"ვიკილიკსი": აშშ-ის უსაფრთხოების სააგენტო მსოფლიო ლიდერებს უსმენდა

"ვიკილიკსმა" საიდუმლო დოკუმენტები გამოაქვეყნა, რომლის თანახმად, აშშ-ის ეროვნული უსაფრთხოების სააგენტო მსოფლიო ლიდერების მოსმენებს ახორციელებდა.

პორტალის ინფორმაციით, სააგენტოს სამიზნე გერმანიის კანცლერი ანგელა მერკელი, გაერო-ს გენერალური მდივანი ბან კი მუნი, ისრაელის პრემიერ-მინისტრი ბენიამინ ნეთანიაჰუ, იტალიის ექს-პრემიერი სილვიო ბერლუსკონი და საფრანგეთის ყოფილი პრეზიდენტი ნიკოლა სარკოზი იყვნენ.

დოკუმენტები შეიცავს ინფორმაციას ბან კი მუნისა და ანგელა მერკელის საუბრების შესახებ, გარდა ამისა, "ვიკილიკსის" ცნობით, ისრაელის პრემიერი ბენიამინ ნათანიაჰუ სილვიო ბერლუსკონის აშშ-ის პრეზიდენტ ბარაქ ობამასთან კონტაქტის დამყარებაში დახმარებას სთხოვდა, ნიკოლა სარკოზი და სილვიო ბერლუსკონი კი იტალიის ეკონომიკის ცუდ მდგომარეობაზე მსჯელობდნენ.