7
ივნისიდღის ზოგადი ასტროლოგიური პროგნოზი
შეწყალების კომისიის ყოფილი თავმჯდომარე ალეკო ელისაშვილი პატიმართა შეწყალებაზე მისი ახლობლებისთვის შეთავაზებულ თანხებზე საუბრობს.
ტელეკომპანია "რუსთავი 2"-ის პირდაპირ ეთერში საუბრისას ალეკო ელისაშვილმა მისი შეწყალების კომისიის თავმჯდომარეობის პერიოდი გაიხსენა და ზოგიერთი პოლიტიკოსის მხრიდან სააღდგომო შეწყალების დროს "ზედმეტ ინტერესზე" ისაუბრა.
"კონკრეტულ მსჯავრდებულებზე იყო საუბარი, რომ პრეზიდენტს შეეწყალებინა. მირეკავდნენ და შეტყობინებებს მიგზავნიდნენ - როგორ ბედავ ჩვენი ამ მოთხოვნის იგნორირებასო. ძახილის ნიშნებით იყო გამოგზავნილი უზარმაზარი მესიჯი. სიმართლე გითხრათ, ვერ ვხვდებოდი რაში იყო საქმე. ძალიან რთული და მარტივი საქმე არ იყო. მე იმ საქმეში პოლიტიკური ნიშნები ვერ დავინახე. შემდეგ ჩემი ეჭვები პრეზიდენტის ადმინისტრაციის უფროსს გავუზიარე და მიღებული შეტყობინებები პრეზიდენტის ადმინისტრაციის უფროსს და პრეზიდენტსაც ვუჩვენე", _ განაცხადა ელისაშვილმა. შეწყალების კომისიის ყოფილი თავმჯდომარე აცხადებს, რომ ამ საქმეზე მისთვის თანხა არ შეუთავაზებიათ. თუმცა, ელისაშვილის თქმით, ერთი ქალი მასთან საუბარში აცხადებდა, რომ თუ მის შვილს მსჯავრს გაუნახევრებდა, "პატივისცემა იქნებოდა". ალეკო ელისაშვილის თქმით, ასეთ საუბრებს იგი ყველას აწყვეტინებდა და ეუბნებოდა, რომ დაცვის გამოძახებით დაატოვებინებდა ოთახს.
"მამაჩემს შესთავაზეს მაგალითად 20 ათასი დოლარი. ჩემს ახლობლებსაც შესთავაზეს ასეთი დათქმითაც, რომ თუ გინდა, ნუ ეტყვი, შენ აიღე თანხა და დაგვეხმარე, ოღონდაც საქმე გაკეთდეს. სულ ასეთი ხმები იყო", _ აღნიშნა ელისშვილმა.
შეწყალების კომისიის ყოფილმა თავმჯდომარემ ერთი შემთხვევაც გაიხსენა, სადაც მას ერთ-ერთმა მაღალი თანამდებობის პირმა გარკვეული პოლიტიკოსების მხრიდან რამდენიმე პატიმრის შეწყალებასთან დაკავშირებით ინტერესის შესახებ მოუთხრო.
"მე ვიყავი ერთ შეხვედრაზე. მოვიდა ერთი მაღალი თანამდებობის პირი. ეს ადამიანი ახლა სხვა ასევე მაღალ თანამდებობაზეა და მომმართა კითხვით, ვიცოდი თუ არა რამდენიმე პატიმრის საქმის შესახებ. რამდენიმე მსჯავრდებული დამისახელა და თუ ვიცოდა ამ საქმეებთან დაკავშირებით რამდენიმე პოლიტიკოსის დაინტერესების შესახებ. მე დავინტერესდი, რა იყო ამ პოლიტიკოსების ინტერესი. მითხრა, რომ 200 ათასი დოლარი აქვს "ბე"-ს სახით აღებულიო და თუ გათავისუფლდებიან, მილიონ ნახევარს აიღებენო. ეს ხალხი იყო პოლიტპატიმართა სიებში, მაგრამ შინაგან საქმნეთა სამინისტრომ ამოიღო და კატეგორიული წინააღმდეგი წავიდაო. ამიტომ ახლა სურთ შეწყალებით გაიყვანონო, რადგან პირობა აქვთ მიცემული იმ კონკრეტული დამკვეთისთვის", _ განაცხადა ელისაშვილმა.
შეწყალების კომისიის ყოფილმა თავმჯდომარემ საუბრისას არ დაასახელა რა ტიპის მსჯავრდებულების საქმეებზე იყო საუბარი, თუმცა აღნიშნა, რომ ამჟამადაც ის პირები საპატიმროში იმყოფებიან და მათი გათავისუფლება არ მომხდარა.
ალეკო ელისაშვილის თქმით, აღნიშნულ მაღალი თანამდებობის პირთან საუბრის შემდეგ იგი გაემართა პრეზიდენტის ადმინისტრაციაში და მისთვის ცნობილი ამბის შესახებ პრეზიდენტის ადმინისტრაციის მაშინდელ უფროსს ლაშა აბაშიძეს და პრეზიდენტს გიორგი მარგველაშვილს მოუთხრო.
"რეაქცია პრეზიდენტისგან იყო, რომ დაუძახა ერთ-ერთ ახალგაზრდა კაცს და უთხრა, რომ ჩემთვის მოესმინა, შემდგომ წასულიყო სპეცსამსახურებთან და ეს შეტყობინება მათთვის გადაეცა", _ აღნიშნა ელისაშვილმა.
იგი აცხადებს, რომ პრეზიდენტის მიერ შერჩეულ ახალგაზრდა კაცს ყველა ინფორმაცია მიაწოდა. კერძოდ, ვინც იყო ელისაშვილის ინფორმაციის წყარო და მისი ინფორმატორი.
"ეს ადამიანი წავიდა და სუს-ის მაღალჩინოსნებს ინფორმაცია იმ დღესვე მიაწოდა. ეს შემიძლია დადასტურებით გითხრათ. სახელით და გვარით ვიცი, ვისაც მიაწოდა ინფორმაცია", _ განაცხადა ელისაშვილმა.
