"ოლიგარქი გაიყინა" - ნიკა რურუას ინტერპრეტაცია რატი ამაღლობელის სკანდალურ ლექსზე

საქართველოს კულტურისა და ძეგლთა დაცვის ყოფილი მინისტრი, ნიკა რურუა პოეტ რატი ამაღლობელის ლექსის საკუთარ ინტერპრეტაციას აქვეყნებს, რომელშიც პატრიარქის ნაცვლად, ამჯერად ოლიგარქია გაყინული:

"ოლიგარქი გაიყინა,

საკუთარ დაბადების დღეზე გაიყინა,

58 წლის ახალგაზრდა ოლიგარქი

ოქროყანის ასასვლელში,

მიწისზედა გასასვლელში

გაიყინა.

დიახაც, მე მიყვარს ოლიგარქი

ჩემი გაყინული ოლიგარქი,

მიწიზედეთის მისადგომებთან

წაქცეული.

უცხო, უცნობი, განდევნილი,

როგორც პირველი მილიარდერი,

მე მიყვარს ოლიგარქი

ოქროყანის ასასვლელში ჩაყინული.

მას არავინ მიულოცავს

დაბადების დღეს,

არავინ უმღერებს ოდებს.

დაე, დატირება, ეს მცირე დატირება

წაგყვეს უბრძენესო იქ,

სადაც მდიდარნი განისვენებენ.

ავტორი - გაზპრომის ყრილობის სპიკერი" - წერს რურუა.

შეგახსენებთ, რომ პოეტი ლექსით მეტრო "დელისთან" მიწისქვეშა გადასასვლელში მამაკაცის გარდაცვალებას გამოეხმაურა. 67 წლის მამაკაცის დაღუპვის შესახებ ცნობა 4 იანვარს, პატრიარქის დაბადების დღეს გავრცელდა. თავდაპირველად ვრცელდებოდა ინფორმაცია, რომ მამაკაცი უსახლკარო იყო და სიცივისგან გაიყინა, თუმცა დღეს შსს-მ დაადასტურა, რომ გარდაცვლილს ჰყავს ოჯახი, ის არც უსახლკარო ყოფილა და მის სიკვდილს ოჯახის წევრები გულის პრობლემებს უკავშირებენ.

"პატრიარქი გაიყინა..." - რატი ამაღლობელის ლექსს ფეისბუქზე რეზონანსი მოჰყვა