ყველა დროის ყველაზე ძვირადღირებული განქორწინებები

განქორწინებები, რომლებმაც ანა მერდოკი, რობინ გიბსონი, ირინა აბრამოვიჩი და სხვა ქალბატონები მილიონიანი ქონების მფლობელი გახადა - წარმოგიდგენთ, მსოფლიოში ყველაზე ძვირადღირებული გაყრების რეიტინგს:

დაათვალიერეთ ფოტოგალერეა

1. ალეკ და ჯოსლინ ვილდენშტეინები

განქორწინების თარიღი: 1997-1999 წლები

კომპენსაცია: $2,5 მილიარდი პლუს $100 მილიონი ყოველწლიურად 13 წლის განმავლობაში

1997 წლამდე ვილდენშტეინების გვარი ხელოვნების ნიმუშების კოლექციონერების ვიწრო წრეში იყო ცნობილი (მთელი მე-20 საუკუნის განმავლობაში Wildenstein&Co მსოფლიოში ყველაზე წარმატებულ და გავლენიან არტ-სადილერო კომპანიად ითვლებოდა). მაგრამ მას შემდეგ, რაც ალეკ ვილდენშტეინმა და მისმა მეუღლემ ჯოსლინმა განქორწინება გადაწყვიტეს, მათზე არა მხოლოდ ფრანგული ხელოვნების ნატიფი დამფასებლები, ამერიკული თოქ-შოუების მაყურებლებიც ალაპარაკდნენ. ჯოსლინი, რომელმაც 30 პლასტიკური ოპერაცია გაიკეთა, რათა კატას დამსგავსებოდა, სხვადასხვა თოქ-შოუს ხშირი სტუმარი გახდა. 2008 წელს 68 წლის ასაკში ალეკ ვილდენშტეინი გარდაიცვალა. მისი ექს-მეუღლე კი ფუფუნებაში ცხოვრებას აგრძელებს: მისი სატელეფონო გადასახადები წელიწადში $60 000, ხოლო საკვების ხარჯები $547 000 შეადგენს.

2. რუპერტ და ანა მერდოკები

განქორწინების თარიღი: 1998-1999 წლები

კომპენსაცია: $1,7 მილიარდი

85 წლის მედიამაგნატის რუპერტ მერდოკის ამჟამინდელი ქონება $11,2 მილიარდად არის შეფასებული. მას News Corporation ეკუთვნის, რომელშიც 20th Century Fox, გამომცემლობა HarperCollins, გაზეთები The Wall Street Journal, The Times, The Sun და New York Post შედის. 1960-იან წლებში მერდოკი ჟურნალისტ ანა ტორვზე დაქორწინდა, რომელიც მასთან ინტერვიუს ჩასაწერად მივიდა. წყვილს 3 შვილი შეეძინა, ქორწინებამ 32 წელი გასტანა, სანამ რუპერტს სხვა ჟურნალისტი - 38 წლის ვენდი დენგი არ შეუყვარდა. ანასთან განქორწინების პროცესი 1 წელზე მეტ ხანს მიმდინარეობდა, კომპენსაციამ კი 1,7 მილიარდი დოლარი შეადგინა.

3. ბერნი და სლავიკა ეკლსთოუნები

განქორწინების თარიღი: 2008 წელი

კომპენსაცია: $1,2 მილიარდი

სლავიკა სრულებით შეესაბამებოდა წარმოდგენას იმაზე, თუ როგორი უნდა იყოს მილიარდერის ცოლი: მაღალი, ლამაზი, მდიდრულად ჩაცმული... იგი ჯორჯიო არმანის საყვარელი მოდელი გახლდათ. 159 სმ სიმაღლის მქონე "ფორმულა 1"-ის პრეზიდენტი მის გვერდით აქსესუარივით გამოიყურებოდა. სიმაღლეში დიდმა სხვაობამ ხელი არ შეუშალა წყვილს, ერთად 24 წელი ეცხოვრათ. განქორწინების შემდეგ სლავიკამ საკუთარ თავს საჩუქარი გაუკეთა: შეიძინა თვითმფრინავი $60 მილიონად, რომელზეც დიდხანს ოცნებობდა.

4. ადნან და სორაია ხაშოგები

განქორწინების თარიღი:1974

კომპენსაცია: $874 მილიონი

ადნან ხაშოგიმ სიმდიდრე საუდის არაბეთის სამეფო ოჯახისთვის იარაღის მიყიდვით იშოვა. შემდეგ კი საკუთარი კომპანია Triad დააარსა. კომპანიას ბანკები, სასტუმროები და მდიდრული ვილები ეკუთვნოდა მსოფლიოს სხვადასხვა კუთხეში. ექს-მეუღლე სორაია (ქალიშვილობაში ინგლისელი სანდრა) ადნან ხაშოგის 1961 წელს გაჰყვა ცოლად, 1974 წელს კი წყვილი დაშორდა. მათი განქორწინება ისტორიაში ყველაზე ძვირად ღირებულად ითვლებოდა. თუმცა, მუსულმანურ სამყაროში განქორწინება იშვიათი მოვლენაა, ადნანი ვერ შეეგუა ქალთან ცხოვრებას, რომელმაც შვილი სხვა მამაკაცისგან გააჩინა. დნმ-ის ანალიზმა აჩვენა, რომ ქალიშვილის - პეტრინას ბიოლოგიური მამა ბრიტანელი პარლამენტარი ჯონათან აიტკენი გახლდათ. განქორწინებიდან 4 წლის შემდეგ ადნანმა იტალიელი ლაურა ბიანკოლინი შეირთო ცოლად, რომელმაც ისლამი და მუსლიმური სახელი ლამია მიიღო.

5. სტივ და ელეინ ვინები

განქორწინების თარიღი: 2010

კომპენსაცია: $750 მილიონი

სათამაშო ბიზნეს-მაგნატის სტივ ვინისა და მისი მეუღლის ელეინის რომანტიკული ისტორია ლამაზად დაიწყო. ახალგაზრდები ჯერ კიდევ კოლეჯში ხვდებოდნენ ერთმანეთს: სტივი კურსზე ყველაზე ჭკვიანი ბიჭი იყო, ელეინი კი - სილამაზის დედოფალი. 1963 წელს წყვილი დაქორწინდა. 20 წლის შემდეგ კი ოჯახი დაინგრა. 5 წლის შემდეგ მათ ისევ გადაწყვიტეს ერთად ყოფნა და ისევ უშედეგოდ - 2010 წელს სტივი და ელეინი კვლავ დასცილდნენ ერთმანეთს. ყველა სირთულის მიუხედავად, ელეინი კომპანია Wynn Resort-ში მუდამ გადამწყვეტ როლს ასრულებდა და დირექტორთა საბჭოს წევრი გახლდათ. დღეს ელეინის ქონება $7 მილიარდად არის შეფასებული, მას "ფორბსის" სიაში 882-ე ადგილი უჭირავს.

6. კრეიგ და ვენდი მაკკაუ

განქორწინების თარიღი: 1998

კომპენსაცია: $460 მილიონი

კრეიგ მაკკაუს ფიჭურ პიონერს უწოდებენ. ფიჭურ ბიზნესზე ფსონი მან ჯერ კიდევ 1980-იანი წლების დასაწყისში დადო, როდესაც ანალიტიკოსები ერთხმად ამტკიცებდნენ, რომ მობილური კავშირი მასობრივი არასოდეს გახდებოდა. მაკკაუმ არავის მოუსმინა და კომპანია McCaw Cellular შექმნა. 10 წლის შემდეგ ეს კომპანია AT&T-მა შეიძინა $11,5 მილიარდად, მაკკაუს შემოსავალმა წილის გაყიდვიდან კი 1,5 მილიარდი დოლარი შეადგინა. კრეიგმა ცოლი ჯერ კიდევ სტუდენტობის პერიოდში შეირთო. 21-წლიანი თანაცხოვრების შემდეგ წყვილი დაშორდა. მაკკაუმ ყოფილ მეუღლეს, ვენდის ქონების ნახევარი გაუნაწილა, განქორწინების მიზეზად კი ხასიათების შეუთავსებლობა დაასახელა.

7. მელ და რობინ გიბსონები

განქორწინების თარიღი: 2009-2011 წლები

კომპენსაცია: $425 მილიონი

გიბსონების წყვილი 31-წლიანი თანაცხოვრების შემდეგ გაშორდა ერთმანეთს. რობინმა ქალიშვილობის გვარი, მური დაიბრუნა და შვიდივე შვილზე მეურვეობის უფლება მოიპოვა. საქმე $425 მილიონიან კომპენსაციაზე არ დასრულებულა. გარდა ამისა, მელს სიცოცხლის ბოლომდე მომავალი ფილმებისთვის აღებული ჰონორარის ნახევრის გადახდა მოუწევს ყოფილი ცოლისთვის.

8. რობერტ ჯონსონი და შეილა კრამპი

განქორწინების თარიღი: 2002

კომპენსაცია: $400 მილიონი

მედიამაგნატი რობერტ ჯონსონი პირველი აფროამერიკელი-მილიარდერი გახდა, რომელიც 2000 წელს "ფორბსის" სიაში მოხვდა. საკაბელო ტელევიზიის Black Entertainment თანადამფუძნებელმა წარმატებამდე რთული და ხანგრძლივი გზა განვლო, მისი მეუღლე შეილა კრამპი კი მეუღლეს მუდამ მხარში ედგა. 33-წლიანი ოჯახური თანაცხოვრების შემდეგ წყვილი ერთმანეთს გაშორდა. შეილამ კომპენსაციის სახით $400 მილიონი მიიღო და სამი პროფესიონალური სპორტული კლუბის: ჰოკეის კლუბის Washington Capital და საკალათბურთო კლუბების Washington Wizard და Washington Mystics თანამფლობელი გახდა. რაოდენ გასაკვირიც არ უნდა იყოს, შეილა ამჟამად სწორედ იმ მოსამართლის მეუღლეა, რომელსაც რობერტისა და შეილას განქორწინების პროცესი მიჰყავდა.

9. რომან და ირინა აბრამოვიჩები

განქორწინების თარიღი: 2007

კომპენსაცია: $300 მილიონი

ირინასთან 16-წლიანი ქორწინების განმავლობაში, აბრამოვიჩი კოოპერატივის "უიუტ" (რეზინის სათამაშოების წარმოება) დირექტორიდან "სიბნეფტის", და "ევრაზის" მფლობელი, ჩუკოტკის გუბერნატორი, ინგლისის საფეხბურთო კლუბის Chelsea მფლობელი და ხელოვნების ნიმუშების კოლექციონერი გახდა. ირინა მალანდინამ სტიუარდესობას თავი დაანება და ხუთი შვილი გააჩინა. წყვილის განქორწინებას აბრამოვიჩისა და დაშა ჟუკოვას სასიყვარულო ურთიერთობაზე ჭორი უძღვოდა წინ. ამჟამად რომანი და დაშა საერთო ვაჟსა და ქალიშვილს ზრდიან, თუმცა აბრამოვიჩს "გაშორებულის" სტატუსი "დაქორწინებულზე" ჯერჯერობით არ შეუცვლია.

10. მაიკლ და მაია პოლსკი

განქორწინების თარიღი: 2006

კომპენსაცია: $184 მილიონი

მაიკლ და მაია პოლსკებმა ერთმანეთი კიევში 1970-იანი წლების დასაწყისში გაიცნეს და იქორწინეს. როდესაც წყვილი 1976 წელს ამერიკაში წავიდა ემიგრაციაში, მათ ქონებას 4 ჩემოდანი და 500 დოლარი შეადგენდა. მაგრამ საქმე მალევე კარგად წაუვიდათ. 1980-იან წლებში მაიკლმა კომპანია SkyGen Energy შექმნა, რომელიც აშშ-ში ელექტროენერგიის უმსხვილესი დამოუკიდებელი მწარმოებელი გახდა. მაია თავდაპირველად ოჯახის საქმეებს უძღვებოდა, შემდეგ კი ნახატების გალერეა გახსნა. წყვილი ერთმანეთს 30-წლიანი თანაცხოვრების შემდეგ დასცილდა. 2006 წლის ოქტომბერში სასამართლოს გადაწყვეტილებით მაიამ $176 მილიონი მიიღო.

დუდანა ზაქარაია

AMBEBI.GE

ასევე დაგაინტერესებთ: ვინ არიან მილიარდერების ცოლები