რას ყვება "მარჯანიშვილის თეატრის" რეჟისორი, რომელიც თბილისურ რესტორანში რუსული სიმღერის შეწყვეტის მოთხოვნის გამო სცემეს

"რესტორნის მუსიკოსებისთვის მოუთხოვია, უგემოვნო რუსულ სიმღერებს ნუ იმღერებთ, სირცხვილია, ჩვენს ბიჭებს ხოცავენ ეგენიო.... დაცვის პოლიცია მოვარდნილა და ექვსი პოლიციელი ერთ ბიჭს ურტყამდა... სანდრო ელოშვილი ახალგაზრდა, ნიჭიერი რეჟისორი, თავის სამშობლოზე უზომოდ შეყვარებული... იმათზე არ ვწერ... სანდროზე ვფიქრობ... საქართველოს გადაშენება არ უწერია!" - თბილისის ერთ-ერთ რესტორანში მომხდარი ინციდენტის შესახებ ინფორმაცია სოციალურ ქსელში მსახიობმა გია როინიშვილმა გაავრცელა.

ამ დღეებში მარჯანიშვილის "სარდაფში" სპექტაკლის "მოხუცი ქალის ვიზიტი" პრემიერა შედგა, რაც შემდეგ მსახიობებმა და დამდგმელმა ჯგუფმა რესტორანში შეკრებით აღნიშნეს, თუმცა ხელოვანების თავშეყრა მთლად მშვიდობიანად ვერ დასრულდა. AMBEBI.GE შეეცადა, ინციდენტის დეტალები თავად ახალგაზრდა რეჟისორისგან გაეგო და სანდრო ელოშვილს დავუკავშირდით.

- სანდრო, იქნებ მოგვიყვეთ რა მოხდა? რესტორანში მართლაც რუსული, უგემოვნო მუსიკის შეწყვეტა მოითხოვეთ?

- აქ საქმე გემოვნებაში არ არის, უბრალოდ 2 დღის მომხდარი იყო სოფელ ხურჩაში ის საშინელი ფაქტი, როცა 30 წლის გიგა ოთხოზორია მოკლეს. ამიტომ, ვთხოვე, რომ მიცვალებულის სულს პატივი მივაგოთ და ცოტა ხანი თავი შევიკავოთ-მეთქი... არა, ისეთი არაფერი მომხდარა, ჩვეულებრივი ამბავი იყო... მერე დაცვის პოლიციასთან, კერძო სამსახურთან მოგვივიდა ჩხუბი.

- მუსიკოსებმა რა გითხრეს?

- მუსიკოსები დაგვთანხმდნენ, უბრალოდ, პატარა შელაპარაკება ხომ ვამბობ, ბოლოსკენ მოგვიხდა. უკვე ეზოში ვიყავით გამოსულები და მოფრინდნენ და მოფრინდნენ...

- თქვენ გცემდნენ?

- კი, მაგრამ ვინ არ უცემიათ?

- ახლა როგორ ხართ?

- კარგად ვარ.

- თქვენთან ერთად კიდევ ვინ იყვნენ?

- მეგობრები, პრემიერის შემდგომი შეკრება გვქონდა და ამას აღვნიშნავდით.

- ე.ი. თქვენ გარდა, სხვებსაც "მოხვდათ"?

- კი, სხვებსაც, მაშინ ეროვნული გმირი მარტო მე გამოვდივარ. კი, ჩვეულებრივად როგორც ხდება ხოლმე, დაიძაბა სიტუაცია...

- როგორ დასრულდა საბოლოოდ?

- არაფერი, დავსხედით მანქანებში და სახლებში წავედით.

ლალი ფაცია

AMBEBI.GE