ქვემო ფონიჭალაში მომხდარ მკვლელობასთან დაკავშირებით დამატებითი დეტალები გახდა ცნობილი. ავტოსახელოსნოში მყოფ პირებს თავდამსხმელებმა მწვანე ფერის "ოპელის" მარკის ავტომობილიდან გაუხსნეს ცეცხლი.
როგორც "ინტერპრესნიუსს" ერთ-ერთმა ადგილობრივმა, მამედ ჰუსეინოვმა განუცხადა, გარდაცვლილები რუსეთში საქმიანობდნენ, სადაც მათ გარკვეული ბიზნესი ჰქონდათ. მისივე თქმით, მკვლელობა, შესაძლოა, სწორედ ბიზნესინტერესებს უკავშირდებოდეს.
ერთ-ერთი გარდაცვლილი საქართველოში რუსეთიდან ორი დღის წინ დაბრუნდა.
ადგილობრივების თქმით, თავდასხმა სწორედ მასზე განხორციელდა, ხოლო მეორე გარდაცვლილი შემთხვევით მოკლეს. რაც შეეხება დაჭრილს, ის ამ სახელოსნოში ელექტრიკოსად მუშაობდა.
ქვემო ფონიჭალაში შეიარაღებული თავდასხმა რამდენიმე საათის წინ მოხდა. მოკლულია ორი ადამიანი და დაჭრილია ერთი. შსს-ს ინფორმაციით, მომხდარზე გამოძიება სისხლის სამართლის კოდექსის 109-ე მუხლითაა აღძრული, რაც განზრახ მკვლელობას გულისხმობს.
