ვინ არის ქართველი მოდელი, რომელმაც საყვარელ მამაკაცს ხელი სთხოვა
გენდერულ თანასწორობაზე ბოლო დროს სულ უფრო მეტს საუბრობენ. ახალი თაობა ცდილობს, ოჯახში ქალმა და მამაკაცმა თანაბრად გაინაწილონ უფლება-მოვალეობები. ბევრი ამას ახერხებს და სხვებს მაგალითსაც აძლევს. ქართველმა მოდელმა ნათია ჩიქოვანმა კი, შეიძლება ითქვას, გენდერული თანასწორობის ახალი პრეცენდენტი შექმნა - მან საყვარელ მამაკაცს, ლუკა ჭოჭუას ხელი სთხოვა!
ამის შესახებ ნათიამ თავადვე დაწერა სოციალურ ქსელში: "მე და ლუკა 2 წელია, რაც ერთად ვცხოვრობთ. ერთად ცხოვრება საუკეთესო საშუალებაა ორი ადამიანის ურთიერთობის გამოსაცდელად და იმ უმნიშვნელოვანესი გადაწყვეტილების მისაღებად, რომელსაც დაქორწინება ჰქვია. ჩვენ ეს ეტაპი გადავლახეთ და მივხვდით, რომ 
მუდამ ერთად ყოფნა გვინდა. ვერასდროს ვხვდებოდი, გოგოები, რომლებსაც დაქორწინება უნდათ, რატომ ელოდებიან ბიჭებს, როდის გადაწყვეტენ ისინი "ხელის თხოვნას", რომ მათ უბრალოდ თქვან დიახ... დამიჯერეთ მეორე მხარეს ყოფნა ბევრად უფრო ამაღელვებელია. ამიტომაც მე დღეს ლუკას დაქორწინება ვთხოვე... P.S მან თქვა - დიახ!"
ნათია ჩიქოვანს სამოდელო სფეროში კარგად იცნობენ, ის ერთ-ერთი გამორჩეული მოდელია და ხშირად ხვდება ქართული და უცხოური მოდური ჟურნალების ფურცლებზე: "ბავშვობიდან ვმუშაობ სამოდელო სფეროში, ამჯერად თაკო ჩხეიძის სამოდელო სააგენტოს მოდელი ვარ. ვსწავლობ ჯიპაში, მაგისტრატურას ვამთავრებ საზოგადოებასთან ურთიერთობის განხრით. ვმუშაობ "აი სი არ ჯგუფში", სადაც აქსესუარების მიმართულებით ვარ მარკეტინგის დეპარტამენტის მენეჯერი.
- რამდენიმე დღის წინ, ქალისთვის უჩვეულო ნაბიჯი გადადგით და თქვენს რჩეულ მამაკაცს ხელი სთხოვეთ. რატომ გადაწყვიტეთ ეს?
- მე და ჩემი შეყვარებული ფემინისტები ვართ. ვცდილობთ გენდერული თანასწორობის თემა წამოვწიოთ არამხოლოდ ჩვენს ოჯახში, არამედ ჩვენს გარშემოც. მე და ლუკა 4 წელია ერთად ვართ, ორი წელია ერთად ვცხოვრობთ. საქათველოდან გამომდინარე, ცალკე ცხოვრების გადაწყვეტილება რთული იყო, მაგრამ ყველა დაგვიდგა გვერდით. გვინდოდა დაგვენახებინა საზოგადოებისთვის, რომ შესაძლებელია ადამიანები იყვნენ ერთად, გამოსცადონ ერთმანეთი და ამის შემდეგ დაქორწინდნენ. ლუკას ხელი მე რომ ვთხოვე, ამ ჟესტითაც მინდოდა საზოგადოებას დაენახა, რომ ადამიანები თანასწორუფლებიანები არიან.
- თუმცა ბევრი გოგო ამას ვერ ბედავს...
- ვერ ვხვდები, რას ნიშნავს ვერ ვბედავ. უარის თქმის შიშის გამო თუ ვერ ბედავენ, ბიჭი ისეთივე ცოდოა უარისთვის, როგორც გოგო. სხვა დაბრკოლებას ვერ ვხედავ. გადასარევი შეგრძნებაა მეორე მხარეს ყოფნა, როცა რაღაცას გეგმავ და საბოლოო პასუხს ელოდები. ორივე ძალიან ბედნიერები ვიყავით და ყველას ვურჩევ ეს გამოსცადოს. მე და ლუკას დაგეგმილი გვქონდა 
ქორწილი, აქამდე ბეჭედის დამზადებას ველოდი, ბეჭედი დამზადდა და ვთხოვე ხელი.
- სიურპრიზი იყო ეს მისთვის?
- კი, ნამდვილად სურპრიზი იყო. მისთვის სიურპრიზების გაკეთება არ გამომდის. იმიტომ რომ ყველაფერს ხვდება, ამ შემთხვევაში კი ბოლო წუთამდე ვერ მიხვდა ვერაფერს და ესეც მიხარია, კარგი სიურპრიზი რომ გამომივიდა.
- სად გაიცანით ერთმანეთი?
- ბავშვობიდან ბევრი საერთო მეგობარი გვყავდა, შორიდან ვიცოდით ერთმანეთის შესახებ, საბოლოოდ წყნეთში, ჩვენი საერთო მეგობრის აგარაკზე მოწყობილ წვეულებაზე გავიცანი ლუკა.
- ვინ არის პროფესიით?
- პროფესიით იურისტია, კონკურენციის სამართლის მიმართულებთ. მუშაობდა სახალხო დამცველის ოფისში, შშმ პირების უფლებებს იცავდა. ბავშვობიდან უყვარს რაგბი და "საზოგადოებრივი მაუწყებლიდან" მიიღო შეთავაზება, სადაც სპორტული რედაქციის ჟურნალისტი და კომენტატორია რაგბის მიმართულებით. მისი ჰობი იქცა პროფესიად და ბედნიერი ვარ, იმას რომ აკეთებს რაც უყვარს.
- როდის აპირებთ ქორწილის გადახდას?
- 13 აგვისტოს გვაქვს დაგეგმილი ქორწილი. ეს იქნება ღია ცის ქვეშ, წყალთან ახლოს. დრეს-კოდი ქნება თეთრი სამოსი. დანარჩენი ყველაფერი სტანდარტულად იქნება.
თამარ ბოჭორიშვილი
AMBEBI.GE
