ივანიშვილის "საყვარელი ბიჭი" - როგორ გამოეხმაურა მსოფლიო მედია ირაკლი ღარიბაშვილის გადადგომას

მსოფლიო მედია ირაკლი ღარიბაშვილის გადადგომას აშუქებს. სააგენტო "ფრანს პრესი" ყურადღებას ამახვილებს, რომ 33 წლის ირაკლი ღარიბაშვილი ევროპაში ყველაზე ახალგაზრდა პრემიერი იყო. "ის უცნობი პოლიტიკური ფიგურა იყო, სანამ მისმა წინამორბედმა, მილიარდერმა ბიძინა ივანიშვილმა ის 2012 წლის ოქტომბერში შინაგან საქმეთა მინისტრად არ დაასახელა", - წერს სააგენტო.

"ფრანს პრესი" აღნიშნავს, რომ თანამდებობის დაკავებამდე ღარიბაშვილი 10 წლის განმავლობაში ივანიშვილთან მუშაობდა, რომელიც მას "თავის საყვარელ ბიჭად" მოიხსენიებდა.

გავლენიანი გამოცემა Economic Times-ი წერს, რომ "რეფორმისტი ექს-პრეზიდენტის" მიხეილ სააკაშვილის მმართველობის პერიოდში საქართველოში ეკონომიკური ბუმი იყო, "ქართული ოცნების" სამწლიანი მმართველობის დროს კი ქვეყანას ეკონომიკური ზრდის შენელება, მზარდი ინფლაცია და ეროვნული ვალუტის 44%-იანი დევალვაცია მოხდა.

სააგენტო "როიტერი" ღარიბაშვილის გადადგომას "მოულოდნელ ნაბიჯს" უწოდებს და აღნიშნავს, რომ ექს-პრემიერმა ეს გადაწყვეტილება არჩევნების მოახლოების ფონზე მიიღო. სააგენტო წერს, რომ ექსპერტები და ოპოზიცია მის გადაწყვეტილებას უკავშირებენ "ქართული ოცნების" მხარდაჭერის 18%-მდე შემცირებას.

სააგენტო Associated Press-ი წერს, რომ ირაკლი ღარიბაშვილი მილიარდერ ბიძინა ივანიშვილის მოკავშირეა, რომლის პარტიამ "ქართულმა ოცნებამ" 2012 წლის არჩევნებში ყოფილი პრეზიდენტის მიხეილ სააკაშვილის მხარდამჭერები დაამარცხა. სააგენტო წერს, რომ გაუარესებული ეკონომიკური სიტუაციის ფონზე, "ქართული ოცნების" პოპულარობა შემცირდა, "ნაცინალური მოძრაობის" მხარდაჭერა კი გაიზარდა.

როგორც "ამერიკის ხმა" წერს, ქართველი ექსპერტები მიიჩნევენ, რომ ღარიბაშვილი გადადგა "ქართული ოცნების" დასახმარებლად, დაიბრუნოს დაკარგული პოპულარობა საპარლამენტო არჩევნების წინ.

Financial Times-ი წერს, რომ ბოლო დღეებში საქართველოს ხელისუფლებამ მიაღწია გამარჯვებებს ორივე ფრონტის მიმართულებით: ევროპულმა კომისიამ თბილისის დიდი ხნის მისწრაფებას - უვიზო რეჟიმის დაწესების იდეას მხარი დაუჭირა, რუსეთმა კი საქართველოს მოქალაქეებისთვის სავიზო რეჟიმი გაამარტივა. "მიუხედავად ამისა, ხელისუფლების პოპულარობის რეიტინგი მკვეთრად დაეცა, NDI-ს გამოკითხვის თანახმად, კოალიცია "ქართული ოცნების" მხარდაჭერის დონე ყველაზე დაბალია მას შემდეგ, რაც ის 2012 წელს ხელისუფლებაში მოვიდა" , - წერს გამოცემა.

"ინტერპრესნიუსი"