სამოთხე ღამის ცხოვრებისა და შოპინგის მოყვარულთათვის - რა უნდა იცოდეთ "აზიის მსოფლიო ქალაქზე"

ჰონგ-კონგი სამხრეთ-აღმოსავლეთი აზიის კომერციული და ფინანსური ცენტრია, რომელსაც რეიტინგში მსოფლიო უმსხვილეს ცენტრთა შორის მესამე ადგილი უკავია ნიუ იორკისა და ლონდონის შემდეგ. მას ხშირად უწოდებენ "აღმოსავლეთია მარგალიტს", ან "აზიის მსოფლიო ქალაქს". ჰონგ-კონგში არ არის სავალუტო კონტროლი, ჰონგ-კონგის სავალუტო ბირჟა აზიაში ყველაზე აქტიურია, ხოლო შტაბ-ბინათა კონცენტრაცია ყველაზე მაღალია აზია-წყნარი ოკეანის რეგიონში.

ქალაქ-სახელმწიფოს მსოფლიოში ერთ-ერთი ყველაზე სუფთა კაპიტალისტური ეკონომიკური სისტემა აქვს. მისი ეკონომიკა ეფუძნება თავისუფალ ბაზარს, დაბალ გადასახადებსა და ხელისუფლების ეკონომიკაში ჩაურევლობას. ჰონგ-კონგი თავისუფალი პორტი გახლავთ ფულის თავისუფალი ნაკადითა და თავისუფლად კონვერტირებადი ჰონგ-კონგური დოლარით, რომელიც 1983 წლიდან ამერიკულ დოლარს არის მიბმული.

დაათვალიერეთ ჰონგ-კონგის შთამბეჭდავი ხედები

ერთ სულ მოსახლეზე შიდა მოხმარების პროდუქტის მაჩვენებლით ჰონგ-კონგი ჩინეთის უმდიდრესი ქალაქია. მომხმარებლის მსყიდველუნარიანობის მაჩვენებელი კი დასავლეთ ევროპის მოწინავე ქვეყნებს (დიდი ბრიტანეთი, საფრანგეთი, გერმანია, იტალია), ასევე იაპონიასაც უსწრებს. დღესდღეობით, ჰონგ-კონგი მსოფლიოს უმსხვილეს სავაჭრო გიგანტთა და ფინანსური ცენტრების ათეულში შედის, რაც მოსახლეობის ცხოვრების დონეზეც აისახება.

ჰონგ-კონგი იზიდავს ტურისტებს მთელი მსოფლიოდან. ეს გასაკვირი არც არის, რადგან იგი უჩვეულო ქვეყანაა, რომელიც ყურადღებას იპყრობს როგორც ხელუხლებელი ულამაზესი ბუნებით, ასევე თანამედროვე ცათამბჯენებით, ხალხითა და განვითარების მაღალი დონით.

ჰონგ-კონგის განვითარების დონის მიუხედავად, ცრუმორწმუნეობა მოსახლეობაში ძალიან ძლიერია. მაგალითად, ოფისში შესაძლოა სრული სერიოზულობით მიგითითონ, რომ ქოლგა გაშლილი არ დატოვოთ, რადგან ეს "ბოროტ ძალებს მოიზიდავს". ჰონგ-კონგში 7 მილიონი ადამიანი ცხოვრობს, აქედან 500 ათასი მილიონერია.

სატელეფონო ხაზზე +852 2810 2055 მუშაობს მთავრობის სპეციალური სამსახური, სადაც გასწავლიან, თუ როგორ მიმართოთ კონკრეტულ პირს. მაგალითად, რომელიმე ქვეყნის კონსულთან საუბარს თუ დააპირებთ, თავდაპირველად "თქვენო აღმატებულებავ" (Your Excellency) უნდა უწოდოთ, ქრისტიან მოძღვარს კი - "მილორდ" (My Lord).

ქალაქი ნამდვილი სამოთხეა ღამის ცხოვრების მოყვარულთათვის, ჰონგ-კონგურ შოპინგზე კი ლეგენდები დადის. ადგილობრივ ბრენდულ მაღაზიებში როგორებიცაა Prada, Gucci დაბალი ფასებია, კლუბების, ბარების, რესტორნებისა და დისკოთეკების უმეტესობა 24 საათის განმავლობაში ღიაა.

თავისი არსით ჰონგ-კონგი წარმოადგენს ქალაქ-სახელმწიფოს და არ გააჩნია დედაქალაქი - ჩვეული გაგებით. ამავდროულად, თუ გავითვალისწინებთ, რომ მოცემული სახელმწიფოს შემადგენლობაში მხოლოდ ერთი ქალაქი შედის, შეიძლება ჩაითვალოს, რომ ჰონგ-კონგის დედაქალაქი თავად ჰონგ-კონგია.

ელექტრონული, ელექტროტექნიკური, სამკერვალო და ტექსტილის დარგის შედარებით მაღალი განვითარების მიუხედავად, ჰონგ-კონგში მრეწველობა და სოფლის მეურნეობა სუსტად არის განვითარებული.

ჰონგ-კონგში დომინირებს საბანკო, საფინანსო და სავაჭრო საქმიანობა, ძირითადად, ვაჭრობა ჩინეთთან. ასე რომ, სახელმწიფოს ეროვნული სიმდიდრის უდიდესი ნაწილი სწორედ ამ სექტორიდან მოგებას წარმოადგენს. ჩამოთვლის სფეროებში ჰონგ-კონგის ქმედითუნარიანი მოსახლეობის 63%-ია დასაქმებული. მისი უმსხვილესი სავაჭრო პარტნიორები არიან ჩინეთი, ტაივანი, იაპონია, აშშ, დიდი ბრიტანეთი და სინგაპური.

ჰონგ-კონგი საოცარი ადგილია, სადაც თითოეულს შეუძლია იპოვოს რაიმე საინტერესო თავისთვის. აქ თანამედროვეობა შერწყმულია ისტორიასთან, მეგაპოლისის მჩქეფარე ცხოვრება კი ბუნების ხელუხლებელ სილამაზესთან.

დუდანა ზაქარაია

AMBEBI.GE