ლეგენდარული დევიდ ბოუი 69 წლის ასაკში გარდაიცვალა

დღეს საკუთარ სახლში ლეგენდარული მომღერალი დევიდ ბოუი 69 წლის ასაკში, სიმსივნით გარდაიცვალა. "დეიდ ბოუი დღეს მშვიდად, ოჯახის წრეში გარდაიცვალა, ის 18 თვის განმავლობაში ვაჟკაცურად ებრძოდა სიმსივნეს. სანამ ამ ტკივილს გაიზიარებთ, გთხოვთ, პატივი სცეთ ბოუის ოჯახს ამ მძიმე წუთებში", - ნათქვამია მომღერლის "ფეისბუქის" გვერდზე.

ცნობილი მომღერალი და პროდუსერი, გლემ როკის ერთ-ერთი მთავარი წარმომადგენელი კარიერის 40 წლის მანძილზე მრავალ ჟანრში ქმნიდა მუსიკას. მან პოპულარობა და აღიარება 1972 წელს მოიპოვა, როდესაც ალბომი The rise and fall of Ziggy Stardust and spiders from mars გამოვიდა, რომელშიც ბოუი საკუთარ თავს მსოფლიოს, როგორც უცხო პლანეტიდან მოსულ განმანათლებელს, ისე აცნობდა.

დევიდ ბოუი ერთ-ერთი ყველაზე გავლენიანი არტისტი იყო მუსიკალურ სამყაროში. 70-იან წლებში მან კინოშიც გადაინაცვლა და რამდენიმე საკულტო ფილმში მიიღო მონაწილება, მათ შორის The man who fell to earth და Merry Christmas Mr. Lawrence. ბოუიმ პონტიუს პილატეს როლი ითამაშა მარტინ სკორსეზეს სკანდალურ ფილმში "ქრისტეს უკანასკნელი ცდუნება".

მომზადებულია hollywoodreporter.com-ს მიხედვით.