მუსიკალური ჯგუფები, რომლებსაც მსოფლიო ერთი ჰიტით იცნობს - Fools Garden, Kaoma, Status Quo...

არსებობს სიმღერები, რომლებმაც წლებს გაუძლეს და კიდევ ძალიან ბევრ წელს გაუძლებენ. ბუნებრივია, გარდა შლაგერად ქცეული სიმღერებისა, მუსიკოსებს სხვა ნამუშევრებიც აქვთ, თუმცა საზოგადოება მათ მხოლოდ ერთი ჰიტით იცნობს. AMBEBI.GE მუსიკალურ ჯგუფებს გაგაცნობთ, რომლებსაც ფართო საზოგადოება ერთი ჰიტით იცნობს:

Eagles - Hotel California - "Eagles"-ს არაერთი სიმღერა შეუქმნია და რამდენიმე ალბომიც აქვს ჩაწერილი, თუმცა ამ ალბომების არსებობა მხოლოდ ჯგუფის ერთგულმა მსმენელებმა თუ იციან. მაგრამ ამას საერთოდ არ შეუშლია ხელი, რომ ”იგლზი” მსოფლიოში ერთ-ერთ ყველაზე მოსმენად ჯგუფად ითვლებოდეს, ხოლო მათი Hotel California - მილიონობით ადამიანის საყვარელ სიმღერად.

Kaoma - lambada - ყველას გვახსოვს 90-იანი წლების აფრო-ამერიკელი სექსუალური ქალის საოცრად ვნებიანი ცეკვა, რომელიც მალევე დამკვიდრდა. kaoma-ს ”ლამბადა” ერთგვარ ბრენდადაც იქცა, სიმღერის პარალელურად გამოვიდა მისი სახელობის ტანსაცმელი, ქალის აქსესუარები და სხვა. თუმცა ”კაომას” სხვა სიმღერა, რომელიც ზოგისთვის შეიძლება ბევრად კარგი მოსასმენიც იყოს, ფართოდ ცნობილი არაა.

Los del Río - ცნობილი ესპანური დუეტია, რომელშიც შედიან ანტონიო რომერო მონგე და რაფაელ რუიზი. დუეტის სახით ისინი 1960-იანი წლებიდან მოდიოდნენ, თუმცა მსოფლიომ ისინი 90-იან წლებში გაიცნო, როდესაც ჯადოსნური ”მაკარენა” იმღერეს. youtube-ზე სიმღერას 92 მილიონზე მეტი მნახველი ჰყავს, თუმცა დუეტზე უმეტესობის წარმოდგენა სწორედ ”მაკარენათი” იწყება და სრულდება. საინტერესო ისაა, რომ ”მაკარენას” ბევრმა მოყვარულმა დუეტის სახელიც არ იცის.

”მაკარანასთან” ერთად იმ დროის უცვლელი ჰიტი იყო Mr. President-ის ”Coco Jamboo”, ხშირად სწორედ ეს ორი სიმღერა განსაზღვრავდა ამა თუ იმ მუსიკალური ნაკრების გაყიდვას. Mr. President-ს ამ ჰიტს 115 მილიონი ნახვა აქვს, თუმცა ”Coco Jamboo” დღემდე ერთადერთ წარმატებულ ჰიტად რჩება.

როცა სამხედრო თემატიკის მუსიკაზე ვსაუბრობთ, პირველი რაც გვახსენდება, ”Status Quo” და მისი უკვდავი "In The Army Now”-ა. სიმღერა 1986 წელს დაიწერა და მალევე იქცა ჰიტად, არადა 1962 წელს შექმნილი ჯგუფი მანამდე დიდი პოპულარობით არ სარგებლობდა და მსმენელთა მხოლოდ ვიწრო კატეგორიისთვის იყო ცნობილი. "In The Army Now” დღემდე ჰიტია და ამერიკული ჯარის ერთგვარ სავიზიტო ბარათსაც წარმოადგენს.

Las Ketchup და მათი "Aserejé" ("The Ketchup Song"), რომელმაც გარდა იმისა, რომ ჯგუფს საოცარი წარმატება მოუტანა, უამრავ ენაზე ითარგმნა (მათ შორის ქართულადაც) და დღემდე ჯგუფის უდიდეს წარმატებად ითვლება. Las Ketchup-ი 2006 ევროვიზიის სიმღერის კონკურსშიც მონაწილეობდა, თუმცა არაფერი დასამახსოვრებელი არ გაუკეთებიათ და საბოლოოდ, 21-ე ადგილზე გავიდნენ.

Fools Garden-ი და მათი Lemon Tree. სიმღერა, რომელიც ჩაწერისთანავე მოექცა მუსიკალური ათეულების სათავეში და დიდხანს არ დაუთმია პირველობა. Lemon Tree არაერთი ფილმის საუნდთრეკადაც გამოიყენეს. მიუხედავად ასეთი დიდი წარმატებისა, Fools Garden-ს ასეთი მასშტაბის ჰიტი აღარ შეუქმნია.

ეს მხოლოდ მცირე ჩამონათვალია იმ მუსიკოსებისა თუ მუსიკალური ჯგუფებისა, რომლებმაც ერთი ჰიტით სამუდამოდ დაიმკვიდრეს ადგილი მსოფლიო მუსიკის სამყაროში.

ლადო გოგოლაძე

AMBEBI.GE