"მე დღეს მოქალაქის რანგში წარმოგიდგებით და სხვა სტატუსი არ გამაჩნია, - ასე უპასუხა ყოფილმა პრემიერ-მინისტრმა ბიძინა ივანიშვილმა გადაცემა "ინტერვიუს" წამყვანის შეკითხვას , როგორ დაახასიათებდა საკუთარ თავს და "ვის ვესაუბრებით დღეს ჩვენ?".
"მოქალაქეს და ეს არ არის პატარა მცნება, ეს ძალიან დიდ პასუხისმგებლობას აკისრებს ადამიანს. მე მოქალაქის რანგში წარმოგიდგებით თქვენ დღეს და სხვა სპეციალური სტატუსი არ გამაჩნია", - აღნიშნა ივანიშვილმა.
რაც შეეხება შეკითხვას, რამდენად უქმნის ქვეყანას საფრთხეს, ძალაუფლების ერთი ადამიანის ხელში კონცენტრირება, ივანიშვილის თქმით, მასთან მიმართებაში სიტყვა "საფრთხის" გამოყენება გადაჭარბებულია.
"თუ ჩემს პიროვნებას იცნობთ და ჩემს მოქალაქეობრივ პასუხისმგებლობაზე გსმენიათ, სიტყვა "საფრთხე" მემგონი გადაჭარბებულია. გასაგებია, რომ ასეთი ვარ, როგორიც ვარ, მაგრამ მთავარია, რომ მთელ ჩემს მოღვაწეობაში ვერ ნახავთ ვერც ერთ ხაზს - თუ "რუსთავი 2"-ს და სიცრუის მანქანას არ მოუსმენთ, რომ ქვეყნის საწინააღმდეგოდ რამე გამეკეთებინოს. მთელი ცხოვრება სინდისით ვცხოვრობ, არა მხოლოდ კანონს ვემორჩილებოდი, სინდისს ვუხმობდი ყოველთვის და ამ მხრივ ვერ წარმომიდგენია სიტყვა "საფრთხე" რატომ უნდა ვიხმაროთ... რაც შეეხება ძალაუფლებას, ჩემი ძალაუფლება მხოლოდ ისაა, რომ ხალხი მენდობა და ჩემ სიტყვას აქვს ფასი და არა ის ფინანსები, რომელიც არანაკლები გააჩნია იმ გუნდს, რომელმაც თუკი რამე 9 წლის განმავლობაში ქვეყანაში იწარმოებოდა, ერთ გუნდში გადაინაწილეს. ჩემი ძალაუფლებაა ხალხის ნდობა და სანამ ამას ვგრძნობ, ვალდებულება გამაჩნია ხალხს მოვემსახურო და რაც შემიძლია მათ აუცილებლად გადავცე", - აღნიშნა ბიძინა ივანიშვილმა.
ექსპრემიერმა მინისტრებთან კომუნიკაციაზეც ისაუბრა და აღნიშნა, რომ ერთადერთი მინისტრი, ვისთანაც შეხება აქვს, ეკონომიკის მინისტრია.
"არცერთ მინისტრს, გარდა ეკონომიკის მინისტრისა, უფრო ხშირად მიწევს შეხვედრა ეკონომიკის მინისტრთან ერთი მიზეზით მხოლოდ - ყველაზე მეტს ვცდილობ ეკონომიკას დავეხმარო და ეკონომიკა ვიცი. სხვა მინისტრებთან არანაირი შეხება არა მაქვს“, - განაცხადა ყოფილმა პრემიერმა.
