7
ივნისიდღის ზოგადი ასტროლოგიური პროგნოზი
ტემპერატურის მკვეთრი ვარდნის გამო, დაახლოებით 6:30 საათზე ჟვანიას მოედანზე გამავალი წყალსადენის მაგისტრალი ავარიულად დაზიანდა, - ამის შესახებ განცხადებას "ჯორჯიან უოთერ ენდ ფაუერი" ავრცელებს. მათივე ინფორმაციით, დაზიანების ადგილზე 20 წუთში მობიზებული იყო კომპანიის ტექნიკური სამსახურის ორი ბრიგადა, ასევე, სპეცტექნიკა - 2 ტრაქტორი, 7 თვითმცლელი, ამწე.
კომპანიის ინფორმაციით, სამუშაოების ჩასატარებლად მაგისტრალური ქსელების წყლისგან დაცლა კომპანიამ დილის 7 საათზე დაიწყო. ამ დროისთვის მაგისტრალის აღსადგენად ინტენსიური სამუშაოები მიმდინარეობს, რის გამოც ცალმხრივად შეზღუდულია საავტომობილო მოძრაობა. "ჯორჯიან უოთერ ენდ ფაუერი" დაზიანების აღმოფხვრას უმოკლეს დროში უზრუნველყოფს.
"ჯორჯიან უოთერ ენდ ფაუერის" ცნობით, ამ ეტაპზე, წყალმომარაგება უკვე შეზღუდული აქვს: დიღომი-8-ს, ბელიაშვილისა და ლუბლიანას ქუჩების ნაწილს, ჟვანიას კლინიკის ტერიტორიას, აშშ-ის საელჩოს, მტკვრის მარჯვენა სანაპიროზე მდებარე ობიექტებს, ჰიპერმარკეტ "გუდვილის მიმდებარე ქუჩებს, ფანასკერტელის, იყალთოს, ქარელისა და ლიხაურის ქუჩებს, ასევე მთაწმინდისა და კრწანისის რაიონების ქუჩების ნაწილს.
დღეს, 12:00 საათიდან წყალმომარაგება შეუწყდება: ჭავჭავაძის გამზირის ნაწილს, წყნეთის გზატკეცილის, ბაგებს, ყაზბეგისა და ვაჟა-ფშაველას გამზირების ნაწილს, ვაჟა-ფშაველას კვარტლებს, ნუცუბიძის ქუჩასა და მიკრორაიონებს, ქავთარაძის, ჯიქიას, უნივერსიტეტისა და მათ მიმდებარე ქუჩებს.
წყალმომარაგების აღდგენის დროს კომპანია, მომხმარებელებს დამატებით აცნობებს.
წყალმომარაგების შეწყვეტის თაობაზე ინფორმაცია "ჯორჯიან უოთერ ენდ ფაუერმა" მომხმარებელს წინასწარ, SMS-შეტყობინების სახით, უკვე მიაწოდა. დეტალური ინფორმაციის მოძიება ასევე შესაძლებელი იქნება კომპანიის ცხელი ხაზის - 293 11 11, ფეისბუქისა და ვებგვერდის http://www.gwp.ge/ka/gadaudebeli მეშვეობით.
