"მოვა მეტი და მეტი სითამამე..." - რას წერს ნათია ფანჯიკიძე აფხაზ ბლოგერზე, რომელმაც ზუგდიდში იმოგზაურა

თავდაცვის ყოფილი მინისტრის, ირაკლი ალასანიას მეუღლე ფსიქოლოგი ნათია ფანჯიკიძე "ფეისბუქის" პირად გვერდზე Aambebi.ge-ს სტატიას ეხმაურება, სადაც აფხაზი ბლოგერი ზუგდიდში ვიზიტის შთაბეჭდილებებს აღწერს.

"აფხაზი ბიჭის ბლოგი წავიკითხე. რას წერს და მორალურად მომზადებული ჩამოვედი, რომ შემთხვევით არაფერი მომწონებოდა და შემყვარებოდა, მაგრამო 1. ერთნაირები ვართო, 2. ულამაზესიაო, 3. კარგად დამხვდენენ, ადამიანურად, არავითარი მტრობა ან ხელოვნურად ხაზგასმული კეთილგანწყობაო, 4. ნეტავ ომი რატომ უნდა მომხდარიყოო???

ისიც კი მიგვანიშნა, მესაზღვრეები ძალიან მოდუნებული არიან, ასაფეთქებელი რომ შემოიტანოს ვინმემ, ვერც გაიგებთო. (!)

ბოლო რამდენიმე წინადადება დარწმუნებული ვარ, თავდაცვისთვის დაწერა, რომ რადიკალებს, რომლებიც ყოველთვის უგუნურები და შეუბრალებლები არიან, არ დაებრდღვნათ. ბოლო ლუკმა იმ გემოსი მიაწოდა, რის დაღეჭვაც ესიამოვნებოდათ.

მოვა მეტი და მეტი სითამამე. სიყვარულს, შერიგებას ყველაზე დიდი გამბედაობა სჭირდება, გონიერებაც, რომ იმ თაობას ვაჯობოთ ჭკუით, ვინც ამ ომს ვერ აგვარიდა. ერთად ვიაროთ ევროპაში, ერთად განვვითარდეთ, შვილებს გახსნილი მომავალი შევთავაზოთ. იმ საერთო მტერსაც ვაჯობოთ ჭკუით, რომელიც ჩვენნაირი არაა და ხელოვნურად ჩადგა ჩვენს შორის, რის გამოც ახლა საზღვრის იქით და აქეთ მხარეს, ცალცალკე ვჭამთ ელარჯს. არადა, რამდენი გვაქვს ერთმანეთისთვის მოსაყოლი, საბოდიშო, რამდენი ტკივილი გვაქვს გასაზიარებელი და რამდენი სიხარულის შექმნა შეგვიძლია მომავალში ერთად.

სიყვარულის მჯერა, მტრობის არა", - წერს ნათია ფანჯიკიძე.

იხილეთ ასევე: "არ მინდოდა საქართველოში რაიმე მომწონებოდა" - რას წერს აფხაზი ბლოგერი ზუგდიდში ვიზიტის შემდეგ