"ეს ხე ნაყიდი მაქვს უკვე" - ციხისძირში ბიძინა ივანიშვილსა და აქციის მონაწილეებს შორის შელაპარაკება მოხდა

ყოფილი პრემიერ-მინისტრი ბიძინა ივანიშვილი ციხისძირში იმყოფება. როგორც "ამბები.გე"-ს ადგილობრივი კორესპონდენტი იტყობინება, ივანიშვილი ციხისძირში იმ ადგილას მივიდა, სადაც ხეების გადარგვის სამუშაოები მიმდინარეობს.

ადგილზე იმყოფებიან "ნაციონალური მოძრაობის" ბათუმის ორგანიზაციის წარმომადგენლები, რომლებიც ყოფილ პრემიერს იმ საბუთების წარდგენას სთხოვენ, რომელიც ადასტურებს ხეების გადარგვის კანონიერებას.

"ნაციონალური მოძრაობის" წევრებმა ბიძინა ივანიშვილს უთხრეს, რომ პოლიცია მის დაკვეთას ასრულებს და აქციის მონაწილეებს პროტესტის გამოხატვის საშუალებას არ აძლევს, უხეშად ერევა დემონსტრანტების პროტესტში და აპატიმრებს მათ. პასუხად ყოფილმა პრემიერმა განაცხადა, რომ მას არანაირი კავშირი ამ საკითხთან არ აქვს.

იხილეთ ვიდეო

ყოფილ პრემიერსა და აქციის მონაწილეებს შორის მცირე შელაპარაკებაც მოხდა. "მაქვს გეგმა და ვუთხარი უკვე თქვენს კოლეგებს, მინდა გავაკეთო პარკი. ვინ გიშლით, თქვენც შემოიტანეთ და გააკეთეთ აქ პარკი. თქვენ არ გაქვთ უფლება მიკარნახოთ, მე სად უნდა გავაკეთო. თქვენ შეგიძლიათ იდეა მომაწოდოთ. კანონით მე შეძენილი მაქვს. თუ ყველა დოკუმენტი სწორად არის გაფორმებული, ეს არის ნორმალური აბსოლუტურად", - აღნიშნა ბიძინა ივანიშვილმა "ნაციონალური მოძრაობის" ბათუმის ორგანიზაციის წარმომადგენლებთან საუბრისას.

ყოფილი პრემიერის თქმით, ეს ხეები ნაყიდი აქვს და ისინი შეიძინა კომპანია "ზიმომ", რომელსაც მასთან აქვს კავშირი. ივანიშვილის თქმით: "ეჭვი მაქვს, რომ ყველა საბუთი არსებობს, უნდა გადავამოწმო, თუ ყველა შესატყვისი საბუთი არ იქნება, სამუშაოები შეჩერდება".

ნინო ხოზრევანიძე

AMBEBI.GE