თელავის ე.წ. ლეგიონის დასახლების მცხოვრებლების ინფორმაციით, თავდაცვის სამინისტრომ მათი გამოსახლება დაიწყო

თელავის ე.წ. ლეგიონის დასახლებაში მცხოვრებლების ინფორმაციით, თავდაცვის სამინისტრომ კორპუსებიდან მათი გამოსახლება დაიწყო. როგორც ადგილობრივები ამტკიცებენ, დღეს დილიდან დასახლებაში სამხედრო პოლიციის წარმომადგენლები მივიდნენ, რომლებიც ბინებს ლუქავენ.

"ლუქავენ იმ ბინებს, რომელთა მცხოვრებლებიც სახლში არ ხვდებათ, მათ კი ვინც შინ იმყოფება, ბინის დასაცლელად გარკვეულ ვადას აძლევენ", - აცხადებენ ადგილობრივები.

აღნიშნულ დასახლებაში მცხოვრები მოსახლეობის ნაწილს ბინები რეგისტრირებული არ აქვს, თუმცა, როგორც თავად განმარტავენ, რამდენიმე ათეული წელია იქ ცხოვრობენ. მათივე ინფორმაციით, ე.წ. ლეგიონის დასახლებაში არსებულ კორპუსებში ძირითადად სოციალურად დაუცველი მოსახლეობა ცხოვრობს.

"თელავს თინა ხიდაშელის სახით შაჰ აბასი შემოესია. იმის მაგივრად, რომ ხელისუფლებამ მოსახლეობაზე იზრუნოს, მათ სახლებიდან ყრის. აქ ძირითადად სოციალურად დაუცველი ადამიანები ცხოვრობენ. გვპირდებიან, რომ ქირას გადაგვიხდიან, მაგრამ ამის არ გვჯერა. მე სოციალურად დაუცველი არ ვარ და ამ ბინის კეთილმოწყობაში უკვე 16 000 ლარი დავხარჯე. ამ თანხას ვინ ამინაზღაურებს?," - განუცხადა ”ინტერპრესნიუსს” სამხედრო ქალაქის მცხოვრებმა რეზო დომელიშვილმა.

"ინტერპრესნიუსი"