2
ივნისიდღის ზოგადი ასტროლოგიური პროგნოზი
მართლმადიდებელი ეკლესია დღეს 40 სებასტიანელი მოწამის ხსენებას აღნიშნავს. ამასთან დაკავშირებით ტაძრებში პირველშეწირულის ლიტურგია შესრულდება.
როგორც "ინტერპრესნიუსს" საპატრიარქოდან აცნობეს, სრულიად საქართველოს კათოლიკოს-პატრიარქი, უწმინდესი და უნეტარესი, ილია II მოწამეთა ხსენების დღესთან დაკავშირებით, აბანოთუბანში არსებულ წმინდა 40 სებასტიანელის სახელობის ტაძარში 12:00 საათზე მიბრძანდება და პარაკლისს გადაიხდის.
წმინდა 40 სებასტიანელი სებასტიის ტბაში ქრისტეს სარწმუნოებისთვის 320 წელს ეწამა. ისინი კაბადოკიელი ქრისტიანი მეომრები იყვნენ და სებასტიაში მსახურობდნენ. წმინდანებმა ერთ-ერთ წარმართულ დღესასწაულზე კერპებისთვის მსხვერპლშეწირვაზე უარი განაცხადეს. მოწამეები ერთი დღით სებასტიის გაყინულ ტბაში ამყოფეს.
ერთ-ერთმა წამებას ვერ გაუძლო და წყლიდან ამოსული ნაპირზე მოკვდა. მის ნაცვლად ტბაში იქ მყოფი დარაჯი ჩავიდა, რომელიც მოწამეთა თავზე გვირვინებს ხედავდა. გაყინვას უვნებელად გადარჩენილები მეორე დღეს ხმლებით აკუწეს.
საეკლესიო გადმოცემით, VIII საუკუნეში თბილისში, მეტეხის ხიდთან არსებობდა ორმოცი სებასტიელი მოწამის სახელობის ტაძარი, სადაც 786 წლის 6 იანვარს, არაბებმა გაქრისტიანების გამო წმინდა აბო თბილელს თავი მოკვეთეს.
აბანოთუბანში წმინდა ორმოცი წამებული სებასტიანელის სახელობის ტაძრის მშენებლობა 2002 წელს დაიწყო. კათოლიკოს-პატრიარქმა ეკლესია მონასტრად 2009 წლის გიორგობის დღესასწაულზე აკურთხა.
