როგორ მოვამზადოთ განსაკუთრებული სააღდგომო პასკა - აუცილებლად გასათვალისწინებელი რჩევები გამოცდილი კონდიტერისგან

აღდგომის ბრწყინვალე დღესასწაულის მოახლოებასთან ერთად, ოჯახებში სადღესასწაულო მზადება, სამზარეულოებში კი, ტრადიციული ფუსფუსი იწყება. დიასახლისების ნაწილს, დატვირთული დღის რეჟიმისა და მოუცლელობის მიუხედავად, ურჩევნია სააღდგომო სუფრის ერთ-ერთი მთავარი შემადგენელი ნაწილი - პასკა თავად მოამზადოს და კვერცხებიც თავად შეღებოს.

იმისათვის, რომ დიასახლისებს სურვილი და მონდომება წყალში არ ჩაეყაროთ და პასკა ძალიან გემრიელი გამოუვიდეთ, გადავწყვიტეთ, რჩევები იტალიური ბრენდის "ჩი გუსტა!"-ს კონდიტერისთვის გვეკითხა. მირანდა ხაჩიძე პირად რეცეპტს გაგიმხელთ, გირჩევთ, რა შეცდომები არ უნდა დაუშვათ პასკის მზადებისას, გაგანდობთ როგორ უნდა მოიქცეთ ცომის მოზელვისას და რა უნდა გაითვალისწინოთ ცხობის პროცესში.

- პირველ რიგში, რა უნდა იცოდეს, რა უნდა გაითვალისწინოს მზარეულმა, პასკის ცხობის დაწყებისას?

- გასათვალისწინებელია მზარეულს უნდოდეს, რომ პასკა გემრიელი გამოუვიდეს. გულით უნდა გააკეთოს, თუ გულით გააკეთებს, გემრიელი გამოუვა. მნიშვნელოვანია დაიცვას ინგრედიენტები, გასათვალისწინებელია თანმიმდევრობა, ნებისყოფა. უნდა დაელოდოთ გაფუებას, ჯობია, საფუარი ბევრი არ უქნათ, რადგან გემოზე მაინც მოქმედებს. როდესაც ცომი ამოვა, უმჯობესია სამჯერ ჩაზილოთ. აფუებამდე ცომი კარგად უნდა მოიზილოს. ზელვის პროცესი მთავარია.

- ზოგ პროდუქტს რბილი, ზოგს კი, მაგარი ცომი სჭირდება. როგორი უნდა იყოს პასკის ცომი?

- პასკის ცომი საშუალო უნდა იყოს, არ უნდა იყოს რბილი. ზელვას რომ იწყებ ყველაფერი ხელზე გეკრობა, პროცესში ნელ-ნელა გშორდება ხელებიდან. ცომი უნდა ზილოთ იმდენი ხანი, რამდენი ხანიც ნებისყოფა გეყოფათ, უკეთესი გამოვა. კარგი იქნება ნახევარი საათის განმავლობაში ხელში დამუშავებული ცომი.

-რა დანამატები უხდება პასკას? ზოგი ქიშმიშით, ზოგი კი, ცუკატებით აკეთებს.

- საჭიროა სამი ინგრედიენტი - დარიჩინი, ილი და მიხაკი. სხვა დანარჩენი, იმპროვიზაციის საკითხია. პირადად მე, ქიშმიში არ მიყვარს და არ ვუმატებ, სამაგიეროდ, ვუკეთებ ბევრ ცუკატს. შაქარს ვაკლებ, რადგან ვცდილობ ზევიდან მინანქარი გავუკეთო, ან შაქრის ფხვნილი მოვაყარო.

- რა შეცდომებს უშვებენ მზარეულები ყველაზე ხშირად პასკის ცხობისას?

- ცომი ყველა ვარიანტში აფუვდება, მაგრამ რასაც ვაკვირდები, ზოგჯერ მზარულებს ნებისყოფა არ ყოფნით. რაც უფრო დიდ ხანს მოზილავთ, უფრო კარგი გამოდის. ამაშია საქმე. გიყვარს, ეფერები, ელოლიავები. გაფუებასაც და ზელვასაც უნდა დაელოდო. თუ სისქე დააკლდება, წყალს ვუმატებთ.

- ცხობას რამდენი დრო სჭირდება?

- გააჩნია, რა ზომის ფორმაში ჩადებთ ცომს. რაც უფრო პატარაა ფორმა, მით მალე ცხვება. პატარა ფორმებს დაახლოებით, ნახევარი საათი ეყოფა ცხობისთვის. საუკეთესოა ქვის ღუმელში გამოცხობა, სახლის პირობებში გაზის ღუმელში, შესაძლებელია ელექტრო ღუმელის გამოყენებაც. ცომი ფორმაში ნახევარზე ნაკლები უნდა ჩაასხათ. ესეც ხშირად ეშლებათ. ფორმაში გაფუების შემდეგ, ცომი კიდევ უნდა გააჩეროთ. ოთახის ტემპერატურაზე ისევ ველოდებით გაფუებას. ცომი ფორმის ნახევარს რომ აცდება, წინასწარ გახურებულ ღუმელში შედგამთ. ფორმა ღუმელში უნდა შეივსოს.

- მოდით, ჩვენს მკითხველს ინგრეტიენტების ზუსტი რაოდენობა შევთავაზოთ, მაგალითად, 4-5 სულიანი ოჯახისთვის გამოვაცხოთ პასკა.

- საშუალო ზომის 6-7 ცალი პასკის მოსამზადებლად დაგვჭირდება 10 კვერცხი, ერთი კილო - კილონახევარი შაქარი. გოგლიმოგლს ცალკე ვთქვიფავთ. ცალკე ვაყენებთ საფუარს რძეში. 25 გრამ საფუარს ლიტრ თბილ რძეში გავხსნით. ვუმატებთ ნახევარ-ნახევარ ჩაის კოვზ ილის, დარიჩინსა და მიხაკს. გვჭირდება 300 გრამამდე გამლღვალი, არაადუღებული კარაქი. სამ კილომდე ფქვილში ვასხამთ გოგლიმოგლს, ვურევთ ცხიმს - დამდნარ კარაქს, ვამატებთ რძეს და საფუარს და ვიწყებთ ზელვას. ეს ყველაფერი ცალ-ცაკლე უნდა იყოს გამზადებული. ვზელთ ხელით. სილიკონის ხელთათმანებს თუ გაიკეთებთ, ცომი ხელზე არ მიგეკრობათ. ვზელთ 15-20 წუთი, როდესაც გახდება ერთი მასა, ხელზე არ მოგვეკრობა, ვუმატებთ ცუკატებს და ვაგრძელებთ ზელვას ცუკატებთან ერთად.

ცომი არ უნდა იყოს არც მაგარი, არც ძალიან თხელი. ისეთი კონსისტენცია უნდა ჰქონდეს, რომ ზელვა გსიამოვნებდეთ. ცომს გასაფუებლად თბილ ადგილას ვტოვებთ. ზევიდან მხოლოდ ნაჭერს ვაფარებთ. არ ვფუთავთ. ვაჩერებთ დაახლოებით 20 წუთი. შემდეგ ისევ უნდა ჩავზილოთ. კარგი იქნება, სამჯერ ჩაზილვა. შემდეგ უნდა ჩავდოთ ფორმებში და იქაც ველოდებით გაფუებას. მე საღამოს ვზელ, ღამე ორჯერ ვდგები, ჩავაბრუნებ, დილით ვაცხობ.

- ძველად ფორმებისთვის კონსერვის ქილებს იყენებდნენ. რა მასალის ფორმის გამოყენება არის უმჯობესი პასკის ცხობისას?

- ყველაზე კარგია ქაღალდის ფორმები, რომელიც საკონდიტრო ნაწარმის მაღაზიებში იყიდება. კონსერვის ქილები ბებიების რეცეპტის შემადგენელია. მათ ბევრი დამუშავება ჭირდება. ქაღალდს არაფრის წასმა არ უნდა. ცომის გადმოღებისას ფქვილიანი ხელები არ გჭირდებათ. შესაძლოა, ხელზე ზეთი შეიზილოთ. თავი მომრგვალებული უნდა ჰქონდეს. ნაოჭიანი მხარე ფორმის ქვემოთ მოაქციეთ, ზევით თავი მოუმრგვალეთ. ფორმებს წინასწარ გაცხელებულ ღუმელში ვდგამთ. ტემპერატურა უნდა იყოს საშუალოზე დაბალი. თავიდან უნდა დავაყენოთ 150 გრადუსზე, შემდეგ აუწევთ 180 გრადუსზე. დიდ ზომებს ცხობისთვის დაახლოებით 45 წუთი დასჭირდება.

- რითი შეიძლება გავაფორმოთ გამომცხვარი პასკა?

- გამოცხობის შემდეგ, მომრგვალებულ თავზე პასკას შესაძლოა თეთრი ან შავი მინანქარი გავუკეთოთ. თეთრი მინანქარი ასე მზადდება: სამ კვერცხის ცილას ხელის სათქვეფით ავთქვიფავთ. როდესაც აქაფდება, დავუმატებთ შაქრის ფხვნილს, ამით განვსაზღვრავთ სისქეს. არ უნდა იყოს არც ძალიან თხელი, არც ძალიან სქელი. დავასხამთ გამომცხვარ პასკას. უნდა დაველოდოთ გაშრობას. ეს არის თეთრი მინანქარი. შავი მინანქარი კი ასე მზადდება - გავალღოთ მთლიანი შავი შოკოლადი, დავუმატოთ ერთი სუფრის კოვზი ნაღები, ერთი სუფრის კოვზი რძე, არ უნდა ავადუღოთ, მოვასხათ მინანქარი თავზე.

მაშ ასე, ახლა თქვენ უკვე იცით, როგორ მზადდება უგემრიელესი პასკა ოჯახურ პირობებში. თუ მაინც მზა პროდუქტის შეძენას გადაწყვეტთ, "ჩი გუსტა"!-ს სიახლე სწორედ თქვენთვისაა. იტალური ბრენდი სააღდგომოდ პანეტონეს წარმოებას იწყებს! 18 აპრილიდან ჭავჭავაძის 7-ში და ვაჟა-ფშაველას 47-ში მდებარე "ჩი გუსტა!"-ს ობიექტებში პასკები გაიყიდება. ეს იქნება კლასიკური, ქიშმიშიანი პანეტონე. შეთავაზებაში იქნება სამი ზომის პასკა - კილოგრამიანი, 800 და 500 გრამიანი. მათი ფასი შესაბამისად - 15, 12 და 8 ლარი იქნება.

მომხმარებლებს შეუძლიათ შეკვეთა ადგილზე გააკეთონ. სურვილის შემთხვევაში, მათ პანეტონეს ქიშმიშის გარეშე, ან ცუკატებით დაუმზადებენ. დაინტერესებულ მომხმარებლებს შეუძლიათ დარეკონ "ჩი გუსტა!"-ს ნომერზე 577 01 29 48. შესაძლებელია ადგილზე მიტანის სერვისით სარგებლობაც. პანეტონეს ადგილზე მიტანა "ფუდპანდას" საშუალებით იქნება შესაძლებელი.

ნატალია დადიანი, AMBEBI.GE