8
ივნისიდღის ზოგადი ასტროლოგიური პროგნოზი
საქართველოს მიმდინარე კვირის ბოლოს გაეროს გენერალური მდივანი ბან კი მუნი ეწვევა. საგარეო საქმეთა სამინისტროს ცნობით, გაერო-ს გენერალური მდივნის ოფიციალური ვიზიტი 23-24 აპრილს შედგება, რის ფარგლებშიც ბან კი მუნი საქართველოს საკანონმდებლო და აღმასრულებელი ხელისუფლების წარმომადგენლებს შეხვდება.
საინტერესოა ის ფაქტი, რომ 1994 წლის შემდეგ ეს იქნება გენერალური მდივნის პირველი ოფიციალური ვიზიტი საქართველოში. გაერო-ს გენერალური მდივანი, ბან კი მუნი თბილისს საქართველოს პრემიერ-მინისტრის მოწვევით ესტუმრება, რის შემდეგაც ვიზიტს სომხეთსა და აზერბაიჯანში განაგრძობს.
ის, რომ გაეროს გენერალური მდივნების ვიზიტით საქართველო განებივრებული არ არის, ცხადია. AMBEBI.GE შეეცადა გაერთიანებული ერების ორგანიზაციის ხელმძღვანელი პირების საქართველოში ვიზიტის ქრონოლოგია და სხვა საინტერესო დეტალები გაეხსენებინა.
როგორც ზემოთ მოგახსენეთ, პირველად გაეროს უმაღლესი თანამდებობის პირი საქართველოს 1994 წელს ესტუმრა. მაშინ გაეროს ეგიდით მიმდინარე სამშვიდობო პროცესი ახალი დაწყებული იყო და ამ პროცესმა, აფხაზეთის კონფლიქტის მოწესრიგების კუთხით, წარმატებები ვერ მოიტანა. ბუტროს ბუტროს გალის თბილისში ვიზიტს წინ უძღოდა ედუარდ შევარდნაძის მიერ 1993 წლის 2 ივლისს მისთვის გაგზავნილი ოფიციალური წერილი, რომელშიც საქართველოს ყოფილი პრეზიდენტი გაეროს გენერალურ მდივანს აფხაზეთში შექმნილ მძიმე კონფლიქტურ სიტუაციაში გარკვევას სთხოვდა: "ვითარება იმდენად დაძაბულია, რომ მას შეიძლება მოჰყვეს კონფლიქტის მასშტაბის გაუთვალისწინებელი გაფართოება, რაც მაიძულებს კიდევ ერთხელ მოგმართოთ თხოვნით, განიხილოთ ეს საკითხი უშიშროების საბჭოს სხდომაზე" - აღნიშნავდა პრეზიდენტი წერილში.
აფხაზეთის კონფლიქტის მოგვარების საკითხში გალის წვლილზე ბევრს ვერაფერს გეტყვით, თუმცა გენმდივნის თბილისური ვიზიტიდან ქართული და უცხოური მედიის მეხსიერებას ერთი კურიოზული ინციდენტი შემორჩა. ბუტროს ბუტროს გალი თბილისში ვიზიტის დროს, გაეროს მშენებარე ოფისის დასათვალიერებლად წაიყვანეს. შენობის მონახულებისას გენერალურ მდივანს ფეხი დაუცდა და მეორე სართულიდან ჩამოვარდა. ინციდენტის შედეგად მას სერიოზული დაზიანებები არ მიუღია, თუმცა ჟურნალისტებთან და ოფიციალურ პირებთან შეხვედრა გაეროს მაღალჩინოსანს შუბლზე მოზრდილი "კოპით" უწევდა. ცნობისთვის, ბუტროს ბუტროს გალი გაეროს გენერალურ მდივნად 1992 წელს აირჩიეს. ის არაბული ქვეყნის პირველი და დღემდე უკანასკნელი წარმომადგენელი იყო ამ თანამდებობაზე.
2005 წლის 19 ნოემბერს თბილისს რამდენიმე საათით გაეროს გენერალური მდივანი კოფი ანანი ეწვია. ვიზიტი არაოფიციალური, მეტიც მოულოდნელი იყო. ახლო აღმოსავლეთში სტუმრობისას კოფი ანანმა საქართველოში ჩამოსვლის თაობაზე გადაწყვეტილება სპონტანურად მიიღო. გაეროს გენერალურ მდივანს თბილისის აეროპორტში საქართველოს საგარეო საქმეთა მინისტრი გელა ბეჟუაშვილი დახვდა, ოფიციალური შეხვედრა კი პრეზიდენტთან შედგა. "საქართველოს უნდა ჰქონდეს გაეროს იმედი", - ამ სიტყვებით დაასრულა გაეროს გენერალურმა მდივანმა თავისი რამდენიმესაათიანი ვიზიტი საქართველოში.
მაშინდელი მედიით ვრცელდებოდა ცნობა, რომ კოფი ანანმა საქართველოში ხანმოკლე ვიზიტის განხორციელება მოულოდნელად გადაწყვიტა აფხაზეთში, კერძოდ კი, გალის რაიონში ვითარების დაძაბვასთან დაკავშირებით. აღნიშნულის თაობაზე კი ის საქმის კურსში მისმა პირადმა წარმომადგენელმა საქართველოში ჰაიდი ტალიავინიმ ჩააყენა.
ქრისტინე გამთენაძე
AMBEBI.GE
