12
ივნისიდღის ზოგადი ასტროლოგიური პროგნოზი
აშშ-ის სახელმწიფო დეპარტამენტმა ადამიანის უფლებების შესახებ მორიგი ანგარიში გამოაქვეყნა. ანგარიში 2015 წელს ადამიანის უფლებების მხრივ არსებულ ვითარებას ეხება და მასში საქართველოზეც არის საუბარი.
დოკუმენტში აღნიშნულია, რომ 2012 წელს საქართველოში ჩატარებული საპარლამენტო არჩევნების შემდეგ მთავრობის გადაცემა დემოკრატიული გზით პირველად მოხდა დამოუკიდებლობის მოპოვების შემდეგ, თუმცა, ქვეყანაში ჯერ კიდევ არის რიგი პრობლემები.
"2015 წლის განმავლობაში ადამიანის უფლებების მხრივ არსებულ ყველაზე მნიშვნელოვან პრობლემებს წარმოადგენდა: ოკუპირებულ ტერიტორიებთან ადმინისტრაციულ საზღვარზე რუსეთის, ან დე ფაქტო ძალების მიერ საქართველოს მოქალაქეების თვითნებური დაკავებები; მნიშვნელოვანი ხარვეზები მართლმსაჯულებაში, მათ შორის სასამართლოზე ზეწოლა საქმეების შერჩევისას, საეჭვო სასამართლო დანიშვნები, ძალადობისა და შეურაცხყოფის შემთხვევებზე მთავრობის შეუსაბამო რეაგირება, დაუსრულებელი გამოძიებები, სასამართლო პროცესის დაწყებამდე შეუსაბამო დაპატიმრებები; ქალების, ეთნიკური, რელიგიური და სექსუალური უმცირესობების, ასევე შეზღუდული შესაძლებლობების მქონე პირების მიმართ დისკრიმინაციის წინააღმდეგ ბრძოლისთვის მთავრობის არასაკმარისი მცდელობები", - წერია აშშ-ის სახელმწიფო დეპარტამენტის მიერ გამოქვეყნებულ დოკუმენტში.
ანგარიშში ასევე აღნიშნულია სხვა პრობლემებიც, მათ შორის, პოლიტიკური ზეწოლა დამოუკიდებელ ტელემაუწყებელზე, შეკრებისა და გაერთიანების თავისუფლების შეზღუდვა, პოლიტიკური ოპოზიციიის წინააღმდეგ ძალადობა, კორუფცია, ოჯახური ძალადობა ქალების წინააღმდეგ, ნაადრევი ქორწინებები, სამართალდამცავი უწყებების მხრიდან ძალაუფლების ბოროტად გამოყენების შემთხვევებზე რეაგირების არაეფექტური მექანიზმი.
გარდა ამისა, დოკუმენტში საუბარია ოკუპირებულ რეგიონებზეც, რომლებიც ცენტრალური მთავრობის კონტროლს მიღმაა დარჩენილი.
"რუსმა მესაზღვრეებმა შეუზღუდეს ადგილობრივ მოსახლეობას გადაადგილების უფლება. მცირე ოფიციალური ინფორმაცია არსებობს აფხაზეთსა და სამხრეთ ოსეთში ადამიანის უფლბებისა და ჰუმანიტარული ვითარების შესახებ, ვინაიდან შეზრუდული წვდომაა ამ რეგიონებზე", - აღნიშნულია დოკუმენტში.
ანგარიშში საუბარია ასევე ყოფილი მაღალჩინოსნების წინააღმდეგ მიმდინარე სასამართლო საქმეების შესახებ.
"მარტში გენერალურმა პროკურატურამ ყოფილ პრეზიდენტ სააკაშვილს, ყოფილ პრემიერ-მინისტრ და შინაგან საქმეთა მინისტრ, ივანე მერაბიშვილთან, ასევე იუსტიციის ყოფილ მინისტრ ზურაბ ადეიშვილთან, თავდაცვის ყოფილ მინისტრ დავით კეზერაშვილთან და თბილისის ყოფილ მერ გიორგი უგულავასთან ერთად ბრალი წაუყენა 2007 წელს ანტისამთავრობო აქციების ძალადობრივი გზით დაშლაში მონაწილეობაში, ძალაუფლების გადაჭარბებასა და ტელეკომპანია "იმედში" ჩატარებულ სპეცოპერაციაში მონაწილეობასა და ბადრი პატარკაციშვილის კუთვნილი აქციების კონფისკაციაში. გენერალური პროკურატურის მიხედვით, სააკაშვილმა აქციის დაშლის ბრძანება გასცა და მთავრობის ლიდერებს პატარკაციშვილის ქონების - მთაწმინდის პარკისა და ტელეკომპანია "იმედის" საკუთრების წართმევა დაავალა მთავრობის ქმედებების კრიტიკულად გაშუქების გამო", - ნათქვამია ანგარიშში.
დოკუმენტში ასევე საუბარია ციხეებში პატიმრების წამებისა და თავისუფლების უკანონო აღკვეთის შესახებ ყოფილი მაღალჩინოსნების წინააღმდეგ არსებულ საქმეებზეც.
"დეკემბერში გენერალურმა პროკურატურამ ბრალი წაუყენა თავდაცვის მინისტრის ყოფილ მოადგილე დავით ახალაიას, გენშტაბის უფროსის ყოფილ მოადგილე გიორგი კალანდაძეს, სამხედრო პოლიციის დეპარტამენტის ყოფილ უფროს მეგის ქარდავას, შინაგან საქმეთა სამინისტროს კონსიტუციური უსაფრთხოების დეპარტამენტის აფხაზეთის მთავარი სამმართველოს ყოფილ უფროს რომან შამათავას ციხეში წამებისა და თავისუფლების უკანონო აღკვეთის საქმეებზე. გენერალური პროკურატურის მიხედვით, ახალაიამ, კალანდაძემ, ქარდავამ და შამათავამ 2012 წელს ელბერტ კობერიძეს სცემეს და მის წინააღმდეგ მხუთავი აირი გამოიყენეს იმ მიზნით, რომ მას ეღიარებინა ტერორისტული აქტის მომზადება", - აღნიშნულია აშშ-ის სახელმწიფო დეპარტამენტის ანგარიშში.
გარდა ამისა, ანგარიშში საუბარია ასევე საქართველოში მედიის თავისუფლების მხრივ არსებულ ვითარებაზე. დოკუმენტში აღნიშნულია ტელეკომპანია "იმედში" პოლიტიკური თოქშოუების დახურვის ფაქტი.
"29 აგვისტოს, ქვეყნის რიგით მეორე წამყვან ტელეკომპანია "იმედმა" მოულოდნელად გამოაცხადა ორი პოპულარული პოლიტიკური გადაცემის შეჩერება და შოუების კარგად ცნობილი წამყვანის ინგა გრიგოლიას გათავისუფლება. გრიგოლიამ გადაცემების დახურვას და მის გათავისუფლებას პოლიტიკურად მოტივირებული უწოდა", - წერია ანგარიშში.
დოკუმენტში საუბარია "რუსთავი 2"-ის საქმეზეც: " შემაშფოთებელი იყო მთავრობის ჩარევა ქვეყნის ყველაზე ყურებადი სატელევიზიო არხის, "რუსთავის 2"-ის საქმეებში".
ანგარიშში აღნიშნულია ჟურნალისტების მიმართ პოლიციის მიერ ფიზიკური და სიტყვიერი შეურაცხყოფის ფაქტებიც. "2015 წლის 15 სექტემბერს ქალაქ ოზურგეთში პრემიერ-მინისტრის ვიზიტის დროს, სამართალდამცველმა "მაესტროს" ჟურნალისტი აიძულა განზე გამდგარიყო იმისთვის, რომ მან პრემიერ-მინისტრს "უხერხული" შეკითხვა დაუსვა", - წერია ანგარიშში.
დოკუმენტში ასევე აღნიშნულია, რომ მაღალჩნოსნები აგრძელებდნენ მედიაზე სიტყვიერ ზეწოლას. მაგალითად, გასული წლის მარტში გამართულ პრესკონფერენციაზე პრემიერმა წამყვანი მედიასაშუალებები სამთავრობო პროექტების არასაკმარისად გაშუქებასა და "აბსოლუტურად განსხვავებული რეალობის შექმნაში" დაადანაშაულა.
