, ვუნდერკინდებთან ხმამაღალი შოუების მოწყობა არ მიყვარს, რადგანაც ბავშვი ფაქიზი ინსტრუმენტია. მას მშვიდი განვითარება სჭირდება.

- პირადად თქვენ რა შეგიძლიათ გააკეთოთ ამ მოზარდისთვის?

- შემიძლია მოვისმინო, შემდეგ მივიყვანო ათწლედში, იქ ჩავაბარო (უკვე პედაგოგიც კი ვიცი, ვინ უნდა იყოს) და წელიწადში ორჯერ, ოთხშაბათს მოვიყვანო გადაცემში და გვაჩვენონ როგორ მიდიან წინ, - ამ ყველაფერში ასეთ საქმიანი ურთიერთობას ვხედავ და არა იმას, რომ ტელევიზიით მოხდეს აფიშირება, რომ პიანინო მიუტანეს, რა კეთილები ვართ. არა, ძალიან წყნარად უნდა იზრუნონ მის განათლებასა და გავითარებაზე.

ვიმედოვნებთ, ლუკას ისტორიას კეთილი გაგრძელება ექნება და ნიჭიერი ბიჭი სათანადო ხელში აღმოჩნდება... AMBEBI.GE ნიჭიერი ბიჭუნას ისტორიას მომავალშიც მიადევნებს თვალს და მისი წარმატებების შესახებ შეგატყობინებთ...

ლალი ფაცია

AMBEBI.GE