აზერბაიჯანის თავდაცვის უწყება - ორი დღის განმავლობაში 16 აზერბაიჯანელი სამხედრო დაიღუპა

ბოლო ორი დღის განმავლობაში საბრძოლო მოქმედებების შედეგად 16 აზერბაიჯანელი სამხედრო დაიღუპა. როგორც „ბიბისი“ იტყობინება, ამის შესახებ აზერბაიჯანის თავდაცვის სამინისტრომ განაცხადა.

უწყების ცნობით, გუშინ ღამის განმავლობაში დაიღუპა 70-მდე სომეხი ჯარისკაცი და განადგურდა სამხედრო ტექნიკის 20-მდე ერთეული.

მთიანი ყაღაბაღის ე.წ. თავდაცვის სამინისტროში ბაქოს მიერ გავრცელებული ინფორმაცია უარყვეს. გუშინ ე.წ. უწყებამ განაცხადა, რომ 2 აპრილის შემდეგ საბრძოლო მოქმედებებს 20 სომეხი სამხედრო და 5 სამოქალაქო პირი ემსხვერპლა, დაიჭრა 70 ადამიანი.

ვითარება კონფლიქტის ზონაში 2 აპრილს გამწვავდა.