"მე ამაზე არ მიფიქრია..." - ნინო ანანიაშვილი მოსკოვში გამართული კონცერტის შემდეგ პირველ კომენტარს აკეთებს
25 თებერვალს მოსკოვის დიდ თეატრში ნინო ანანიაშვილის ცეკვას ქართული საზოგადოების მწვავე რეაქცია მოჰყვა. სოციალურ ქსელში ქართველი პრიმა-ბალერინა ცხარედ გააკრიტიკეს საბჭოთა ოკუპაციის დღეს "ბოროტების სათავეში ჯალათების საამებლად" კონცერტის გამართვისთვის.
შეგახსენებთ, საქართველოს სახელმწიფო ბალეტის სამხატვრო ხელმძღვანელმა ბალეტის წევრებთან ერთად საბჭოთა კავშირის სახალხო არტისტის რაისა სტრუჩკოვას ხსოვნისადმი მიძღვნილ საღამოზე იცეკვა. ქართველი პრიმა საღამოს ორგანიზებაზეც ზრუნავდა.
კონცერტის შემდეგ ნინო ანანიაშვილმა "რუსთავი 2"-თან ინტერვიუში ასეთი კომენტარი გააკეთა: "უბრალოდ, ეს რიცხვი დაემთხვა, მე ამაზე არ მიფიქრია. უბრალოდ, ეს დღე... იყო ერთადერთი, დაგეგმილი ერთი წლის წინ".
ვიდეო: ანანიაშვილი პირველი კომენტარი
ანანიაშვილი მოსკოვის დიდ თეატრში ცეკვის გამო საზოგადოებისთვის ცნობილმა სახეებმაც გააკრიტიკეს, მათ შორის ტელეწამყვანმა ნანუკა ჟორჟლიანმა, "ტაბულას" დირექტორმა თამარ ჩერგოლეიშვილმა, "ნაციონალური მოძრაობის" წევრმა გივი თარგამაძემ და სხვებმა.