სასიამოვნო სიურპრიზი წიგნის მოყვარულებს საქართველოს წიგნის გამომცემელთა და გამავრცელებელთა ასოციაციისგან. 25-27 დეკემბერს, საქართველოს პარლამენტის ეროვნულ ბიბლიოთეკაში (გუდიაშვილისქ. N7)თბილისის წიგნის საახალწლო ფესტივალი გაიმართება.
წიგნის მოყვარულებს მხოლოდ სამი დღით შეგეძლებათ თქვენთვის სასურველი წიგნები განსაკუთრებული ფასდაკლებით შეიძინოთ და საახალწლო საჩუქრები გაუკეთოთ ოჯახის წევრებს, მეგობრებსა და ძვირფას ადამიანებს.
თბილისის წიგნის საახალწლო ფესტივალი საქართველოში უკვე მეორედ ტარდება და გასული წლისგან განსხვავებით, 2015 წლის ფესტივალი დატვირთული იქნება უამრავი სიახლით. ექსკლუზიურად საახალწლო ფესტივალზე დაანონსდება "წინანდლის" პრემიის ნომინანტების ვინაობა,საგამომცემლო სახლები გამართავენ ახალი წიგნების პრეზენტაციებს. მკითხველებს შესაძლებლობა მიეცემათ შეხვდნენ ავტორებს,დაესწრონ მათ საჯარო ლექციებს, დასვან კითხვები და იმსჯელონ მათთვის საინტერესო საკითხებზე. პატარა ასაკის მკითხველების საახალწლო განწყობაზე კი საგანგებოდ მოწყობილ საბავშვო კუთხეში ფესტივალის პარტნიორი ორგანიზაცია "ასფურცელა" იზრუნებს.
როგორც ფესტივალის ორგანიზატორებმა განგვიცხადეს,ფესტივალის მიზანია საქართველოში წიგნიერების მაჩვენებლის, განათლების ხელმისაწვდომობის გაზრდა და მისი პოპულარიზაცია.
გვანცა ჯობავა, საქართველოს წიგნის გამომცემელთა და გამავრცელებელთა ასოციაციის თავმჯდომარე:
"ფესტივალი მიზნად ისახავს საქართველოში წიგნის კითხვის პოპულარიზაციისა და ლიტერატურული პროცესების ხელშეწყობას და საახალწლოდ წიგნის ჩუქების ტრადიციის დამკვიდრებას. უნდა აღვნიშნო ის ფაქტი, რომ წელს ფესტივალის მონაწილე 35-მდე საგამომცემლო სახლი, წიგნის გამავრცელებელი, წიგნის მაღაზია, საგანმანათლებლო დაწესებულება და სხვა პარტნიორი ორგანიზაციაა."
თბილისის წიგნის საახალწლო ფესტივალი ოფიციალურად 25 დეკემბერს 13:00-ზე გაიხსნება და დამთვალიერებელს ყოველდღე 11:00-დან 20:00-მდე უმასპინძლებს.
ღონისძიების ოფიციალური პარტნიორია საქართველოს პარლამენტის ეროვნული ბიბლიოთეკა.
ღონისძიების ფინანსური მხარდამჭერია ქალაქ თბილისის მერიის კულტურულ ღონისძიებათა ცენტრი.
R