მურმან დუმბაძე და მედეა ვასაძე ლეონიდ ჩერნოვეცკის პარტიაში წევრიანდებიან
საქართველოს პარლამენტის ვიცე-სპიკერი მურმან დუმბაძე და აჭარის უმაღლესი საბჭოს დეპუტატი მედეა ვასაძე კიევის ყოფილი მერის, ლეონიდ ჩერნოვეცკის პოლიტიკური გუნდის წევრები იქნებიან. როგორც "ინტერპრესნიუსს" მურმან დუმბაძემ განუცხადა, შემოთავაზება თავად ლეონიდ ჩერნოვეცკისგან მიიღო და პარტია "ბედნიერი საქართველოსთვის" სადამფუძნებლო ყრილობის მოსამზადებლად საინიციატივო ჯგუფთან ერთად მუშაობს.
მურმან დუმბაძის განმარტებით, ლეონიდ ჩერნოვეცკის მიზანია "საქართველო ღარიბების გარეშე".
"განსხვავებით სხვა მდიდარი ადამიანებისგან, ლეონიდ ჩერნოვეცკი დიდი ხანია პოლიტიკაშია და მასთან საუბარი არ გამჭირვებია. ოთხჯერ იყო დეპუტატი, ორჯერ კი, კიევის არჩეული მერი. კარგად იცის 2012 წლიდან მოყოლებული საქართველოს საპარლამენტო საქმიანობა, რაც ჩემს გაკვირვებაც იწვევს. მას აქვს თავისი ხედვები განსაკუთრებით ეკონომიკურ ნაწილში. მის საუბარში უმეტესად ისმის სიტყვა "ღარიბი". ლეონიდ ჩერნოვეცკის გაგებით, საქართველო არის ღარიბი ქვეყანა და ყველა ღონე უნდა ვიხმაროთ, რომ უახლოეს ხანებში ღარიბების გარეშე იყოს. ამის გაკეთება დღევანდელი ბიუჯეტითაც არის შესაძლებელი, ის ასე ამტკიცებს", - აღნიშნა მურმან დუმბაძემ.
რაც შეეხება მედეა ვასაძეს, მისი თქმით, ლეონიდ ჩერნოვეცკისთან მას საერთო ევროპული ღირებულებები აერთიანებს. მისივე განმარტებით, აღნიშნულ საკითხზე კონსულტაციები კვლავ მიმდინარეობს, რის პარალელურადაც "ფაქტობრივი გარემოებების" გადამოწმებას თავადაც აწარმოებს.
"აქცენტი გაკეთებულია მურმან დუმბაძეზე და მოვიაზრები მეც. ლეონიდ ჩერნოვეცკიმ იცის ყველა დეტალი ჩვენი ბიოგრაფიიდან, დაწყებული ჩვენი პოლიტიკური მოღვაწეობის შესახებ. კმაყოფილებას გამოვთქვამ იმის გამო, რომ აქცენტი არის გაკეთებული ჩვენზე. აღნიშნავს, რომ პოლიტიკაში სჭირდება ჩვენნაირი პრინციპების ადამიანები. რა თქმა უნდა, ამისთვის მას მადლობას ვუხდი. ის დადებით განწყობას ქმნის პირად ურთიერთობაში და გახლავთ ევროპული ორიენტაციის და პოლიტიკური გამოცდილების მქონე ადამიანი. იმაში, რაც ზედაპირზე დევს, საჩოთიროს ვერაფერს ვხედავთ, თუმცა ჩვენი მხრიდანაც ვართ გარკვეული ფაქტობრივი გარემოებების გადამოწმების პროცესში. დამარწმუნეს, რომ მაქვს შინაგანი რესურსი, მყავს ელექტორატი და აუცილებელია ჩემი დარჩენა პოლიტიკაში კიდევ ოთხი წლით", - აღნიშნა მედეა ვასაძემ.
მურმან დუმბაძე და მედეა ვასაძე არ აკონკრეტებენ, კიდევ ვის მოიაზრებს ლეონიდ ჩერნპოვეცკი "ბედნიერი საქართველოს" გუნდის წევრებად.
გამოიწერეთ საზოგადოების სიახლეები და იხილეთ ის თქვენს Newsfeed-ში!
AMBEBI.GE/საზოგადოება
"ანტიგმირი უნდა დამალო" - გია ხუხაშვილი პარლამენტიდან ვანო ზარდიაშვილის წასვლაზე
უკრაინის პროკურატურამ მიხეილ სააკაშვილის მიმართვაზე საქმე აღძრა
