ვინ არის ქალი, რომელმაც თამარ მეფე განასახიერა - პირველი ფილმი საქართველოს "ოქროს ხანის" მონარქზე

"მე ვარ ანა მატუაშვილი, თუმანიშვილის თეატრის მსახიობი. ვარ ასევე დიდთვალება ნინის დედა. მყავს არაჩვეულებრივი მშობლები, ძმა და საყვარელი ადამიანი, რომელიც ყოველთვის ჩემ გვერდით არის", - ასე გამეცნო რესპონდენტი, რომელსაც საკუთარი თავის წარდგენა ვთხოვე.

ცოტა ხნის წინ მას საპასუხისმგებლო ამოცანის შესრულება მოუხდა - საქართველოში პირველად თამარ მეფეზე გადაღებულ მხატვრულ-დოკუმენტურ ფილმში ქართველი დიდებული მეფის როლი შეასრულა. მსახიობის პროფესიას 1999 წელს შეუდგა, როდესაც თეატრალურ უნივერსტეტში ჩააბარა და რეზო ჩხეიძის სახელოსნოში მოხვდა. ეს იყო პირველი კინოსამსახიობო ჯგუფი. ინსტიტუტის დამთავრების შემდეგ, დებიუტი რუსთაველის "თეატრალურ სარდაფში" გოგი ქავთარაძის სპექტაკლში - "მე ვხედავ მზეს" შედგა, სადაც ქეთო მამიდას თამაშობდა. შემდეგი ნამუშევარი ისევ "სარდაფში", ისევ გოგი ქავთარაძის სპექტაკლი ''ვთამაშობთ ჩეხოვს" (რანევსკაია) იყო, მერე კი ახმეტელის თეატრში, ნუგზარ ლორთქიფანიძის სპექტაკლ - "ვერაგობა და სიყვარული" (ლედი მილფორდი) გამოჩნდა. დღეს ის თუმანიშვილის თეატრის მსახიობია და ნუგზარ ბაგრატიონის წარმოდგენაში - "გაზაფხული მაინც მოვა" თამაშობს. ეს მხოლოდ ისჩამონათვალია, რითაც ამ თეატრების სცენებზე პირველად წარსდგა.

იხილეთ ფილმის თრეილერი

"ამ წარმოდგენებს ბევრი, ჩემთვის მნიშვნელოვანი სპექტაკლი და როლი მოჰყვა არაერთ საინტერესო რეჟისორთან და აი, თანდათან ჩავები თეატრალურ ფერხულში" - ამბობს ანა.

- ცოტა ხნის წინ, რეჟისორმა ლევან ლომაშვილმა გადაიღო მხატვრულ-დოკუმენტური ფილმი - "თამარი", რომელიც ჩვენს სახელოვან მეფეს მიუძღვნა. ამ სურათში მთავარი როლი გერგოთ, თამარი განასახიერეთ. თავიდან როგორ შეხვდით ამ წინადადებას? ადვილად დათანხმდით?

- რომ გითხრათ, როდესაც შემოთავაზება მივიღე მაშინვე სიხარულით ავიტაცე ეს წინადადება-მეთქი, ტყუილი იქნება. ალბათ ეს რეაქცია ბუნებრივიც იყო. გავვოცდი და შევშინდი. მე და ლევანი ერთმანეთს არ ვიცნობდით. წარმოიდგინეთ, უცებ მოდის ახალგაზრდა რეჟისორი იმ იდეით, რომ თამარ მეფეზე ფილმის გადაღება სურს და თამარის როლზე მის წარმოსახვაში მე მოვიაზრები. ამ ფაქტმა, რასაკვირველია, საშინლად დამაბნია. მახსოვს, ლევანს დრო ვთხოვე მოსაფიქრებლად, თუმცა გულის სიღრმეში, ირიალურად აღვიქვამდი ამ პროექტის განხორციელებას და ვაღიარებ, რომ ამით გარკვეულწილად თავსაც ვიმშვიდებდი. მაგრამ შემოქმედებითი ჯგუფი ლევანთან ერთად, იმდენად მობილიზებული და მომზადებული აღმოჩნდა, რომ ამ შემართებამ ჩემში გაჩენილი პირველი ემოცია სულ გადაფარა. ისინი ყველანირად მზად იყვნენ და იმდენად დამაჯერებლად გამოიყურებოდნენ, რომ ამან ძალა მომცა. ამიტომ მათი საოცარი ენთუზიაზმის საპასუხოდ, ჩემში გაჩენილ ყველა დაბრკოლებას გადავაბიჯე და საქმეში მათსავით ჩავები. შემოქმედებითი ჯგუფი ფილმზე ორი წლის განმავლობაში მუშაობდა. ფილმი შემეცნებით-დოკუმენტურ ხასიათს ატარებს, რომელშიც ასახულია თამარ მეფის შესახებ რამდენიმე საკვანძო მხატვრული სცენა.

- როდესაც უკვე დათანხმდით, რა იყო მუშაობისას თქვენთვის მთავარი და მნიშვნელოვანი?

- უპირველესი და უმთავრესი ფაქტორი იყო, დაკისრებულ პასუხისმგებლობაზე თავის სწორად გართმევა.

ასევე წაიკითხეთ: "სულ რომ მელ გიბსონს გადაეღო, ყველა ფილმში შეიძლება რაღაც მოგეწონოს, ან - არა" - როგორ გადაიღეს პირველი ფილმი თამარ მეფეზე

- როლზე მუშაობისას რა სირთულეები გამოიკვეთა?

- რა საკვირველია, სირთულეებს ვერ ავცდებოდი. ყველა როლი ერთნაირად რთულია, როდესაც პირველად იწყებ მასთან შეხებას და მის სრულყოფამდე უამრავ დაბრკოლებასთან გიწევს ჭიდილი. ლიტერატურა გაძლევს ფრენის საშუალებას, მაგრამ როდესაც საქმე ეხება ისტორიულ გმირს, ფენომენს, თამარ მეფეს, სადაც არ გაქვს უფლება, იყო თავისუფალი, ყველა ნიუანსი და დეტალიც კი სიფრთხილეს მოითხოვს: არავითარი იმპროვიზაცია და საკუთარი აღქმა, ამ შემთხვევაში ყველაფერი გათვლილია და მკაცრად დადგენილ ჩარჩოებში გიხდება მოქმედება.

- საქართველოში ყველას თავის თამარი ჰყავს. როგორი წარმოგედგინათ მანამდე ეს მეფე?

- თამარ მეფე პირველი ქალი მონარქი გახლავთ საქართველოს ისტორიაში, რომლის მეფობასაც არაერთი გამარჯვება უკავშირდება. მისი ეპოქა, ისტორიამ როგორც ოქროს ხანა, ისე შემოგვინახა. საოცრად ჰუმანური, ღვთისნიერი და პროგრესულად მოაზროვნე მეფე გახლდათ.

- როგორია თქვენ მიერ გასახიერებული თამარი?

- ფილმში თამარის ცხოვრებიდან რამდენიმე საინტერესო და მნიშვნელოვანი თემაა გამოყენებული. ახალგაზრდა თამარი, რომლის ბედსაც მისგან დამოუკიდებლად წყვეტენ. მეფე თამარი, ყუთლუ-არსლანთან შეთქმულების საპასუხოდ და სინანულში მყოფი თამარი, მოძღვართან. მხატვრული სცენების ამ ჩამონათვალიდან გამომდინარე, ჩემ მიერ განსახიერებული თამარი ახალგაზრდა, ძლიერი, ენერგიული, ემოციური, ღვთისნიერი, სევდიანი, სინანულში მყოფი და საოცრად ჰუმანური პიროვნებაა.

- რას დაეყრდენით და აქედან გამომდინარე, მისი რომელი პიროვნული თვისებები წამოსწიეთ წინ?

- იქიდან გამომდინარე, რომ გადაღებების დაწყებამდე რეჟისორი და სცენარისტები, ერთი წლის განმავლობაში, ისტორიკოსებთან კონსულტაციებს გადიოდნენ, ვფიქრობ, ამ მხრივ ფილმის არამხატვრული ნაწილი, ყველა დოკუმენტური წესის დაცვითაა გადაღებული. რაც შეეხება მხატვრულ ნაწილს, აქ რა საკვირველია, სხვადასხვა აზრი გაჩნდება. ეს ბუნებრივია. "საქართველოში ყველას თავისი თამარ მეფე ჰყავს" ფილმის ერთ-ერთი გმირის ეს ფრაზა ვფიქრობ, ზუსტად მეტყველებს ფილმის მთავარ მიმართულებაზე და იმაზე, თუ როგორია რეჟისორის მიერ დანახული მეფე თამარი.

- როგორი მოლოდინი გაქვთ, ფართო მაყურებელი ამ ნამუშევარს როგორ მიიღებს?

- არ ვიცი, ეს იყო ძალიან რთული, სარისკო და საპასუხისმგებლო გამოწვევა და ჩემთვის ასევე მნიშვნელოვანი, საჭირო გამოცდილება. მადლობა მთელ შემოქმედებით ჯგუფს...

ლალი ფაცია

AMBEBI.GE