"გამაოგნებელია, როცა მამა პეტარდს შუა ოთახში აფეთქებს, სადაც მისი ცოლ-შვილია" - გუგა ქაშიბაძე "საახალწლო ტრავმებზე"

სადღესასწაულო დღეებში ტრავმიანობა მატულობს, - რასაც ალკოჰოლი, ნაბახუსევი და რაც მთავრია, სხვადასხვა ასაფეთქებელი საშუალება, პეტარდი იწვევს. ასაფეთქებლებით ახალი წლის პირველ წუთებში, და არა მარტო მაშინ, ბევრი ადამიანი ზიანდება. მთავრი მიზეზი გაუფრთხილებლობაა.

დამწვრობის ცენტრის ხელმძღვანელი, გუგა ქაშიბაძე სწორედ იმაზე გვესაუბრება, თუ რა სახის დაზიანებები მიიღეს პაციენტებმა ახალი წლის დღეებში.

- წინასაახალწლო პერიოდიდან მოყოლებული, დღევანდლამდე, სულ, დამწვრობით 32 პაციენტი შემოვიდა, რომელებსაც სხეულის სხვადასხვა ნაწილის დაზიანება ჰქონდათ, მათგან უდიდესი ნაწილი - მარჯვენა მტევანი იყო, შემდეგ - სახის არე და ქუთუთოები. პაციენტების ნაწილს ქირურგიული ჩარევა სჭირდებოდა: გაკერვა. სტაციონარში სამკურნალოდ მხოლოდ ერთი მოთავსდა, - 6 წლის ბავშვს სახე ჰქონდა დამწყვარი, საბედნიეროდ, სხვა სერიოზული ტრავმები, ქირურგიული ოპერაცია რომ დასჭირვებოდა, ჩვენთან წელს არ ყოფილა, მაგრამ შარშანდელი და შარშანწინდელი გამოცდილებას თუ გადავხედავთ, მძიმე სურათები იყო...

რაც მთავარია, ასაფეთქებლების, პეტარდების აფეთქება ამით არ მთავრდება და ეს საგიჟეთი ტრადიციულად, ნათლისღებამდე გრძელდება. მორიგი პიკი ძველით ახალ წელს არის ხოლმე.

მაგალითად, გუშინ (3 იანვარი) რამდენიმე პაციენტმა მოგვმართა, რომლებმაც დაზიანება ახალ წლის ღამეს მიიღეს და უკვე გართულებული ფორმებით შემოვიდნენ, დაინფიცირებულები.

- ტრავმები მიღება ძირითადად ასაფეთქებლებს უკავშირდება, ხომ?

- კი, ასაფეთქებლების გამოყენებისას მიღებული დაზიანებებია. 100-დან 100 შემთხვევა გაუფრთხილებლობის შედეგად ხდება, ანუ ამათი რასწორი გამოყენებისას. ერთმანეთს ეჯიბრებიან როგორც ბავშვები, ისე მოზრდილები, - პეტარდებით თამაშობენ: ყურთან უფეთქებენ, ჯიბეში უდებენ და რას არ აკეთებენ.

- ბოროტად იყენებენ...

- ფაქტია, რომ მათი არასწორი გამოყენება ხდება, არადა, ასაფეთქებელს აწერია - 20 სანტიმეტრით უნდა მოცილდე... მერე ყველაზე გამაოგნებელია, როცა ამას ოჯახის მამა აკეთებს, პეტარდს შუა ოთახში აფეთქებს, სადაც ცოლ-შვილი, ოჯახის წევრები არიან.

არ ვიცი, ეს ბორიტად გამოყენებაა თუ იდიოტობა, ფაქტია, რომ ამ ყველაფერს მძიმე შედეგები მოსდევს და ასეთი ცუდი შემთხვევები ფიქსირდება. არადა, იმ მაშხალების აფეთქება პატარა მინდორშიც არ შეიძლება, დიდი ტერიტორიაა საჭირო.

- საყოფაცხოვრობო პირობებში მიღებული დამწვრობის ფაქტები წინასაახაწლოდ არ ყოფილა?

- საერთოდ, დღესასწაულებში ტრავმიანობა მატულობს, რადგანაც ამ დროს ყურადღება მოდუნებულია, ამასთან, ბევრი ადამიანი ნასვამ მდგომარეობაშია და ა.შ.

- უშუალოდ 1-ელში, ანუ 12 საათის შემდეგ რამდენმა მოგმართათ?

- 14 პაციენტი მივიღეთ, მაგრამ ეს რეალურ ციფრს არ ასახავს, რადგანაც ამის გარდა, რამდენიმე სატელეფონო ზარიც იყო, საერთოდ, კი საავადმყოფოებში რიგები იდგა, არასწრულწლოვანებმა სხვადასხვა სახის ჭრილობა მიიღეს, ზოგიერთმა ფალანგები დაკარგა.

ასეთ დღეებში მხოლოდ დამწვრობა არ აღინიშნება ხოლმე, წელს დამწვრობასთან ერთად, კომბინირებული დაზიანებებით მოგვმართეს, ნაკერების დადებაც დასჭირდათ.

- რა რეკომენდაციები შეიძლება გასცეთ?

- ჯობია, საპნის ბუშტები გაუშვან, "ფიფქებს" უმღერონ, ან შობას, ახალ წელს, ვიდრე პეტარდები და ასაფეთქებლები ააფეთქონ. მგონი, ჩვენი ბუნებისთვის და მენტალიტეტისთვის ნაადრევია ასეთი სიგიჟე. მსგავსი ხმაური და აურზაური დიდ საფრთხეებს შეიცავს.

რეკომენდაციებზე კი ვსაუბრობთ, მაგრამ როგორ წარმოგიდგენიათ, ქართველი კაცი იმ ანოტაციას, რაც პეტარდს მოჰყვება, ჩაუჯდება და თან, ჩინურად წაიკითხავს?! ჰოდა, არ წაკითხვითა და წესების არ დაცვით ის სავალალო შედეგები გვაქვს, რაც გვაქვს. ყველას ჰგონია, რომ მას არ დაემართება. თუ არ დაფიქრდება, ნამდვილად დაემართება. ნებისმიერი საგნის არასწორი გამოყენება საფრთხეს შეიცვას!!!

ლალი ფაცია

AMBEBI.GE