ახალი თოქ-შოუ ქართულ ტელესივრცეში - PALITRANEWS-ის ეთერში "360 გრადუსი" იწყება

მათთვის, ვისთვისაც ქართულ ტელესივრცეში არსებული გადაცემები მომაბეზრებელ ერთფეროვნებად იქცა, მათთვის, ვისაც ფაქტებისა და მოვლენების ობიექტური ანალიზის მოსმენა სურს, მათთვისაც, ვისაც მოვლენების ყველა კუთხიდან დანახვა და განხილვაში მონაწილეობა უნდა - დღეიდან ახალი გადაცემა იღებს სტარტს. დღეს, 3მაისს, PALITRANEWS-ის მაყურებელი 21:00 სააათზე გადაცემა "360 გრადუსი"-ის პირველი თოქ-შოუს შეფასებას შეძლებს.

ანალიტიკური თოქ-შოუ PALITRANEWS-ის ეთერში ყოველდღე, ორშაბათიდან ხუთშაბათის ჩათვლით გავა. გადაცემის წამყვანი ტელესივრცეში ახალი სახე, ეკონომისტი, ლექტორი გიორგი მიქანაძეა. როგორც წამყვანი AMBEBI.GE-სთან საუბრისას აღნიშნავს, გადაცემის სახელის იდეის ავტორი თავად არის. სახელწოდებამ გადაცემის გუნდშიც დიდი მოწონება დაიმსახურა.

"გეომეტრიულად, 360 გრადუსზე იკვრება წრე. შესაბამისად, იდეაც ამის მატარებელია, - ყველა რაკურსიდან ვეცდებით შევხედოთ მოვლენებს, სხვადასხვა აქტუალური საკითხები მოვიცვათ სრულად; თავად წრე გახლავთ ერთიანობის, უსასრულობის, სრულყოფილების სიმბოლო; არის ასევე საწყისის და სასრულის; არის სულიერი ძალისა და სულიერი სამყაროს ნიშანი; დედამიწის სიმბოლოცაა და ზოგადად მთელ სამყაროს მოიაზრებს; სულისა და ღმერთის სიმბოლოც გახლავთ - ძალიან ბევრი აზრი დევს ზოგადად, წრეში. 360 გრადუსი წერტილის ირგვლივ იკვრება.

წერტილი, თავის მხრივ ერთიანობას, ცენტრს, მთლიანობას, აბსოლუტს, ყველა შესაძლებლობასა და ვარიანტს, ალტერნატივებს მოიცავს. იმედია, ეს საინტერესო შინაარსობრივი ენერგეტიკაც დაგვმუხტავს და მოგვეხმარება, ვიმუშაოთ ჩვენი საზოგადოებისა და თითოეული მოქალაქისთვის. წრეს ვკრავთ ჩვენ, ჩვენი მაყურებლები და ჩვენი სტუმრები ერთად, კონკრეტული თემისა და იდეის ირგვლივ. შესაბამისად, გადაცემის ფორმატში გათვალისწინებელია მაყურებელთა ჩართულობაც", - აღნიშნავს გიორგი მიქანაძე.

თოქ-შოუს რეჟისორის, კახა ოთარაშვილის განცხადებით, გუნდს სურდა მსუბუქი, თანამედროვე და არააგრესიული გადაცემა შეეთავაზებინა მაყურებლისთვის, რომელიც აქცენტს დღის მთავარ თემაზე გააკეთებდა, თუმცა განიხილავდა სხვადსხვა აქტუალურ საკითხს: "360 გრადუსი იმიტომ დავარქვით, რომ ეს არ არის გადაცემა ერთი მიმართულებით. ჩვენ ვილაპარაკებთ ყველაფერზე, მაგრამ აქცენტს დღის მიმდინარე მთავარ მოვლენაზე გავაკეთებთ", - აღნიშნავს კახა ოთარაშვილი.

თოქ-შოუს წამყვანის, გიორგი მიქანაძის განმარტებით, გადაცემაზე მომუშავე გუნდმა ბევრი იშრომა იმისთვის, რომ მაყურებელს განსხვავებული და საინტერესო გადაცემა ეხილა:

"ბევრი ვიფიქრე, რომ განსხვავებული ყოფილიყო გადაცემა. ამის სურვილი მაქვს მეც და მთელ გუნს, ვინც ამ გადაცემას აკეთებს. ძალიან მაგარი ხალხია, საქმის მცოდნე, მონდომებული. საერთოდ, მთელი "პალიტრა მედია" საინტერესოდ აწყობილი სისტემაა. მჯერა, რომ კარგ შედეგს დავდებთ. ერთი, რაც ვიცი არის ის, რომ ჩვენი ორიენტირი არ იქნება რეიტინგებზე მუშაობა. არასდროს მოვიყვანთ სტუმარს იმის მიხედვით თუ ვინ ვის წაეკიდება ეფექტურად, ანთხევს სანახაობრივ ღვარძლს, აგრესია, რომ შემდგომ სეირი ვანახოთ მაყურებელს, დავზაფროთ და აზრი იყოს გამოცლილი ამ ყველაფრისგან. ჩვენ გავაკეთებთ საქმეს, გვექნება კონკრეტული მიზანი, იდეა. ამ საქმის შესაბამისად, გამოჩნდება რეიტინგები და არა პირიქით", - ამბობს გიორგი მიქანაძე და იმედოვნებს, რომ მაყურებლის დახმარებით, გუნდი კარგი შედეგების მიღწევას შეძლებს:

"ვეცადეთ ქართული ბაზრისთვის განსხვავებული ფორმატი მოგვეფიქრებინა, ვნახოთ როგორ გამოგვივა. ძალიან დიდი იმედი გვაქვს, რომ თავად მაყურებელი მიხვდება, რომ მათთვის ვმუშაობთ, იქნებიან აქტიურ თანამშრომლობაში და კონტაქტში ჩვენთან. შესაბამისად, ერთად შევძლებთ კარგი შედეგების დადებას" - აღნიშნავს გიორგი მიქანაძე.

მისივე თქმით, გადაცემის ფორმატიდან გამომდინარე, მაყურებელი წამყვანის პოზიციის მოსმენასაც შეძლებს: "როგორც მოგეხსენებათ, გადაცემა საავტოროა და ანალიტიკური. შესაბამისად, ფორმატი წამყვანისგან, რაღაც თვალსაზრისით, მოითხოვს საკუთარი აზრისა და პოზიციების ჩამოყალიბებას, გამოხატვას. ჩემთვის მთავარი აზრი და იდეა ჩვენი საზოგადოების, თითოთოეული მოქალაქის და ჩვენი ქვეყნის სამსახურში ყოფნაა. მსიამოვნებს და მახარებს, როცა ვაცნობიერებ, რომ ვიღაცის სამსახურში ვარ და ჩემს ქმედებას მოყვება კონკრეტული დადებითი შედეგი, აქვს მიზანი და იდეა. გამომდინარე აქედან, თუ ეს მიზანი ჩვენი საზოგადოება, მოქალაქეები და ჩვენი ქვეყანაა, შემიძლია მხოლოდ ვიამაყო ამით, რომ ამ სამსახურში ვიყო და კიდევ უფრო მეტი მოვთხოვო საკუთარ თავს", - ამბობს გიორგი მიქანაძე.

რამდენად გაამართლებს გაადაცემის გუნდისა და წამყვანის მიზნებს თოქ-შოუ და რამდენად შეძლებს ის, საზოგადობის ყურადღების, ნდობისა და სიმპათიის დამსახურებას, ამას უკვე მაყურებელი დღეს, "360 გრადუსის" ყურებისას შეაფასებს.

დაათვალიერეთ ფოტოები: როგორ მიმდინარეობს მზადება გადაცემისთვის

თამარ კორკოტაშვილი

AMBEBI.GE