მამუკა კაციტაძე - ამომრჩეველთა სიიდან ამოღებულია იმ კატეგორიის ამომრჩეველი, რომელიც ყველაზე დიდი საპროტესტო ელექტორატია

"ახალი მემარჯვენეების" თავმჯდომარე, მამუკა კაციტაძე ამომრჩეველთა ერთიან სიაში არსებულ პრობლემებზე პასუხისმგებლობას ხელისუფლებას აკისრებს. როგორც კაციტაძემ "პალიტრანიუსის" ეთერში, გადაცემა "360 გრადუსში" განაცხადა, სამოქალაქო რეესტრის მიერ ამომრჩეველთა სიიდან ამოღებულია 98 ათასი ადამიანი, კერძოდ, ის ამომრჩეველი, რომელმაც სხვადასხვა მიზეზების გამო ბინა გაყიდა, ახალმა მფლობელმა კი მათი მისამართიდან ამოწერა მოითხოვა.

კაციტაძე განმარტავს, რომ ეს ღონისძიება 2014 წელს მიღებული საკანონმდებლო ცვლილების ფარგლებში განხორციელდა, რომლის თანახმადაც საქართველოს საარჩევნო კოდექსის 185-ე მუხლში ჩაიწერა, რომ ამ კატეგორიის ადამიანები არ უნდა იყვნენ ამომრჩეველთა სიაში.

"დღეს მთავარი პასუხისმგებელი ამომრჩეველთა სიაზე და საერთოდ ყველაფერზე, რაც ქვეყანაში ხდება, ბუნებრივია არის ხელისუფლება. სამოქალაქო რეესტრი ამბობს, რომ მათი დათვლით საქართველოში 3 მილიონ 530 ათასი ამომრჩეველია საქართველოში, თუმცა ამავდროულად ის ამბობს, რომ 98 ათასი ამომრჩეველი, ე.წ. რეგისტრაციის მისამართიდან მოხსნილი ამომრჩეველი, ამ ბაზაში არ შეიყვანეს. ეს არის ამომრჩეველი, რომელმაც ბინა სხვადასხვა მიზეზის გამო გაყიდა, ძირითადად ბანკის კრედიტის გამო. ამ ადამიანებს დღეს პირადობის მოწმობა აქვთ და მათ სახელმწიფო ეუბნება - "ბინა ხომ დაკარგე, ახლა ხმის უფლებასაც კარგავ". ამ კატეგორიის ამომრჩეველი ყველაზე საპროტესტო ელექტორატია, ვინც ბინა დაკარგა და არც ერთ ხელისუფლებას არ აწყობს ეს ხალხი ამომრჩეველთა სიაში", - განაცხადა მამუკა კაციტაძემ.